ជាតិ
រដ្ឋមន្ត្រីការងារ៖ គិលានដ្ឋានតាមសហគ្រាស ត្រូវមានឱសថគ្រប់គ្រាន់ ហើយបុគ្គលិក ត្រូវធ្វើការទៀងទាត់ រូបពីក្រសួងការងារ
× ភ្នំពេញ៖ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានដាក់កំហិតថា គិលានដ្ឋាន តាមបណ្តាសហគ្រាសនិងគ្រឹះស្ថាននានា ត្រូវតែមានបរិក្ខារ-ឱសថគ្រប់គ្រាន់ និងមានបុគ្គលិកសុខាភិបាលធ្វើការទៀងទាត់។ នេះបើតាមការចុះផ្សាយរបស់ក្រសួងការងារ។
ថ្លែងក្នុងពិធីបើកសិក្ខាសាលាចែករំលែកបទពិសោធន៍ស្ដីពីការរៀបចំគិលានដ្ឋានតាមសហគ្រាស និងគ្រឹះស្ថាន ដែលធ្វើឡើងនៅថ្ងៃទី៤ ខែធ្នូ ឆ្នាំ២០១៩ នៅសណ្ឋាគារភ្នំពេញ លោក អ៊ិត សំហេង បានលើកឡើងថាគ្រប់គិលានដ្ឋានតាមបណ្តាសហគ្រាស ត្រូវមានសម្ភារបរិក្ខារ-ឱសថ ប្រើគ្រប់គ្រាន់ ហើយបុគ្គលិកធ្វើការទៀងទាត់និងប្រកបវិជ្ជាជីវៈ។
លោករដ្ឋមន្ត្រី បានអំពាវនាវឲ្យនិយោជក រៀបចំសហគ្រាសឬគ្រឹះស្ថានរបស់ខ្លួន ឲ្យបានសមស្រប និងគោរពទៅតាមច្បាប់ស្ដីពីការងារ ហើយក៏ត្រូវធានាឲ្យបាននូវដំណើរការសម្ភារបរិក្ខារ-ឱសថប្រើប្រាស់ និងបុគ្គលិកធ្វើការទៀងទាត់ពេលវេលា រួមទាំង ត្រូវរក្សាអនាម័យ និងសុវត្ថិភាពឲ្យបានត្រឹមត្រូវ។
លោក បន្តថា និយោជក ត្រូវបង្ការទប់ស្កាត់នូវហានិភ័យ ឲ្យបុគ្គលិកទទួលការប្រើប្រាស់សម្ភារឲ្យបានត្រឹមត្រូវ និងថែរក្សាឲ្យបានល្អ។ លោក បន្ថែមថា និយោជកក៏ត្រូវពន្យល់ពីវិធានការផ្សេងៗដែលទាក់ទងនឹងសុខភាព ឬសុវត្ថិភាពទៅបុគ្គលិក ហើយត្រូវបញ្ជូនទៅបេឡាជាតិរបបសង្គមឲ្យទាន់ពេលវេលា បើកម្មករនិយោជិត ជួបគ្រោះថ្នាក់ ឬបញ្ហាណាមួយ។
លើសពីនេះ រដ្ឋមន្ត្រីការងារ ជំរុញឲ្យនិយោជកទាំងអស់ ចូលរួមក្នុងការផ្សព្វផ្សាយពីវិធានការ ឬបទប្បញត្តផ្សេងៗលើបញ្ហាដែលទាក់ទងនឹងសុខភាពផងដែរ៕
Tag:
កម្មករ
សុខភាព
គិលានដ្ឋាន
© រក្សាសិទ្ធិដោយ thmeythmey.com