ជាតិ
ចិន ចង់បង្កើតមជ្ឈមណ្ឌលបច្ចេកវិទ្យាកសិកម្មតំបន់ត្រូពិចនៅកម្ពុជា និងពង្រីកសក្តានុពលផ្លែដូង
ប្រតិភូក្រុមហ៊ុនចិន និងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបគ្នានាថ្ងៃទី៣ ខែឆ្នូ រូបភាពពីក្រសួងកសិកម្ម រុក្ខាប្រមាញ់ និងនេសាទ
×![]()
ភ្នំពេញ៖ ក្រុមហ៊ុនចិនមានគោលបំណងបង្កើតមជ្ឈមណ្ឌលបច្ចេកវិទ្យាកសិកម្មតំបន់ត្រូពិចកម្ពុជា-ចិន ដើម្បីពង្រីកសក្តានុពលដំណាំដូងនៅកម្ពុជា សម្រាប់នាំចេញទៅក្រៅប្រទេសនាថ្ងៃអនាគត។ គោលបំណងនេះ ត្រូវបានលើកឡើងដោយលោក Wang Yeqiao នាយកគ្រប់គ្រងទូទៅក្រុមហ៊ុន Hainan State Farms Holding Group Co., Ltd នៅចំពោះមុខលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាថ្ងៃទី៤ ខែឆ្នូ។
លោក Wang Yeqiao នាយកគ្រប់គ្រងទូទៅក្រុមហ៊ុន បានបញ្ជាក់ថា មជ្ឈមណ្ឌលបច្ចេកវិទ្យាកសិកម្មនេះ នឹងផ្តល់ជាកន្លែងសិក្សាស្រាវជ្រាវ ផ្សព្វផ្សាយ និងបណ្តុះបណ្តាលបច្ចេកវិទ្យាទំនើបលើការដាំដុះ ប្រមូលផល ផលិតពូជ វិធានការការពារជំងឺ សត្វល្អិត និងកែច្នៃដំណាំត្រូពិច។
មុននឹងលោក Wang Yeqiao ប្រាប់ពីបំណងចង់បង្កើតមជ្ឈមណ្ឌលបច្ចេកវិទ្យាកសិកម្មតំបន់ត្រូពិចនេះ ដោយសារតែក្រុមហ៊ុនចិន បានសិក្សាអំពីសក្តានុពលលើវិស័យកសិកម្មកម្ពុជា ដែលអាចនឹងបង្កើនកិច្ចសហប្រតិបត្តិការរវាងចិន និងកម្ពុជាឲ្យកាន់តែរឹងមាំ និងឋិតថេរ។ ក្រៅពីនេះចិនបានសម្លឹងឃើញវិស័យកសិកម្មនៅកម្ពុជារីកចម្រើន។ បើតាមលោក Wang Yeqiao វិស័យដំណាំដូងនៅកម្ពុជា អាចវិនិយោគជាលក្ខណៈឧស្សាហកម្ម។ ជាពិសេសចិន ក៏ចាប់អារម្មណ៍លើដំណាំស្រូវ ស្វាយ ចេក និងដំឡូងផងដែរ។
លោក Wang Yeqiao បានបញ្ជាក់ដូច្នេះថា៖«ប្រទេសថៃបានធ្វើការនាំចេញផ្លែដូងទៅកាន់ទីផ្សារអន្តរជាតិ ជាពិសេសទីផ្សារចិនរាប់រយលានដុល្លារក្នុងមួយឆ្នាំៗ ដោយឡែកកម្ពុជាមានលក្ខណ:ភូមិសាស្ត្រទឹក ដី និងក្សេត្របរិស្ថានមិនខុសពីប្រទេសថៃ។ ដូច្នេះបើគម្រោងនៃការបង្កើតមជ្ឈមណ្ឌលនេះ ទទួលបានជោគជ័យ នោះកម្ពុជាត្រូវបានគេទទួលស្គាល់លើឆាកអន្តរជាតិកាន់តែច្រើនឡើងតាមរយ:ផលិតផលកសិកម្មតំបន់ត្រូពិច ជាពិសេសដំណាំដូង»។
តាមរយៈគម្រោងបង្កើតមជ្ឈមណ្ឌលបច្ចេកវិទ្យាកសិកម្មនេះ លោក Wang Yeqiao ជឿជាក់ថាផ្លែដូងកម្ពុជា នឹងមានសក្តានុពលនាំចេញទៅកាន់ទីផ្សារចិននាពេលអនាគត។ លោក Wang Yeqiao យល់ឃើញថា កម្ពុជាមានផលិតផលនេះនៅក្នុងដៃហើយ គ្រាន់តែនៅមិនទាន់ត្រូវបានគេឲ្យតម្លៃទៅលើការអនុវត្តបច្ចេកទេសដាំដុះ ប្រមូលផល វេចខ្ចប់ ចងក្រងកំលាំងផលិត និងនាំចេញតែប៉ុណ្ណោះ។ «ប្រសិនបញ្ចូលបច្ចេកទេសដាំដុះសមស្របមួយឲ្យអ្នកផលិត និងរៀបចំក្រុម ឬសហគមន៍ផលិត យើងសង្ឈឹមថាផ្លែដូងនឹងមានទីផ្សារនៅថ្ងៃអនាគតដែលធានាបានបរិមាណ គុណភាព តម្លៃបន្ថែម ការកែច្នៃ និងការប្រកួតប្រជែង»។
ឆន្ទៈបង្កើតសួនបច្ចេកវិទ្យាកសិកម្មដំណាំត្រូពិចកម្ពុជា-ចិន និងការវិនិយោគលើដំណាំដូងនៅកម្ពុជារបស់ខេត្តហាយណាន នេះ វាស្របពេលដែលក្រសួង ក៏ដូចជារាជរដ្ឋាភិបាលបានដាក់ចេញនូវគោលនយោបាយយកចិត្តទុកដាក់លើការងារស្រាវជ្រាវ បណ្តុះបណ្តាល និងផ្សព្វផ្សាយបច្ចេកវិទ្យាកសិកម្មទាន់សម័យដល់អ្នកផលិត ដើម្បីធានាបានបរិមាណ គុណភាព តម្លៃបន្ថែម ការកែច្នៃ ប្រកួតប្រជែង និងមានទីផ្សារនាំចេញ។ នេះជាការបញ្ជាក់របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
បើតាមលោក វេង សាខុន សួនកសិកម្មនេះ មិនគ្រាន់តែជាថ្នាលសាបព្រោះនូវចំណេះដឹងផ្នែកបច្ចេកវិទ្យាកសិកម្មវៃឆ្លាតប៉ុណ្ណោះទេ តែវានឹងជួយប្រាប់ទៅប្រទេសនៅក្នុងតំបន់ និងអន្តរជាតិថា កសិផលកម្ពុជាមានសក្តានុពលសម្រាប់ប្រកួតប្រជែងទីផ្សារនាំចេញ ខណៈរដ្ឋាភិបាលកំពុងអនុវត្តគោលនយោបាយជំរុញការនាំចេញ ផលិតផលកសិកម្ម នាពេលបច្ចុប្បន្ន និងអនាគត។
«ពិតណាស់កម្ពុជាមានសក្តានុពលលើដំណាំនេះ ប្រសិនបើយើងបញ្ចូលបច្ចេកទេសដាំដុះសមស្របមួយឲ្យអ្នកផលិត និងរៀបចំក្រុម ឬសហគមន៍ផលិត។ យើងសង្ឃឹមថាផលិតផលដូងនឹងមានតម្លៃបន្ថែមខ្ពស់ ដោយសារមានតម្រូវការទីផ្សារ»។ នេះជាការបញ្ជាក់របស់រដ្ឋមន្ត្រីកសិកម្ម ដែលបានបន្ថែមថា ក្រសួង នឹងផ្តល់កិច្ចសហការពេញលេញ ដើម្បីជួយសម្រួលដល់ការវិនិយោគ សម្រាប់គម្រោងកិច្ចសហប្រតិបត្តិការនេះ៕
Tag:
ចិន
ដំណាំ
កសិកម្ម
© រក្សាសិទ្ធិដោយ thmeythmey.com
