ជាតិ
លោក ហោ ណាំហុង៖ កិច្ចប្រជុំ AIMF បង្កើនគុណតម្លៃបន្ថែមដល់ហ្វ្រង់កូហ្វូនី លោកឧបនាយករដ្ឋមន្ត្រី ហោ ណាំហុង នាពិធីបើកមហាសន្និបាត AIMF លើកទី៣៩ ព្រឹកថ្ងៃទី៤ ខែធ្នូ នៅភ្នំពេញ
× មហាសន្និបាតលើកទី៣៩ នៃសមាគមអន្តរជាតិនៃអភិបាលក្រុងប្រើប្រាស់ភាសាបារាំង (AIMF) ត្រូវបានប្រកាសបើកជាផ្លូវការនៅភ្នំពេញ នាព្រឹកថ្ងៃពុធ ទី៤ ខែធ្នូ នេះ ក្រោមប្រធានបទ «AIMF ភ្នំពេញ ៤០ឆ្នាំក្រោយ»។ នាឱកាសនោះ លោកឧបនាយករដ្ឋមន្ត្រី ហោ ណាំហុង បានបង្ហាញក្តីរំពឹងថា វេទិកា AIMF នឹងជាក្លាយជាបណ្តាញរួមគ្នាមួយដែលបង្កើនគុណតម្លៃបន្ថែមដល់ហ្វ្រង់កូហ្វូនី (បណ្តាអ្នកនិយាយភាសាបារាំង)។
លោក ហោ ណាំហុង ដែលធ្វើជាគណៈអធិបតីក្នុងនាមតំណាងសម្តេចនាយករដ្ឋមន្ត្រី ហ៊ុន សែន បានរំលឹកដល់លោក Jacques Chirac អតីតប្រធានាធិបតីបារាំង អតីតអភិបាលក្រុងប៉ារីស និងជាស្ថាបនិក AIMF ដែលទទួលមរណភាពកាលពីពេលថ្មីៗកន្លងមកនេះ។ ឧបនាយករដ្ឋមន្ត្រីរូបនេះ បានលើកឡើងពីប្រវត្តិជាបន្តបន្ទាប់ក្នុងការស្តាររាជធានីភ្នំពេញឲ្យរស់ឡើងវិញក្រោយរបបខ្មែរក្រហម រហូតដល់មានអ្នករស់នៅប្រមាណ៣លាននាក់នាពេលបច្ចុប្បន្ន។
«ហេដ្ឋារចនាសម្ព័ន្ធត្រូវបានកសាង និងពង្រីក ដោយសារមានការកកស្ទះចរាចរណ៍នៅលើផ្លូវថ្នាល់ ដូចនៅគ្រប់រដ្ឋធានីទាំងអស់នៃអាស៊ីអាគ្នេយ៍។ នេះក៏ដោយសារតែការកើនឡើងនៃជីវភាពរស់នៅរបស់ប្រជាជន កំណើនសេដ្ឋកិច្ច៧.៧ភាគរយក្នុងរយៈពេលពីរទសវត្សកន្លងមកនេះ»។ លោក ហោ ណាំ ហុង បានគូសបញ្ជាក់យ៉ាងដូច្នេះក្នុងសុន្ទរកថារបស់ខ្លួន។
មហាសន្និបាតនេះ មានការចូលរួមពីគណៈប្រតិភូនៃទីក្រុង និងសមាគមរដ្ឋបាលថ្នាក់ក្រោមជាតិចូលរួមចំនួន៤០២ នាក់ មកពី៤១ប្រទេស។ អតីតរដ្ឋមន្ត្រីក្រសួងការបរទេសរូបនេះ ចង់ឃើញសមាគម AIMF ក្លាយជាយន្តការពហុភាគី ដែលជាប្រយោជន៍ដល់ការអភិវឌ្ឍប្រកបដោយចីរភាពនៃទីក្រុងនិយាយភាសាបារាំង។ «ខ្ញុំគិតថា វាជាការសមស្របក្នុងការលើកកម្ពស់កិច្ចសហប្រតិបត្តិការនៅក្នុងនៅក្នុង AIMF ដោយផ្លាស់ប្តូរវេទិកានេះឲ្យទៅជាបណ្តាញរួមគ្នាមួយដែលនឹងបង្កើតគុណតម្លៃបន្ថែមដល់ហ្វ្រង់កូហ្វូនី»។
ក្នុងការពង្រឹង AIMF លោក ហោ ណាំហុង ណែនាំឲ្យមានការកម្មវិធីបណ្តុះបណ្តាលអ្នកដឹកនាំអនាគតរបស់សមាគម ដោយធ្វើឲ្យ AIMF និង Francophonie ក្លាយទៅជាតំបន់សន្តិភាព ភាតរភាព និងការអភិវឌ្ឍប្រកបដោយចីរភាព ក៏ដូចជាការបង្កើតព្រឹត្តិការណ៍កីឡា វប្បធម៌ និងទេសចរណ៍។
ជាមួយគ្នានេះ លោកស្រី Louise Mushikiwabo អគ្គលេខាធិការនៃអង្គការអន្តរជាតិនិយាយភាសាបារាំងហ្វ្រង់កូហ្វូនី គាំទ្រឲ្យសមាជិកនៃ AIMF បន្តអនុវត្តការងាររបស់ខ្លួនដោយផ្តោតលើបញ្ហាបរិស្ថាន អភិបាលកិច្ច សង្គមកិច្ច ការអប់រំ និងវប្បធម៌ ដែលធានាដល់ការរស់នៅរបស់ប្រជាពលរដ្ឋ និងការអភិវឌ្ឍប្រកបដោយចីរភាព។ លោកស្រីបានបញ្ជាក់ថា «ហ្វ្រង់កូហ្វូនី គាំទ្ររាល់គម្រោងទាំងឡាយនាពេលអនាគត»៕
© រក្សាសិទ្ធិដោយ thmeythmey.com