អន្តរជាតិ
សហរដ្ឋអាមេរិករឹបអូសបានគ្រឿងបន្លាស់មីស៊ីលដែលគេសង្ស័យថាជារបស់អ៊ីរ៉ង់
រូបឯកសារ៖ មីស៊ីលដាក់តាំងនៅពីមុខមេដឹកនាំសាសនាលោក Ayatollah Ali Khamenei នៅក្រុងតេរ៉ង់ ប្រទេសអ៊ីរ៉ង់ កាលពីថ្ងៃទី២៧ ខែកញ្ញា ឆ្នាំ២០១៧។
×![]()
ដោយ: VOA
នាវាទាហានជើងទឹកសហរដ្ឋអាមេរិកបានស្ទាក់រកឃើញ «កន្លែងលាក់ទុកដ៏សំខាន់» មួយនូវអ្វីដែលគេគិតថាជាគ្រឿងបន្លាស់គ្រាប់មីស៊ីលអ៊ីរ៉ង់សម្រាប់បញ្ជូនទៅឲ្យពួកបះបោរនៅក្នុងប្រទេសយេមែន។ នេះបើតាមការបញ្ជាក់របស់មន្ត្រីសហរដ្ឋអាមេរិកកាលពីថ្ងៃពុធម្សិលមិញ។
ទាហានជើងទឹក និងកងកម្លាំងល្បាតសមុទ្រអាមេរិកាំងបានឡើងជិះលើនាវាតូចមួយនៅក្នុងសមុទ្រអារ៉ាប់ភាគខាងជើងកាលពីថ្ងៃពុធសប្ដាហ៍មុន និងបានរឹបអូសអាវុធមួយចំនួន ដែលត្រូវបានគេចាត់ទុកថាមានការពាក់ព័ន្ធជាមួយនឹងអ៊ីរ៉ង់។
រដ្ឋាភិបាលក្រុងវ៉ាស៊ីនតោនបានចោទប្រកាន់ប្រទេសអ៊ីរ៉ង់ជាយូរមកហើយថាបានរត់ពន្ធអាវុធឲ្យពួកឧទ្ទាម Houthi ដែលវាយប្រយុទ្ធគ្នាជាមួយនឹងរដ្ឋាភិបាលយេមែនអស់រយៈពេល ៤ ឆ្នាំកន្លងមក។ ប៉ុន្តែ នេះគឺជាលើកដំបូងហើយដែលអាវុធទំនើបបែបនេះត្រូវបានរឹបអូសនៅពេលដែលកំពុងត្រូវបានគេបញ្ជូនទៅកាន់ប្រទេសយេមែន។
មន្ត្រីអាមេរិកាំងបាននិយាយថា នៅពេលនោះ នាវា USS Sherman កំពុងធ្វើប្រតិបត្តិការជាប្រចាំតាមសមុទ្រ ហើយក៏បានឃើញនាវាឈើតូចមួយដែលមិនមានដោតទង់ជាតិប្រទេសណាមួយ។
បន្ទាប់មក មន្ត្រីអាមេរិកាំងបានបញ្ឈប់ និងឡើងលើនាវានោះរកឃើញអាវុធទាំងនោះ។ លោក Sean Robertson អ្នកនាំពាក្យក្រសួងការពារប្រទេសអាមេរិក បាននិយាយថា «ការស៊ើបអង្កេតដំបូងបានបង្ហាញថា គ្រឿងបន្លាស់មីស៊ីលទំនើបទាំងនេះមានប្រភពមកពីប្រទេសអ៊ីរ៉ង់»។
មន្ត្រីអាមេរិកាំងមិនបានបញ្ជាក់ឲ្យបានច្បាស់ថា អាវុធប៉ុន្មានដែលត្រូវបានរឹបអូសនោះទេ។ អាវុធទាំងនេះ ឥឡូវនេះត្រូវបានផ្ទុកនៅលើនាវាអាមេរិកាំង៕
© រក្សាសិទ្ធិដោយ thmeythmey.com
