ជាតិ
ព័ត៍មានសុខភាព
សុខភាព
២៥ខេត្ត/រាជធានី
ចក្ខុបណ្ឌិត ហ៊ិន ដន៖«ជំងឺទឹកដក់ក្នុងភ្នែកព្យាបាលមិនជា តែអាចទប់ស្កាត់កុំឲ្យពិការភ្នែក»
× ភ្នំពេញ៖ «ជំងឺទឹកដក់ក្នុងភ្នែក» ជាជំងឺដែលបំផ្លាញគំហើញភ្នែកយ៉ាងស្ងប់ស្ងាត់ ដែលធ្វើឲ្យការមើលឃើញថយចុះបន្តិចម្ដងៗ ឬអាចធ្វើឲ្យពិការភ្នែកភ្លាមៗ។ លោកវេជ្ជបណ្ឌិត ហ៊ិន ដន ស្ថាបនិកគ្លីនិកភ្នែកប្រាយសាយ បានឲ្យដឹងថា ជំងឺទឹកដក់ក្នុងភ្នែកមានពីរប្រភេទ គឺប្រភេទមុំបិទនិងមុំបើក។ ប្រភេទមុំបិទ ធ្វើឲ្យអ្នកជំងឺឈឺចុកចាប់ត្រង់គ្រាប់ភ្នែក ក្បាល និងក្អួតចង្អោរ ចំណែកប្រភេទមុំបើក ធ្វើឲ្យអ្នកជំងឺមើលឃើញកាន់តែច្បាស់ តែយូរៗទៅនឹងធ្វើឲ្យភ្នែកអ្នកជំងឺងងឹតភ្លាមៗតែម្ដង។ លោកវេជ្ជបណ្ឌិតបន្តថា ជំងឺនេះមិនអាចព្យាបាលឲ្យត្រឡប់ដូចដើមទេ តែអាចព្យាបាលទប់ស្តាត់មិនឲ្យគំហើញភ្នែកខូចលឿនជាងមុន និងវិវត្តទៅមុខទៀត។
សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានថ្មីៗ ជាមួយចក្ខុបណ្ឌិត ហ៊ិន ដន ដូចតទៅ៖
ក្នុងបទសម្ភាសជាមួយសារព័ត៌មានថ្មីៗ លោកវេជ្ជបណ្ឌិត ឯកទេសភ្នែក រូបនេះ បានរៀបរាប់ថា ជំងឺនេះជាប្រភេទជំងឺរ៉ាំរ៉ៃ ដែលលួចគំហើញភ្នែកបន្តិចម្ដងៗ រហូតអាចធ្វើឲ្យអ្នកជំងឺប្រឈមនឹងការពិការភ្នែក និងមិនអាចមានវិធីណាព្យាបាលឲ្យជាសះស្បើយដូចដើមវិញទេ តែអាចព្យាបាលទប់ស្កាត់មិនឲ្យវាវិវត្តទៅមុខលឿន។ លោកវេជ្ជបណ្ឌិត ហ៊ិន ដន បានបញ្ជាក់ដូច្នេះថា៖«ព្យាបាលទាំងប្រើថ្នាំ ទាំងបាញ់ឡាស៊ែ ទាំងវះកាត់ ពេលដែលជំងឺហ្នឹងខូចខាតដល់ត្រឹមណា យើងទៅបញ្ឈប់ការធ្វើដំណើរវាត្រឹមហ្នឹង ឬយើងបង្អន់វាកុំឲ្យលឿន រហូតអ្នកជំងឺពិការភ្នែកទាំងស្រុង។ បើសិនជា យើងមិនបានព្យាបាលវានឹងធ្វើឲ្យសម្ពាធទឹកក្នុងភ្នែកឡើងខ្លាំង យូរទៅខូចទៅៗ តែបើយើងដោះស្រាយវាត្រឹមហ្នឹង អ្នកជំងឺអាចមើលឃើញត្រឹមហ្នឹង»។
ជំងឺទឹកដក់ក្នុងភ្នែក ភាគច្រើនកើតលើមនុស្សមានវ័យ៤០ឆ្នាំឡើងទៅ។ ទោះបី ជំងឺនេះភាគច្រើនកើតលើមនុស្សមានវ័យចាស់ក៏ដោយ តែវាជាប្រភេទជំងឺតំណពូជដែលកុមារក៏អាចកើតជំងឺនេះបានផងដែរ៕
Tag:
ជំងឺ
ទឹកដក់ភ្នែក
សុខភាព
© រក្សាសិទ្ធិដោយ thmeythmey.com