អន្តរជាតិ
ប្រធានាធិបតីហ្វីលីពីន ទើបយល់ច្បាស់ថារដ្ឋាភិបាលរបស់លោកមានពាក់ព័ន្ធអំពើពុករលួយខ្លាំងក្លា
× លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានច្រានចោលជាថ្មីលើការរិះគន់លើចំណាត់ការរបស់ រដ្ឋាភិបាលលោក ក្នុងការបង្ក្រាបគ្រឿងញៀន និងអំពើពុករលួយក្នុងជួររដ្ឋាភិបាល ជាពិសេសស្ថាប័នសាធារណៈតែម្តង។ ការលើកឡើងរបស់លោក ជាការបំភ្លឺជាមួយនឹងការសន្យាពីពេលកាន់តំណែងដំបូងរបស់លោក ដែលចង់បោសសម្អាតបញ្ហារ៉ាំរ៉ៃរបស់សង្គម និងរដ្ឋាភិបាលឲ្យអស់ត្រឹមតែរយៈពេល៦ខែប៉ុណ្ណោះ។
តាមរយៈកិច្ចសម្ភាសន៍ជាមួយនឹងសារព័ត៌មាន CNN ដែលចុះផ្សាយនៅថ្ងៃទី១ ខែធ្នូ លោកប្រធានាធិបតី រ៉ូឌ្រីហ្គោ ឌូទើតេ បានចាត់ទុកអ្នករិះគន់លោកលើចំណាត់ការប្រឆាំងគ្រឿងញៀន និងអំពើពុករលួយ ថាជាមនុស្សដែលគ្មានសតិ និងឆ្កួតលីលា ហើយបានគូសបញ្ជាក់ថាការទប់ទល់ជាមួយនឹងបញ្ហាគ្រឿងញៀន គឺជាបញ្ហាដែលកំពុងតែធ្វើឡើងគ្រប់ប្រទេស មិនមែនតែហ្វីលីពីនឡើយ។
ឆ្លើយតបនឹងបញ្ហាពាក់ព័ន្ធនឹងការបន្តអនុវត្តចំណាត់ការបោសសម្អាតគ្រឿងញៀន ដែលបានបណ្តាលឲ្យមនុស្សជាច្រើនពាន់នាក់បានស្លាប់នោះ លោកប្រធានាធិបតី បានឲ្យដឹងពីរឿងពីក្រោយខ្នង។ រឿងនោះគឺ មុនពេលកាន់តំណែង លោក រំពឹងថា រដ្ឋាភិបាលលោក ជាពិសេសចំណាត់ការសង្គ្រាមប្រឆាំងគ្រឿងញៀន នឹងអាចដំណើរការបានល្អ និងដូចការរំពឹងទុក ដោយនឹងត្រូវអស់ពីសង្គមត្រឹមតែរយៈពេល៦ខែប៉ុណ្ណោះ។
ក៏ប៉ុន្តែពេលចូលអនុវត្តការងារជាក់ស្តែង លោកប្រធានាធិបតី បានបញ្ជាក់ដោយមិនមានការលាក់បាំងឡើយ គឺមានមន្ត្រីរដ្ឋាភិបាលជាច្រើនរូប រួមមានទាំងមន្ត្រីប៉ូលិស គយ និងអ្នកជាច្រើនផ្សេងៗ បានពាក់ព័ន្ធយ៉ាងជ្រៅក្នុងបញ្ហាគ្រឿងញៀននេះ ដែលចំណុចនេះហើយ ធ្វើឲ្យវិធានការបស់លោក មិនអាចសម្រេចបានទៅតាមគោលដៅ។
សម្រាប់លោកប្រធានាធិបតី សង្គ្រាមប្រឆាំង និងបោសសម្អាតគ្រឿងញៀនរបស់រដ្ឋបាលដឹកនាំលោកបច្ចុប្បន្ន ក៏ប្រៀបដូចជាសង្គ្រាមប្រឆាំងនឹងរដ្ឋាភិបាលខ្លួនឯងយ៉ាងដូច្នេះឯង ហើយលោក ក៏ទើបតែដឹងថា អំពើពុករលួយ បានកើតឡើងយ៉ាងជ្រៅក្នុងជួររដ្ឋាភិបាល។ កន្លងមក លោកប្រធានាធិបតី ក៏បានដកតំណែង និងកាត់ទោសមន្ត្រីពុករលួយ និងពាក់ព័ន្ធគ្រឿងញៀនផងដែរ។
គួរជម្រាបផងដែរថា លោក រ៉ូឌ្រីហ្គោ ឌូទើតេ គឺជាមេដឹកនាំតំបន់អាស៊ានល្បីឈ្មោះមួយរូប ដោយសារតែបញ្ហារំលោភសិទ្ធិមនុស្ស។ តាមរបាយការណ៍សិទ្ធិមនុស្ស គិតចាប់តាំងពីពេលលោកឡើងកាន់អំណាចឆ្នាំ២០១៦មក មានមនុស្សប្រមាណ ៦ ពាន់នាក់ហើយ បានស្លាប់ក្នុងប្រតិបត្តិការសង្គ្រាមគ្រឿងញៀនរបស់លោក។ បញ្ហានេះ ក៏កំពុងតែស្ថិតក្រោមការស៊ើបអង្កេតរបស់ភ្នាក់ងារជំនាញអង្គការសហប្រជាជាតិ ក៏ដូចជា តុលាការព្រហ្មទណ្ឌអន្តរជាតិផងដែរ។
ទោះបែបនេះក្តី ក្នុងគោលជំហររបស់លោក ឌូទើតេ លោក មិនដែលចង់សម្លាប់ ឬមានវិធានការធ្ងន់ធ្ងរប្រឆាំងប្រជាជនខ្លួនឯងឡើយ ហើយអ្វីដែលលោកធ្វើនេះ ដើម្បីឲ្យអនាគតអ្នកជំនាន់ក្រោយរបស់ហ្វីលីពីន មិនត្រូវបានបំផ្លាញដោយសារគ្រឿងញៀន ហើយក៏ដើម្បីការងារ និងទប់ស្កាត់ការយកប្រទេសហ្វីលីពីន ជាកន្លែងសម្រាប់ចែកចាយ និងផលិតគ្រឿងញៀនផងដែរ៕
Tag:
ហ្វីលីពីន
អាស៊ាន
គ្រឿងញៀន
© រក្សាសិទ្ធិដោយ thmeythmey.com