ជាតិ
សង្គមជាតិ
ចាប់វៀតណាម៤នាក់ ជាមួយថ្នាំញៀនដល់ទៅជាង៨៤គីឡូក្រាម
× កម្លាំងសមត្ថកិច្ច បានបង្ក្រាបបទល្មើសជួញដូរគ្រឿងញៀនទ្រង់ទ្រាយធំមួយនៅទីតាំងចំនួន២ ក្នុងរាជធានីភ្នំពេញ ដោយចាប់បានជនជាតិវៀតណាម៤នាក់ (ស្រី២នាក់) រួមជាមួយថ្នាំញៀនជាង៨៤គីឡូក្រាម។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិកម្ពុជា នៅយប់ថ្ងៃទី៤ ខែធ្នូ ឆ្នាំ២០១៩។
ប្រតិបត្តិការបង្ក្រាបបទល្មើសគ្រឿងញៀននេះ មានការបញ្ជាផ្ទាល់ពីលោក នេត សាវឿន អគ្គស្នងការនគរបាលជាតិ។ ការបង្ក្រាបនេះ បានធ្វើឡើងតាំងពីយប់ថ្ងៃទី៣ ខែធ្នូមក នៅចំណុចផ្ទះជួលមួយ ក្រោយមន្ទីរពេទ្យរបេង ផ្លូវ១១៣ ភូមិ៣ សង្កាត់បឹងកេងកងទី២ ខណ្ឌបឹងកេងកង។
នគរបាលជាតិ ចុះផ្សាយថា ក្រោយចាប់ខ្លួន និងសួរនាំរួច កម្លាំងសមត្ថកិច្ច បាននាំជនសង្ស័យ បន្តចុះឆែកឆេរទីតាំងកែច្នៃគ្រឿងញៀន ស្ថិតនៅផ្ទះលេខ១៦៨ ផ្លូវលេខ១១២ ភូមិរបោះអង្គាញ់១ សង្កាត់ព្រែកឯង ខណ្ឌច្បារអំពៅ ដោយរកឃើញសារធាតុញៀនជាច្រើនទៀត។ សារធាតុញៀនសរុប ដែលសមត្ថកិច្ច បានរកឃើញនៅគោលដៅទាំង២នេះ មានជាង៨៤គីឡូក្រាម ហើយសារធាតុគីមីផ្សំសរុប មានជាង២៨គីឡូងក្រាម រួមជាមួយវត្ថុកែច្នៃផ្សេងៗទៀត។
ជនសង្ស័យជាជនជាតិវៀតណាតទាំង៤នាក់នោះ គឺ ទី១ ឈ្មោះ Nguyen Yuan Anh ភេទប្រុស កើតឆ្នាំ១៩៩៥ ទី២ ឈ្មោះ Phuong Hoang Veit ភេទប្រុស កើតឆ្នាំ១៩៩៦ ទី៣ ឈ្មោះ Nguyen Thi Thuy Ngoc ភេទស្រី កើតឆ្នាំ១៩៨៨ និង ទី៤ ឈ្មោះ Nguyen Thi Thuy Ngan ភេទស្រី កើតឆ្នាំ១៩៩០។
បន្ទាប់បញ្ចប់ការឆេកឆេរ កម្លាំងសមត្ថកិច្ច បាននាំជនសង្ស័យទាំង៤នាក់ និងវត្ថុតាង ទៅមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ដើម្បីកសាងសំណុំរឿងទៅតុលាការ។
នគរបាលជាតិ បញ្ជាក់ដូច្នេះថា៖«ពាក់ព័ន្ធករណីខាងលើ ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន បានចង្អុលដឹកនាំអង្គភាពជំនាញ ឲ្យបន្តស្រាវជ្រាវ ដើម្បីតាមចាប់មេខ្លោង និងបង្ក្រាបឲ្យដល់ឫសគល់»៕
Tag:
ជនជាតិវៀតណាម
គ្រឿងញៀន
© រក្សាសិទ្ធិដោយ thmeythmey.com