អន្តរជាតិ
ចិន ព្រមានចាត់វិធានការតប ក្រោយសភាអាមេរិកអនុម័តសេចក្តីស្នើច្បាប់ស្ដីពីស៊ីនជាំង លោកស្រីអ្នកនាំពាក្យចិន Hua Chunyingនិយាយនៅក្នុងវេទិកាមួយ។
× ទីក្រុងប៉េកាំង នៅថ្ងៃទី៤ ខែធ្នូ បានព្រមានចាត់វិធានការតបវិញ បន្ទាប់ពីសភាតំណាងរាស្ត្រអាមេរិក បានអនុម័តក្នុងសម្លេងគាំទ្រយ៉ាងច្រើនលើសលុបលើសេចក្តីស្នើច្បាប់ស្តីពីជនជាតិវីហ្គ័រ។ សេចក្តីស្នើច្បាប់នេះ នឹងបើកផ្លូវឲ្យរដ្ឋាភិបាលអាមេរិក មានសិទ្ធិដាក់ទណ្ឌកម្មទៅលើមន្ត្រីជាន់ខ្ពស់ចិន ដែលមានជាប់ទាក់ទងទៅនឹងការបង្ក្រាបជនជាតិវីហ្គ័រនៅខេត្តស៊ីនជាំងភាគខាងលិច។
ប៉ុន្មានម៉ោងក្រោយប៉ុណ្ណោះ បន្ទាប់ពីសភាតំណាងរាស្ត្រអាមេរិក បានអនុម័តសេចក្តីស្នើច្បាប់ស្តីពីជនជាតិវីហ្គ័រក្នុងសំឡេងដ៏ច្រើនលើសលុបនៅថ្ងៃទី៤ ខែធ្នូ ក្រសួងការបរទេសចិន បានចេញមុខព្រមាន ទីក្រុងវ៉ាស៊ីនតោនយ៉ាងច្បាស់ៗថា៖ «សម្រាប់ពាក្យ និងសកម្មភាពខុសឆ្គងទាំងអស់...តម្លៃទាំងនោះ ត្រូវតែមានការតបស្នង»។ ប៉ុន្តែការព្រមាននេះ ចិនមិនបានបញ្ជាក់ពីវិធានការជាក់លាក់ណាមួយ ដើម្បីឆ្លើយតបទៅនឹងអាមេរិកនោះឡើយ។
នៅក្នុងសេចក្តីថ្លែងការណ៍របស់ខ្លួន អ្នកនាំពាក្យចិនក្រសួងការបរទេសចិន លោកស្រី Hua Chunying បានគូសបញ្ជាក់ថា សេចក្តីស្នើច្បាប់អាមេរិក គឺបំផ្លាញកិច្ចខិតខំប្រឹងប្រែងរបស់ចិន ក្នុងការលុបបំបាត់ចោលភាពជ្រុលនិយម និងការប្រយុទ្ធប្រឆាំងនឹងភេរវកម្ម។
ពាក់ព័ន្ធនឹងបញ្ហានេះថា តើសេចក្តីស្នើច្បាប់ស្តីពីជនជាតិវីហ្គ័រអាចធ្វើឲ្យប៉ះពាល់ដល់ទំនាក់ទំនង ចិន និងអាមេរិកឬទេ? លោកស្រីអ្នកនាំពាក្យ មិនបានបញ្ជាក់ចម្លើយត្រង់ៗតែម្តងឡើយ។ លោកស្រី Hua គ្រាន់តែអះអាងថា វាគ្មានផ្លូវទេ ដែលសេចក្តីស្នើច្បាប់មួយនេះ អាចធ្វើឲ្យប៉ះពាល់ដល់ទំនាក់ទំនងអាមេរិក និងចិន និងកិច្ចសហប្រតិបត្តិការសំខាន់ៗរវាងប្រទេសទាំងពីរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
បន្ទាប់ពីមានការអនុម័តលើច្បាប់ស្តីពីជនជាតិភាគតិចវីហ្គ័រ អនុរដ្ឋមន្ត្រីការបរទេសចិន ឈីន កាង ក៏បានកោះហៅលោក William Klein ភារធារីស្ថានទូតមន្ត្រីប្រចាំប៉េកាំងដើម្បីនិយាយពីបញ្ហានេះ។ ពាក់ព័ន្ធការកោះហៅនេះ អ្នកនាំពាក្យស្ថានទូតអាមេរិក បានចង្អុលបង្ហាញថា ទីក្រុងវ៉ាស៊ីនតោន នៅតែទទូចឲ្យទីក្រុងប៉េកាំង ទម្លាក់ចោលគោលនយោបាយដ៏ព្រៃផ្សៃនេះ ដែលចាត់ទុកប្រជាជនរបស់ខ្លួនក្នុងទឹកដីស៊ីនជាំង ជាភេរវជន។
សូមបញ្ជាក់ថា សភាតំណាងរាស្ត្រអាមេរិក បានអនុម័តលើសេចក្តីស្នើច្បាប់ស្តីពីជនជាតិវីហ្គ័រក្នុងសំឡេងយ៉ាងច្រើនលើសលុប។ ពោលគឺក្នុងសំឡេងស្រប ៤០១ និង ១សំឡេងប្រឆាំង។ បន្ទាប់ពីនេះ សេចក្តីព្រាងច្បាប់ខាងលើ នឹងត្រូវបញ្ជូនទៅព្រឹទ្ធសភាអាមេរិក មុននឹងទៅដល់តុរបស់ប្រធានាធិបតីអាមេរិក ដូណាល់ ត្រាំ។ ប្រសិនបើសេចក្តីស្នើច្បាប់មួយនេះ ចូលជាធរមានមែន វានឹងបើកផ្លូវឲ្យរដ្ឋាភិបាលទីក្រុងវ៉ាស៊ីនតោន ដាក់ទណ្ឌកម្មទៅលើមន្ត្រីជាន់ខ្ពស់ចិន និងការនាំចេញមួយចំនួនទៅប្រទេសចិន៕
Tag:
ចិន
អាមេរិក
វីហ្គ័រ
© រក្សាសិទ្ធិដោយ thmeythmey.com