កីឡាអន្តរជាតិ
អន្តរជាតិ
ស៊ីហ្គេម៖ ប្រជាជនហ្វីលីពីន លើកទឹកចិត្តអត្តពលិកទីម័រខាងកើតដែលមិនទាន់ឈ្នះមេដាយ
×![]()
ដោយ: ទេព ពិទូរ្យ
ស្របពេលម្ចាស់ផ្ទះហ្វីលីពីននៅតែបន្តដណ្តើមមេដាយមាសយ៉ាងច្រើនក្រោយការប្រកួតផ្លូវការរយៈពេល៣ថ្ងៃ ទីម័រខាងកើតនៅមិនទាន់រកបានមេដាយអ្វីមួយនៅឡើយនោះទេពីការប្រកួតកីឡាស៊ីហ្គេម (SEA Games 2019) លើកទី៣០។ ប្រជាជនហ្វីលីពីនមួយចំនួនដែលនិយមលេងបណ្តាញសង្គមបានលើកទឹកចិត្តចំពោះអត្តពលិកទីម័រខាងកើត។
ឆ្លងកាត់ការប្រកួត៣ថ្ងៃ ក្រៅពីហ្វីលីពីនដែលអាចរកបានមេដាយបណ្តោះអាសន្នច្រើនជាងគេចំនួន១០៣រួចហើយ ក្នុងនោះមាស៥១ ប្រាក់៣៣ និងសំរឹទ្ធិ១៩ ក៏មាន៩ប្រទេសផ្សេងទៀតអាចរកបានមេដាយមួយចំនួនរួចទៅហើយដែរ លើកលែងតែទីម័រខាងកើតប៉ុណ្ណោះ។
ទីម័រខាងកើតបានបញ្ជូនអត្តពលិកត្រឹមតែ៤៨រូបប៉ុណ្ណោះ ដែលជាចំនួនតិចជាងគេបំផុតក្នុងព្រឹត្តិការណ៍កីឡាប្រចាំតំបន់អាស៊ានឆ្នាំ២០១៩នេះ ខណៈដែលក្រុមដែលបញ្ជូនអត្តពលិកតិចជាងគេលំដាប់ទី២ឡាវមានដល់ទៅ៤១៩នាក់ទៅហើយ។
ដោយសារមិនទាន់ទទួលបានមេដាយនៅឡើយ ប្រជាជនហ្វីលីពីនមួយចំនួនបានបង្ហោះសារលើកទឹកចិត្តនៅលើប្រព័ន្ធអ៊ីនធឺណិត ដោយបង្ហាញការគាំទ្រអត្តពលិកទីម័រខាងកើត។
នៅថ្ងៃទី៣ ខែធ្នូ តាមរយៈគណនីហ្វេសប៊ុករបស់ស្ត្រីហ្វីលីពីនម្នាក់ឈ្មោះ Avriel Anne Pediongco បានបង្ហោះរូបភាពរបស់ក្រុមអត្តពលិកទីម័រខាងកើតមួយក្រុមអំឡុងពិធីបើកការប្រកួត ដោយសរសេរថា៖«ហ្វីលីពីន គាំទ្រដល់បងប្អូនប្រុសស្រីជាទីស្រឡាញ់ពីប្រទេសទីម័រខាងកើត ដោយលើកទឹកចិត្តពួកគេហ្វឹកហាត់នៅទីនេះឲ្យមានភាពរីករាយរហូតបញ្ចប់ព្រឹត្តិការណ៍ស៊ីហ្គេមលើកទី៣០នេះ»។
«ចូរយើងរីករាយជាមួយទីម័រខាងកើត។ អ្នកអាចធ្វើបានបងប្អូនប្រុសស្រីទីម័រខាងកើត»។ ការសរសេរបែបនេះ គឺនាងចង់ពន្យល់ថា នាងចង់ឲ្យក្រុមទីម័រខាងកើតវិលត្រឡប់ទៅប្រទេសរបស់ពួកគេវិញដោយស្នាមញញឹម និងសង្ឃឹមថាពួកគេនឹងឈ្នះមេដាយផងដែរ។
ដោយឡែកស្ត្រីហ្វីលីពីនម្នាក់ទៀតឈ្មោះ Ves Garcia បានសម្តែងការគាំទ្រដល់ក្រុមទីម័រខាងកើតលើបណ្តាញសង្គម Twitter ផងដែត។ នាងសរសេរថា៖« ហ្វីលីពីននាំមុខមេដាយក្នុងព្រឹត្តិការណ៍ស៊ីហ្គេមពិតជាធ្វើឲ្យយើងមានមោទកភាព ប៉ុន្តែយើងនឹងកាន់តែរីករាយប្រសិនបើទីម័រខាងកើតឈ្នះមេដាយដើម្បីនាំយកទៅកាន់ប្រទេសរបស់ពួកគេ ក្រោយចប់ការប្រកួត»។
PH lead in the SEA Games really made us proud, but we will be happier if Timor-Leste would also win medals to bring with them as the SEAG ends.
— Ves Garcia (@vesahgee) December 3, 2019
It's not just about the competition. It's about compassion. Let us cheer for Timor-Leste!#SEAGames2019#WeWinAsOne
កាលពីព្រឹត្តិការណ៍ស៊ីហ្គេមឆ្នាំ២០១៧ នៅម៉ាឡេស៊ី ក្រុមទីម័រខាងកើតទទួលបានមេដាយសំរឹទ្ធិ៣។
គិតត្រឹមម៉ោង ១១ ព្រឹតថ្ងៃទី៤ ធ្នូនេះ ម្ចាស់ផ្ទះហ្វីលីពីននៅតែនាំមុខគេក្នុងតារាងមេដាយបណ្តោះអាសន្ន ដោយរកមេដាយមាស៥១ ប្រាក់៣៣ និងសំរឹទ្ធិ១៩ សរុប១០៣ តាមពីក្រោយដោយវៀតណាម ដែលទទួលបានមេដាយសរុប៧៥ ក្នុងនោះ មាស២៣ ប្រាក់២៧ និងសំរឹទ្ធិ២៥៕
Tag:
SEA Games
ហ្វីលីពីន
ទីម័រខាងកើត
© រក្សាសិទ្ធិដោយ thmeythmey.com
