អន្តរជាតិ
ពលរដ្ឋហុងកុងរាប់សែននាក់ ប្រារព្ធខួបកន្លះឆ្នាំនៃការធ្វើបាតុកម្មប្រឆាំងរដ្ឋាភិបាល មនុស្ស៨០ម៉ឺននាក់ បានដើរជាក្បួនពីឧទ្យាន Victoria ក្នុងតំបន់ប្រជុំដ៏ធំ Causeway Bay ឆ្ពោះទៅកាន់តំបន់ Central នៃទីក្រុង ហុងកុង នៅថ្ងៃអាទិត្យ ០៨ ខែធ្នូ ២០១៩ (AFP)
× ពលរដ្ឋហុងកុងរាប់សែននាក់ បានដឹកនាំគ្នាធ្វើសកម្មភាពតវ៉ាតាមដងផ្លូវ កាលពីថ្ងៃអាទិត្យ ០៨ ធ្នូ ដើម្បីប្រារព្ធខួប៦ខែនៃការតវ៉ាប្រឆាំងរដ្ឋាភិបាលលើសំណុំរឿងប្រជាធិបតេយ្យ។ ពួកគេ អះអាងថា ខណៈប្រជាជនហុងកុងបានរួមសាមគ្គីគ្នា និងឈ្នះការគាំទ្រពីសំណាក់អន្តរជាតិ មន្ត្រីរដ្ឋាភិបាលទីក្រុងនេះ នៅតែមិនព្រមផ្តល់តាមការទាមទារពួកគេ ដែលធ្វើឡើងសម្រាប់ប្រយោជន៍ប្រជាធិតេយ្យ។
ចាប់ផ្តើមដំបូងឡើយ ចលនាទាមទាររបស់ពលរដ្ឋហុងកុងនេះ បានធ្វើឡើងដោយអហិង្សា ក៏ប៉ុន្តែរហូតដល់ពេលយប់ បាតុករមួយក្តាប់តូច បានផ្តើមគប់គ្រាប់បែកសាំងទៅលើអគារការិយាល័យរដ្ឋ និងហាងទំនិញនៅក្បែរៗនោះ។ បាតុកម្មនេះបានផ្តើមនៅម៉ោងជាង៤រសៀល ហើយចប់ទៅវិញ នៅម៉ោង ១០យប់។
អ្នករៀបចំការតវ៉ា គឺអង្គការ សិទ្ធិមនុស្សស៊ីវីល (CHRF) បានប៉ាន់ស្មានថា មនុស្ស៨០ម៉ឺននាក់ បានដើរជាក្បួនពីឧទ្យាន Victoria ក្នុងតំបន់ប្រជុំដ៏ធំ Causeway Bay ឆ្ពោះទៅកាន់តំបន់ Central នៃទីក្រុង ហុងកុង ។ យ៉ាងណាមិញ បើតាមការអះអាងរបស់ប៉ូលិស ចំនួនអ្នកចេញតវ៉ា មានត្រឹម ១៨៣ ០០០ នាក់ ប៉ុណ្ណោះ។
តាមការចុះផ្សាយរបស់កាសែតហុងកុង South China Morning Post អ្នកតំណាងអង្គការ CHRF ហុងកុងម្នាក់ លើកឡើងថា៖ «សារនយោបាយនេះ គឺមានន័យច្បាស់លាស់ណាស់។ ប្រជាជនហុងកុង រឹងមាំ ហើយប្រឹងប្រែងតស៊ូជាមួយការទាមទារទាំងប្រាំប្រការ»។ អ្នកតំណាងរូបនេះ ក៏បានទទូចឲ្យលោកស្រី ការី ឡាំ ប្រធានប្រតិបត្តិប្រចាំក្រុងហុងកុង យល់ព្រមតាមសំណើពួកគេ ដែលរួមមាន ការរៀបចំការបោះឆ្នោតសេរី និងជាសកលមួយដើម្បីជ្រើសរើសមេដឹកនាំទីក្រុង និងការបង្កើតគណៈកម្មាធិការឯករាជ្យ ស៊ើបអង្កេតលើសកម្មភាពប៉ូលិសធ្វើមកលើបាតុករ ជាដើម។
មែនទែនទៅ ការចេញតវ៉ានេះ ក៏ដើម្បីរម្លឹកដល់ថ្ងៃសិទ្ធិមនុស្សអន្តរជាតិ ដែលនឹងធ្វើឡើង នាថ្ងៃទី ១០ ធ្នូ ឆ្នាំ២០១៩ ហើយវាក៏បានកើតឡើងមួយថ្ងៃប៉ុណ្ណោះមុនខួបកន្លះឆ្នាំនៃការចាប់ផ្តើមធ្វើបាតុកម្ម ថ្ងៃ៩ មិថុនា។ កាលនោះគេប៉ាន់ស្មានថា មនុស្ស១លាននាក់ បានចូលរួមធ្វើបាតុកម្មតាមដងផ្លូវប្រឆាំងនឹងសំណើច្បាប់បត្យាប័នរបស់រដ្ឋាភិបាលហុងកុង ដែលក្រោយមកទីក្រុងនេះបានសម្រេចចិត្តដកហូតវិញ ក៏ប៉ុន្តែការធ្វើបាតុកម្ម នៅតែមិនបញ្ឈប់ ហើយប្រែក្លាយជាចលនាទាមទារលទ្ធិប្រជាធិបតេយ្យធំឡើងៗ ។
អ្វីដែលគួរឲ្យភ្ញាក់ផ្អើលនោះ បាតុកម្មនៅថ្ងៃអាទិត្យនេះ គឺជាបាតុកម្មលើកដំបូងដែលទទួលបានការអនុញ្ញាតពីប៉ូលិស គិតចាប់ពីខែសីហាមក។ ទោះជាបែបនេះ កងកម្លាំងប៉ូលិស ក៏បានហាមឃាត់បាតុករមួយចំនួន ដោយលើកហេតុផលសុវត្ថិភាព។ តួយ៉ាង ប៉ុន្មានម៉ោងមុនការដើរតវ៉ា ប៉ូលិស បានអះអាងថា ពួកគេបានចាប់មនុស្ស ១១នាក់ និងដកហូតកាំភ្លើងខ្លីមួយគ្រឿង កាំបិទ និងអាវុធផ្សេងទៀត ដ្បិតពួកគេ បារម្ភថា អាវុធទាំងនោះ អាចត្រូវប្រើដើម្បីវាយប្រហារលើមន្ត្រីប៉ូលិស និងអ្នកឆ្លងកាត់។
ក្នុងសេចក្តីថ្លែងការណ៍ដាច់ដោយឡែកពីគ្នា រដ្ឋាភិបាលហុងកុង, ក្រសួងយុត្តិធម៌ និងប៉ូលិស បានថ្កោលទោសការវាយប្រហារនេះ ដោយបញ្ជាក់ថា បាតុករទាំងនោះ បង្កបញ្ហាប្រឈមធ្ងន់ធ្ងរដល់នីតិរដ្ឋរបស់ទីក្រុង។ ត្រង់នេះ អ្នកនាំពាក្យរដ្ឋាភិបាលហុងកុងម្នាក់ បាននិយាយថា ចំពោះអ្នកណាដែលធ្វើឲ្យប្រព័ន្ធតុលាការខូចខាត សង្គមនឹងមិនទទួលយកពួកគេ ហើយរដ្ឋាភិបាលដាក់ចេញការថ្កោលទោសខ្លាំងលើពួកគេ៕
© រក្សាសិទ្ធិដោយ thmeythmey.com