អន្តរជាតិ
អាមេរិក និងកូរ៉េខាងត្បូង ជជែកគ្នាពីបញ្ហាឧបទ្វីបកូរ៉េ ស្របពេលឱសានវាទកូរ៉េខាងជើងជិតមកដល់
លោកប្រធានាធិបតីកូរ៉េខាងត្បូង មូន ចេអ៊ីន (ខាងឆ្វេង) និងលោកប្រធានាធិបតីអាមេរិក ដូណាល់ ត្រាំ នៅក្នុងជំនួបមួយ ក្នុងអំឡុងពេលមហាសន្និបាតអង្គការសហប្រជាតិកាលពីថ្ងៃទី ២៣ ខែកញ្ញា ឆ្នាំ ២០១៩។ រូបភាព៖ Reuters
×![]()
ដោយ: ធៀន ភារិន្ទ
ប្រធានាធិបតីអាមេរិក ដូណាល់ ត្រាំ និងប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី៧ ខែធ្នូ បានពិភាក្សាជាមួយគ្នា ជុំវិញបញ្ហាការរំសាយកម្មវិធីនុយក្លេអ៊ែរកូរ៉េខាងជើង។ ក្នុងជំនួបពិភាក្សានេះ ប្រមុខរដ្ឋទាំងពីរ បានជជែកគ្នាតាមទូរសព្ទជាង ៣០នាទី ខណៈពេលឱសានវាទរបស់កូរ៉េខាងជើង ជិតដល់ថ្ងៃកំណត់។
ក្នុងសេចក្តីថ្លែងការណ៍របស់វិមានប្រធានាធិបតីកូរ៉េខាងត្បូង ប្រធានាធិបតីអាមេរិក ដូណាល់ ត្រាំ និងប្រធានាធិបតីកូរ៉េខាងត្បូង មូន ចេអ៊ីន បានជឿថា ស្ថានភាពនៅលើឧបទ្វីបកូរ៉េ កាន់តែស្មុគ្រស្មាញជាងមុន។ បើតាមកិច្ចសន្ទនាតាមទូរសព្ទរយៈពេលជាង ៣០នាទីនេះ ប្រធានាធិបតីទាំងពីរ បានលើកឡើងថា កិច្ចចរចារំសាយអាវុធនុយក្លេអ៊ែរទាំងអស់ត្រូវតែរក្សាឲ្យបាន ដើម្បីសន្តិភាពនៅលើឧបទ្វីបកូរ៉េ។ ដោយយល់ឃើញថា ការផ្តោះប្តូរយោបល់ជុំវិញបញ្ហាឧបទ្វីបកូរ៉េ គឺសំខាន់ ដូច្នេះមេដឹកនាំទាំងពីរសម្រេចឲ្យមានកិច្ចសន្ទនាតាមទូរសព្ទនេះបន្ថែមទៀត ប្រសិនបើចាំបាច់។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ជាការពិតណាស់ កិច្ចសន្ទនារវាងថ្នាក់ដឹកនាំកូរ៉េខាងត្បូង និងអាមេរិកនៅពេលនេះ គឺធ្វើឡើងខណៈពេលថ្ងៃឱសានវាទរបស់កូរ៉េខាងជើងជិតមកដល់។ បើតាមឱសានវាទទីក្រុងព្យុងយ៉ាង អាមេរិកត្រូវតែផ្លាស់ប្តូរយុទ្ធសាស្ត្រចាស់ៗ ដែលកូរ៉េខាងជើងមិនពេញចិត្តចេញ បើមិនដូច្នោះទេ កូរ៉េខាងជើងនឹងចាត់វិធានការធំសម្បើមមិនខាន ប៉ុន្តែមិនបានបញ្ជាក់ច្បាស់លាស់ទេថា វិធានការនោះជាអ្វី។
បើទោះបីលោកត្រាំ និងមូន បានចំណាយពេលវេលាជាងកន្លះម៉ោងក៏ដោយ ប៉ុន្តែភាគីទាំងពីរ មិនបាននិយាយពីរឿងវិភាគយោធាឡើយ។ នេះបើតាមការអះអាងរបស់វិមានប្រធានាធិបតីកូរ៉េខាងត្បូង។ ជាការពិត អាមេរិក បានទាមទារឲ្យកូរ៉េខាងត្បូងបង់វិភាគទានយោធាជាង ៤ពាន់លានដុល្លារក្នុងមួយឆ្នាំៗ សម្រាប់មូលដ្ឋានទ័ពអាមេរិក នៅលើទឹកដីកូរ៉េខាងត្បូង។
សូមបញ្ជាក់ថា ភាពតានតឹងនៅលើឧបទ្វីបកូរ៉េ នៅតែបន្តកើតមាន ខណៈពេលកិច្ចព្រមព្រៀងរំសាយកម្មវិធីនុយក្លេអ៊ែរកូរ៉េខាងជើងនៅតែមិនទាន់រកឃើញ។ ជាពិសេសថ្មីៗកន្លងទៅនេះ អាមេរិក និងកូរ៉េជើង បានទាស់សម្តីគ្នាថែមទៀត ជុំវិញបញ្ហាការប្រើពាក្យ «បុរសរ៉ុក្កែត»របស់លោកត្រាំ ៕
Tag:
កូរ៉េខាងជើង
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com
