ជាតិ
មន្ត្រីជំនាញអាស៊ី-ប៉ាស៊ីហ្វិកពិភាក្សាគ្នាស្តីពីឌីជីថលនីយកម្មក្នុងសេវាការងារសាធារណៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង និងមន្ត្រីជំនាញនានាពីតំបន់អាស៊ី-ប៉ាស៊ីហ្វិក
× សៀមរាប៖ សន្និសីទអាស៊ី-ប៉ាស៊ីហ្វិកសមាគមផ្តល់សេវាការងារសាធារណៈពិភពលោក ក្រោមប្រធានបទ ឌីជីថលនីយកម្មក្នុងសេវាការងារសាធារណៈ (Digitalization in Public Employment Services) ដំណើរការនៅខេត្តសៀមរាប ចាប់ពីថ្ងៃទី២ ដល់ថ្ងៃទី៣ ខែធ្នូនេះ។
នាពិធីបើកសន្និសីទ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានគូសបញ្ជាក់ ថា សន្និសីទនេះមានសារប្រយោជន៍ដោយបានផ្តល់ឱកាសសម្រាប់ប្រទេសសមាជិកក្នុងការចែករំលែក ស្វែងយល់ និងដកស្រង់បទពិសោធន៍ និងការអនុវត្តល្អក្នុងការសិក្សានិងចាប់យកមកប្រើប្រាស់ នូវបច្ចេកវិទ្យាបច្ចុប្បន្ននិងពេលអនាគត សម្រាប់ជំរុញការធ្វើឌីជីថលនីយកម្ម និងបង្រួញគម្លាតនៃការអភិវឌ្ឍសេវាការងារសាធារណៈក្នុងប្រទេសជាសមាជិករបស់ WEPES ពិសេសប្រទេសដែលទើបចាប់ផ្តើមអភិវឌ្ឍសេវាសាធារណៈដូចជាកម្ពុជាក្នុងការខិតខំធ្វើដំណើរឈានទៅសម្រេចជោគជ័យនូវគោលដៅចុងក្រោយ គឺការប្រែក្លាយទៅជាសេវាការងារសាធារណៈឌីជីថលពេញលេញ។
លោករដ្ឋមន្ត្រីបន្ថែមថា សន្និសីទនេះឆ្លុះបញ្ចាំងឱ្យឃើញជាថ្មីម្ដងទៀតអំពីតួនាទីកាន់តែសំខាន់ចាំបាច់របស់WAPES នៅលើឆាកអន្តរជាតិ ក្នុងការបង្កើតជាវេទិកាសម្រាប់ការសិក្សានិងការកសាងចំណេះដឹង និងផ្តល់ ការគាំទ្រដល់សមាជិកក្នុងការបង្កើនជំនាញ ហើយកម្ពុជាប្តេជ្ញាបន្តចូលរួមផ្តល់កិច្ចសហប្រតិបត្តិការ និងការគាំទ្រតាមលទ្ធភាពដល់រាល់សកម្មភាពរបស់ WAPES ក្នុងការឈានទៅសម្រេចបានជោគជ័យនូវគោលដៅរបស់ខ្លួននេះ។
គួរបញ្ជាក់ថា ទីភ្នាក់ងារជាតិមុខរបរនិងការងារ នៃក្រសួងការងារនិងបណ្តុះបណ្តាលវិជ្ជាជីវៈ គឺជាសមាជិកថ្មីមួយក្នុងចំណោមសមាជិកចំនួន១២ នៃតំបន់អាស៊ី-ប៉ាស៊ីហ្វិក របស់សមាគមពិភពលោកនៃសេវាការងារសាធារណៈ (WAPES) ដែលមានសមាជិកសរុបចំនួន៨២។ កម្ពុជាធ្វើម្ចាស់ផ្ទះរៀបចំសន្និសីទនេះរយៈពេល២ថ្ងៃ គឺថ្ងៃទី២-៣ ធ្នូ ដោយមានការចូលរួមចែករំលែកចំណេះដឹង និងបទពិសោធន៍ពីអ្នកឯកទេសផ្នែកប្រព័ន្ធបច្ចេកវិទ្យាព័ត៌មាននៃសេវាការងារសាធារណៈ អ្នកស្រាវជ្រាវ អ្នករៀបចំគោលនយោបាយ និងមន្ត្រីផ្នែកផ្តល់សេវាការងារសាធារណៈដែលអញ្ជើញមកពីបណ្តាប្រទេសជាសមាជិកចំនួន ១២ នៅទូទាំងពិភពលោក៕
Tag:
ការងារ
WEPES
អ៊ិត សំហេង
© រក្សាសិទ្ធិដោយ thmeythmey.com