យន្តហោះយោធាស៊ីលី១គ្រឿងមាន៣៨នាក់ បាត់ដាននៅតាមផ្លូវទៅតំបន់អង់តាក់ទិច

អន្តរជាតិ

យន្តហោះយោធាស៊ីលី១គ្រឿងមាន៣៨នាក់ បាត់ដាននៅតាមផ្លូវទៅតំបន់អង់តាក់ទិច

10, Dec 2019 , 4:12 pm

រូបភាព

ដោយ:

យន្តហោះយោធារបស់ប្រទេសស៊ីលីមួយគ្រឿង ដែលដឹកមនុស្សសរុប៣៨នាក់ បានបាត់ដានចេញពីរ៉ាដា ខណៈកំពុងហោះហើរឆ្ពោះទៅកាន់តំបន់អង់តាក់ទិច។ នេះបើតាមសេចក្តីថ្លែងការណ៍របស់កងទ័ពអាកាសស៊ីលី។

យន្តហោះដឹកជញ្ជូនមួយគ្រឿងប្រភេទ Hercules C-130 បានហោះចេញពីទីក្រុង Punta Arenas នៅវេលាម៉ោង ១៦៖៥៥ (ម៉ោងក្នុងស្រុក) ហើយអ្នកប្រតិបត្តិការ បានបាត់ការទាក់ទងភ្លាមៗក្រោយពីម៉ោង ១៨៖០០ នៅថ្ងៃចន្ទ ៨ ខែធ្នូ ។ បើតាមកងកម្លាំងដែនអាកាសស៊ីលី អ្នកដែលបាត់ខ្លួនទាំងនោះ គឺមាន បុគ្គលិកបម្រើការលើយន្តហោះ ១៧នាក់ និងអ្នកដំណើរ ២១នាក់។

គោលដៅនៃការធ្វើដំណើរនេះ គឺដើម្បីផ្តល់ការគាំទ្រផ្នែកដឹកជញ្ជូន (logistical support) ទៅកាន់មូលដ្ឋានយោធាមួយលើកោះ King George របស់តំបន់អង់តាក់ទិច។ បើតាមរបាយការណ៍ចុងក្រោយ បេសកកម្មស្វែងរកនិងជួយសង្គ្រោះ កំពុងចាប់ផ្តើម។

ប្រាប់សារព័ត៌មានក្នុងស្រុក ឧត្តមសេនីយ៍កងទ័ពជើងអាកាស Eduardo Mosqueira គូសបញ្ជាក់ថា យន្តហោះនេះ ពុំបានដំណើរការសញ្ញាប្រកាសអាសន្នណាមួយឡើយ។ លោក បន្តថា យន្តហោះនេះ ដែលមានអ្នកបើកបរយន្តហោះជាមនុស្សមានជំនាញយូរឆ្នាំ ប្រហែលជាត្រូវបង្ខំឲ្យចុះចត ក្រោយពីអស់ប្រេងឥន្ធនៈ។

ក្នុងសេចក្តីថ្លែងការណ៍មួយ កងទ័ពជើងអាកាសស៊ីលី បានបញ្ជាក់ថា យន្តហោះនេះ បានធ្វើដំណើរបានរយៈចម្ងាយ ៧២៤គីឡូម៉ែត្រ នៅពេលវាបាត់បង់ការទាក់ទង ខណៈចម្ងាយធ្វើដំណើរសរុបទៅដល់តំបន់អង់តាក់ទិច គឺស្មើនឹង ១២៣៩គីឡូម៉ែត្រ ។ គិតគូរត្រឹមចម្ងាយនេះ វា ស្ថិតក្នុងតំបន់ Drake Passage ដែលភ្ជាប់មហាសមុទ្រពីរគឺ មហាសមុទ្រអាត្លង់ទិក ភាគខាងត្បូង និងមហាសមុទ្រប៉ាស៊ីហ្វិកភាគខាងត្បូង ហើយទីតាំងនេះដែរ ត្រូវស្គាល់ថាមានលក្ខខណ្ឌអាកាសធាតុមិនអំណោយផលឡើយ។ ក៏ប៉ុន្តែកងទ័ពអាកាសស៊ីលី អះអាងថា អាកាសធាតុក្នុងស្រុក គឺមានលក្ខណៈល្អ នៅពេលដែលយន្តហោះនេះបាត់ដាន៕

ប្រទេសស៊ីលី គ្រប់គ្រងដែនអធិបតេយ្យភាពក្នុងតំបន់អង់តាក់ទិចប្រមាណ ១,២លានគីឡូម៉ែត្រការ៉េ ដែលជាប់ព្រំដែនជាមួយទឹកដីរបស់ទាមទារយកដោយចក្រភពអង់គ្លេស និងអាហ្សង់ទីន។ ជាមួយទឹកដីទំហំនេះ ស៊ីលី ដាក់មូលដ្ឋានទ័ពចំនួន៩ទីតាំង៕