អន្តរជាតិ
ប្រធានាធិបតីរុស្ស៊ី និងអ៊ុយក្រែន ជួបតទល់លើកដំបូងលើបញ្ហាទឹកដីអ៊ុយក្រែនភាគខាងកើត ប្រធានាធិបតីរុស្ស៊ី វ្លាឌីមៀ ពូទីន (ខាងឆ្វេង), និងប្រធានាធិបតីអ៊ុយក្រែនVolodymyr Zelensky ។ រូបភាព៖ UNIAN
× ប្រធានាធិបតីរុស្ស៊ី វ្ល៉ាឌីមៀ ពូទីន គ្រោងជួបលោក Volodymyr Zelensky ប្រធានាធិបតីអ៊ុយក្រែន ជាលើកដំបូង ជុំវិញបញ្ហាជម្លោះនៅភាគខាងកើតអ៊ុយក្រែន ថ្ងៃទី៩ ខែធ្នូ។ ជំនួបរវាងមេដឹកនាំទាំងពីរ ធ្វើឡើងបន្ទាប់ពីទំនាក់ទំនងការទូតរវាងរុស្ស៊ី និងអ៊ុយក្រែន បានជួបបញ្ហាចម្រូងចម្រាសយ៉ាងខ្លាំងចាប់តាំងពីឆ្នាំ ២០១៤ មកម្លេះ។ ពោលគឺចាប់តាំងពីរុស្ស៊ីលេបត្របាក់ទឹកដីគ្រីមៀពីអ៊ុយក្រែន។
ប្រសិនបើគ្មានការប្រែប្រួលទេ ប្រធានាធិបតីបារាំង អេម៉ានុយអែល ម៉ាក្រុង និងអធិការបតីអាល្លឺម៉ង់ អែនជែឡា មឺហ្គែល នឹងធ្វើជាអន្តរការី ក្នុងជំនួបរវាង លោកវ្ល៉ាឌីមៀ ពូទីន ប្រធានាធិបតីរុស្ស៊ី និងសមភាគីអ៊ុយក្រែន លោក វ៉ូឡូឌីមៀ ហ្សេលីនស្គី ។ តាមរយៈជំនួបមួយនេះ អ្នកការទូតមួយចំនួន រំពឹងថា វានឹងជួយបង្កើនភាពជឿទុកចិត្តគ្នា រវាងលោក ពូទីន និង លោក Zelensky ច្រើនជាងមុន ប៉ុន្តែជំនួបនេះ នឹងមិនអាចបង្កើតកិច្ចព្រមព្រៀងសន្តិភាពណាមួយឡើយ។
យ៉ាងណាក៏ដោយ មកទល់ពេលនេះ គេមិនទាន់ដឹងច្បាស់នៅឡើយទេ ថាតើកម្មវត្ថុអ្វី ដែលមេដឹកនាំទាំងពីរ នឹងលើកយកទៅពិភាក្សាជាមួយគ្នា។ ប៉ុន្តែបើតាមប្រភពពីវិមានប្រធានាធិបតីបារាំង កម្មវត្ថុនៃជំនួបរវាងមេដឹកនាំប្រទេសទាំងពីរ ទំនងជាមានដូចជា ការបំបែកក្រុមសកម្មប្រយុទ្ធខុសច្បាប់ ការដកក្រុមអ្នកប្រយុទ្ធបរទេសចេញពីតំបន់ Donetsk និងតំបន់ Lugansk ជាដើម។
ចំណែកបញ្ហាទឹកដីគ្រីមៀ រុស្ស៊ីនឹងមិនលើកយកទៅដាក់នៅតុចរចាឡើយ បើទោះបីជាមានទណ្ឌកម្មពីសហគមន៍អន្តរជាតិក៏ដោយ ខណៈពេលអ៊ុយក្រែន នៅតែមិនបោះបង់មហិច្ឆតារបស់ខ្លួន ក្នុងការដណ្តើមយកទឹកដីមួយនេះមកវិញដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
យ៉ាងណាមិញ គេនៅតែមើលឃើញថា ជំនួបខាងលើនៅតែសំខាន់។ ជាក់ស្តែងបើតាម សម្តីរបស់ប្រមុខការទូតអាល្លឺម៉ង់ Heiko Maas ប្រាប់កាសែត Funke អាល្លឺម៉ង់នឹងធ្វើគ្រប់បែបយ៉ាង ដើម្បីដំណើរការសន្តិភាពនៅក្នុងប្រទេសអ៊ុយក្រែន។ ជាមួយគ្នានេះដែរ លោក Maas បានចាត់ទុកបញ្ហានៅអ៊ុយក្រែនថា «ដំបៅនៅក្នុងទ្វីបអឺរ៉ុប»។
ជំនួបរវាងមេដឹកនាំប្រទេសទាំងពីរនៅក្នុងប្រទេសបារាំង គឺជាលើកទីដំបូងហើយ ក្នុងរយៈពេល ៣ឆ្នាំកន្លងមកនេះ និងជាកិច្ចស្វែងរកឲ្យមានការអនុវត្តលើ កិច្ចព្រមព្រៀង ដែលត្រូវបានចុះហត្ថលេខានៅទីក្រុង Minsk ក្នុងឆ្នាំ ២០១៥។ កិច្ចព្រមព្រៀងទីក្រុងMinsk ឆ្នាំ ២០១៥នេះ គឺជាកិច្ចព្រមព្រៀង ដែលអំពាវនាវឲ្យដកអាវុធធុនធ្ងន់ ការរៀបចំការបោះឆ្នោតក្នុងតំបន់ ការបង្កើនស្វយ័តភាពធំជាងមុន និងការអនុញ្ញាតឲ្យរដ្ឋាភិបាលអ៊ុយក្រែងគ្រប់គ្រងព្រំដែនរបស់ខ្លួនឡើងវិញ។
សូមបញ្ជាក់ថា បន្ទាប់ពីរុស្ស៊ីលេបត្របាក់យកទឹកដីគ្រីមៀពីអ៊ុយក្រែន ក្រុមអ្នកផ្តាច់ទឹកដី បានដណ្តើមគ្រប់គ្រងទឹកដីភាគខាងកើតអ៊ុយក្រែន ដែលមានដូចជាតំបន់ Donetsk និងទីក្រុង Lugansk ជាដើម៕
Tag:
ពូទីន
រុស្ស៊ី
អ៊ុយក្រែន
© រក្សាសិទ្ធិដោយ thmeythmey.com