ជាតិ
សង្គមជាតិ
សមត្ថកិច្ចបង្ក្រាបទីតាំងកែច្នៃគ្រឿងញៀន និងឃាត់ខ្លួនជនជាតិវៀតណាម៤នាក់ ម្សៅក្រាមពណ៌ត្នោត២០កញ្ចប់ និងសារធាតុរាវ៣៨ដប។ រូបភាពពីស្នងការដ្ឋាននគរបាលរាជធានីភ្នំពេញ
× សមត្ថកិច្ចបានចុះបង្ក្រាបទីតាំងកែច្នៃគ្រឿងញៀនមួយកន្លែង នៅភូមិរបោះអង្កាញ់១ សង្កាត់ព្រែកឯង ខណ្ឌច្បារអំពៅ នៅព្រឹកថ្ងៃទី៤ ធ្នូ ឆ្នាំ២០១៩។ ការចុះបង្ក្រាបនេះ ផ្អែកតាមចម្លើយសារភាពរបស់ជនសង្ស័យ៤នាក់ ដែលសមត្ថកិច្ចបានឃាត់ខ្លួន ជាមួយនឹងគ្រឿងញៀនប្រមាណ១០គីឡូក្រាម កាលពីថ្ងៃទី ៣ ធ្នូ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ ។
ក្នុងការបង្ក្រាបទីតាំងកែច្នៃគ្រឿងញៀននេះ សមត្ថកិច្ចបានឃើញ សារធាតុញៀន២០ញ្ចប់ធំ, សារធាតុរាវពណ៌ស៣៨ដប, ម្សៅក្រាមពណ៌១កញ្ចប់តូច, សារធាតុរាវពណ៌ខ្មៅ២៤ចានជ័រ ស្មើនឹងទម្ងន់៥៤៤៦៤,២៧ក្រាម រួមទាំងឧបករណ៍កែច្នៃមួយចំនួនធំបន្ថែមទៀត។
បន្ទាប់ចុះឆែកឆេរ សមត្ថកិច្ចបាននាំជនសង្ស័យជនជាតិវៀតណាម៤នាក់ និងវត្ថុតាង ទៅមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ដើម្បីចាត់ការតាមនីតិវិធី។ ជាមួយគ្នាលោក នេត សាវឿន អគ្គស្នងការនគរបាលជាតិ ជំរុញឲ្យបន្តស្រាវជ្រាវស៊ើបអង្កេត ដើម្បីតាមចាប់មេក្លោងបន្ថែមទៀត៕
Tag:
គ្រឿងញៀន
រាជធានីភ្នំពេញ
© រក្សាសិទ្ធិដោយ thmeythmey.com