អន្តរជាតិ
លោក ត្រាំ ព្រមានកូរ៉េខាងជើងថា បើមិនបញ្ឈប់សកម្មភាពអរិភាពទេ ប្រយ័ត្នបាត់បង់អ្វីៗគ្រប់យ៉ាង
មេដឹកនាំកូរ៉េខាងជើង គីម ជុងអ៊ុន (ខាងឆ្វេង) ជាមួយលោកប្រធានាធិបតីអាមេរិកដូណាល់ ត្រាំ នៅតំបន់គ្មានយោធាក្នុងឧបទ្វីបកូរ៉េ កាលពីថ្ងៃទី៣០ ខែមិថុនា ឆ្នាំ២០១៩។ រូបភាព៖ Reuters
×![]()
ដោយ: ធៀន ភារិន្ទ
ប្រធានាធិបតីអាមេរិក ដូណាល់ ត្រាំ នៅថ្ងៃទី៨ ខែធ្នូ បានព្រមានយ៉ាងច្បាស់ៗ ដាក់កូរ៉េខាងជើងថា បើមិនចង់បាត់បង់អ្វីៗគ្រប់យ៉ាងទេ ទីក្រុងព្យុងយ៉ាងត្រូវតែ បញ្ឈប់សកម្មភាពបង្កសង្គ្រាម និងរំសាយកម្មវិធីនុយក្លេអ៊ែរ។ ការចេញមុខមកព្រមានរបស់លោកប្រធានាធិបតីអាមេរិកបែបនេះ គឺធ្វើឡើងបន្ទាប់ពីកូរ៉េខាងជើងបានប្រកាសជោគជ័យលើការសាកល្បងដ៏ធំមួយ។ 
«គីម ជុងអ៊ុន គឺជាមនុស្សឆ្លាតបំផុត និងមានអ្វីជាច្រើនត្រូវបាត់បង់។ គ្រប់យ៉ាងគឺពិតប្រាកដណាស់ ប្រសិនបើគាត់ [គីម ជុងអ៊ុន] នៅតែប្រព្រឹត្តអំពើអរិភាពបែបនេះ»។ នេះបើតាមការសរសេររបស់លោក ដូណាល់ ត្រាំ នៅលើបណ្តាញសង្គមTwitter ដើម្បីព្រមានកូរ៉េខាងជើង។ ការប្រកាសរបស់ប្រធានាធិបតីអាមេរិករូបនេះ ធ្វើឡើងតែប៉ុន្មានម៉ោងប៉ុណ្ណោះ ក្រោយពីទីភ្នាក់ងារព័ត៌មាន KCNA បានចុះផ្សាយថា កូរ៉េខាងជើងបានទទួលជោគជ័យលើការសាកល្បងដ៏ធំមួយ។
បើតាមលោកប្រធានាធិបតីអាមេរិក កូរ៉េខាងជើង បានចុះហត្ថលេខាជាមួយអាមេរិករួចហើយនៅសិង្ហបុរី ជុំវិញកិច្ចព្រមព្រៀងរំសាយកម្មវិធីនុយក្លេអ៊ែរដ៏សំខាន់មួយ។ ប៉ុន្តែលោកត្រាំ មិនបានបញ្ជាក់ថាឡើយថា ទីក្រុងវ៉ាស៊ីនតោន នឹងមានវិធានការបែបណានោះទេ ប្រសិនបើទីក្រុងព្យុងយ៉ាងហ៊ានបំពានកិច្ចព្រមព្រៀងមួយនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
តាមរយៈ Twitter ដដែល លោក ត្រាំ ជឿថា លោកគីម មិនចង់ឲ្យទំនាក់ទំនងពិសេសរវាងមេដឹកនាំទាំងពីរបាក់បែកឡើយ ហើយថែមទាំងមិនហ៊ាន នឹងជ្រៀតជ្រែតចូលមកក្នុងការបោះឆ្នោតអាមេរិកក្នុងឆ្នាំ ២០២០ ថែមទៀត។ ប៉ុន្តែលោកប្រធានាធិបតីអាមេរិក មិនបានបញ្ជាក់ថា ច្បាស់លាស់ទេ ថាតើទំនាក់ទំនងពិសេសរវាងមេដឹកនាំទាំងពីរ គឺជាអ្វីនោះឡើយ។
សូមបញ្ជាក់ថា នាថ្ងៃទី៨ ខែធ្នូ កូរ៉េខាងជើង បានប្រកាសជោគជ័យលើការសាកល្បងដ៏ធំមួយនៅក្នុងមជ្ឈមណ្ឌលបាញ់បង្ហោះផ្កាយរណប Sohae ក្នុងទីតាំងសាកល្បងអាវុធ Tongchang-ri។ ប៉ុន្តែមកទល់ពេលនេះ គេមិនទាន់ដឹងនៅឡើយទេ ថាតើទីក្រុងព្យុងយ៉ាងបានសាកល្បងអាវុធ ឬសំភារៈបច្ចេកទេសអ្វីទេ។ បើតាមអ្នកជំនាញមីស៊ីល កូរ៉េខាងជើងទំនងជាសាកល្បងលើម៉ាស៊ីនបាញ់គ្រាប់រ៉ុក្កែត ច្រើនជាងបាញ់សាកល្បងមីស៊ីល ៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com
