អន្តរជាតិ
កូរ៉េខាងជើង ត្រៀមប្រជុំបក្សកាន់អំណាច, ការចរចាជាមួយអាមេរិកអាចជាប្រធានបទធំ មេដឹកនាំកូរ៉េខាងជើង គីម ជុងអ៊ុន និងក្រុមមន្រ្តីនៅឯភ្នំ Paektu ។ រូបភាព KCNA
× កូរ៉េខាងជើង នឹងកោះប្រជុំបក្សកាន់អំណាចនៅក្នុងខែធ្នូនេះ ដើម្បីជជែកពីគោលនយោបាយសម្រាប់ឆ្នាំខាងមុខ។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើងនៅថ្ងៃទី៤ ខែធ្នូ។ ការចរចាជាមួយអាមេរិករឿងរំសាយនុយក្លេអ៊ែរ ត្រូវរំពឹងថា ជារបៀបវារៈសំខាន់ផងដែរ ខណៈឱសានវាទចុងឆ្នាំរបស់កូរ៉េខាងជើងដែលឲ្យអាមេរិកផ្លាស់ប្ដូរគោលនយោបាយរបស់ខ្លួននោះ ក៏សល់មិនច្រើនដែរ។ បើមើលតាមស្ថានភាពចុងក្រោយ កូរ៉េខាងជើង ទំនងមិនរក្សាជំហរទន់ទៀតឡើយ។
បើតាមទីភ្នាក់ងារព័ត៌មានរដ្ឋកូរ៉េខាងជើង KCNA កូរ៉េខាងជើង នឹងបើកកិច្ចប្រជុំពេញអង្គលើកទី៧ នៃគណៈកម្មាធិការមជ្ឈិមបក្សពលករនៅចុងខែធ្នូនេះដើម្បីសម្រេចចិត្តលើបញ្ហាសំខាន់ដែលស្របតាមតម្រូវការអភិវឌ្ឍប្រទេស និងស្ថានភាពក្នុងស្រុក និងក្រៅស្រុក។ KCNA មិនបានផ្ដល់ព័ត៌មានលម្អិតពីកិច្ចប្រជុំនេះឡើយ ប៉ុន្តែគេជឿថា ការចរចាជាមួយអាមេរិកលើការរំសាយនុយក្លេអ៊ែរដែលជាប់គាំង អាចស្ថិតលើតុប្រជុំផងដែរ។
ជាកិច្ចប្រជុំលើកដំបូងក្នុងរយៈពេល៨ខែ ជំនួបលើកនេះ អាចមានការជជែកពីការផ្លាស់ប្ដូរគោលនយោបាយក្នុងការរំសាយនុយក្លេអ៊ែរដែលកំពុងជាប់ចរចាជាមួយអាមេរិក។ ក្រោយកិច្ចប្រជុំ កូរ៉េខាងជើង ទំនងជាវិលត្រឡប់ទៅរកដានចាស់វិញ គឺបង្កើតសកម្មភាពបង្ករឿងដាក់គេដាក់ឯងដូចជាការសាកល្បងមីស៊ីលបាលីស្ទិក ឬការសាកល្បងអាវុធនុយក្លេអ៊ែរជាដើម។ នៅថ្ងៃទី៤ ខែធ្នូ KCNA ក៏បញ្ចេញរូបជាច្រើនរបស់ប្រមុខដឹកនាំកូរ៉េខាងជើង គីម ជុងអ៊ុន នៅភ្នំពិសិដ្ឋ Paektu ។ ការណ៍នេះនាំឲ្យគេជឿថា កូរ៉េខាងជើង ប្រាកដជាមានការផ្លាស់ប្ដូរគោលនយោបាយថ្មី។
យ៉ាងណាមិញ ក្រុងព្យុងយ៉ាង ក៏អាចចាំមើលទង្វើក្រុងវ៉ាស៊ីនតោនសិន។ លោក គីម បានទុកពេលឲ្យរដ្ឋបាលប្រធានាធិបតី ដូណាល់ ត្រាំ ត្រឹមដំណាច់ឆ្នាំ២០១៩ នេះដើម្បីដាក់ចេញគោលនយោបាយថ្មីដើម្បីចរចាជាមួយខ្លួនរឿងរំសាយនុយក្លេអ៊ែរ។ បើអាមេរិកមិនមានការផ្លាស់គោលនយោបាយសមស្រប ឬការលក្ខខណ្ឌចរចាណាដែលខុសពីមុននោះ កូរ៉េខាងជើងព្រមានហើយថា អាមេរិកនឹងជួបផលវិបាកធ្ងន់ធ្ងរមិនខាន។
ខណៈឱសានវាទកំណត់ដោយកូរ៉េខាងជើងខិតជិតកាន់តែកៀក លោក ត្រាំ ឯណោះវិញ ហាក់មិនផ្លាស់ប្ដូរជំហរឡើយ ហើយនៅតែលើកឡើងទំនាក់ទំនងផ្ទាល់ខ្លួនជាមួយលោក គីម ដដែល។ ប្រាប់អ្នកសារព័ត៌មាននៅទីក្រុងឡុងដ៍មុនជំនួបមេដឹកនាំណាតូ លោក ត្រាំ ក៏សង្ឃឹមថា មេដឹកនាំកូរ៉េខាងជើង នឹងនៅតែគោរពការប្ដេជ្ញាចិត្តលើការលុបបំបាត់កម្មវិធីនុយក្លេអ៊ែររបស់ខ្លួនដដែល។
អ្វីគួរឲ្យចាប់អារម្មណ៍នោះ លោក ត្រាំ បានរំឭកជាថ្មីពីភាពចាំបាច់ក្នុងការប្រើកម្លាំងយោធាក្នុងករណីចាំបាច់។ លោកបញ្ជាក់ដូច្នេះថា៖ «ឥឡូវនេះ យើងមានយោធាដ៏ខ្លាំងបំផុត ហើយក៏ជាកងទ័ពដ៏ខ្លាំងលើលោកដែរ។ សង្ឃឹមថា យើងមិនចាំបាច់ប្រើទេ ប៉ុន្តែបើចាំបាច់ យើងនឹងប្រើប្រាស់កងទ័ព...។» ទាក់ទងរឿងបាញ់គ្រាប់ផ្លោងវិញ ប្រធានាធិបតីអាមេរិករូបនេះលើកឡើងថា លោក គីម ជាបុរសរ៉ុក្កែត ព្រោះចូលចិត្តបាញ់មីស៊ីល៕
Tag:
អាមេរិក
កូរ៉េខាងជើង
គីម ជុងអ៊ុន
ដូណាល់ ត្រាំ
© រក្សាសិទ្ធិដោយ thmeythmey.com