អន្តរជាតិ
មេដឹកនាំកូរ៉េខាងត្បូង-ចិន-ជប៉ុន នឹងបើកជំនួបត្រីភាគីដើម្បីដោះស្រាយបញ្ហាសន្តិសុខតំបន់ ប្រធានាធិបតីកូរ៉េខាងត្បូង នៅក្នុងកិច្ចប្រជុំមួយក្នុងទឹកដីកូរ៉េខាងត្បួង។ រូបភាព៖ Facebook Moon Jae In
× ប្រធានាធិបតីកូរ៉េខាងត្បូង មូន ចេអ៊ីន នឹងទៅចូលរួមក្នុងកិច្ចប្រជុំត្រីភាគីប្រចាំឆ្នាំ កូរ៉េខាងត្បូង ជប៉ុន និងចិន ដែលនឹងប្រព្រឹត្តឡើងចាប់ពីថ្ងៃទី ២៣ ដល់ថ្ងៃទី២៤ ខែធ្នូខាងមុខ។ នេះបើតាមសេចក្តីប្រកាសរបស់វិមានប្រធានាធិបតីCheong Wa Dae នៅថ្ងៃទី១០ ខែធ្នូ។
បើសិនបើគ្មានការប្រែប្រួលទេ លោក មូន ចេអ៊ីន ប្រធានាធិបតីកូរ៉េខាងត្បូង នឹងធ្វើដំណើរទស្សនកិច្ចទៅទីក្រុងឆឹងទូភាគនិរតីនៃប្រទេសចិន នៅថ្ងៃទី២៣ ខែធ្នូ ដើម្បីទៅចូលរួមកិច្ចប្រជុំត្រីភាគីជាមួយ នាយករដ្ឋមន្ត្រីចិន លី ខឺឈាំង និង នាយករដ្ឋមន្ត្រីជប៉ុន ស៊ិនហ្សូ អាបេ។
អ្នកស្រី គូ មីនជុង (Ko Min-jung) អ្នកនាំពាក្យវិមានប្រធានាធិបតីកូរ៉េខាងត្បូង បានលើកឡើងនៅក្នុងសន្និសីទសារព័ត៌មានថា វត្តមានរបស់លោកប្រធានាធិបតីកូរ៉េ នាជំនួបត្រីភាគី ក្នុងប្រទេសចិនខាងមុខនេះ នឹងផ្តោតសំខាន់ទៅលើកិច្ចសហប្រតិបត្តិការរវាងប្រទេសទាំងបី ចិន កូរ៉េខាងត្បូង និងជប៉ុន។ ជាមួយគ្នាដែរ អ្នកនាំពាក្យរូបនេះ បានបន្តថា ជំនួបមេដឹកនាំជាន់ខ្ពស់ចិន កូរ៉េខាងត្បូង ជប៉ុន នឹងពិភាក្សាយ៉ាងស៊ីជម្រៅស្តីពីសន្តិសុខនៅក្នុងតំបន់ ជាពិសេសបញ្ហាកូរ៉េខាងជើង។
ក្នុងន័យនេះ លោកមូន ចេអ៊ីន, លោក លី ខឺឈាំង និងលោក ស៊ិនហ្សូ អាបេ នឹងវាយតម្លៃពីស្ថានការណ៍នៅលើឧបទ្វីបកូរ៉េ។ បន្ទាប់ពីមានការវាយតម្លៃស្ថានការណ៍រួចហើយ ប្រទេសទាំងបី នឹងសហការជាមួយគ្នា ដើម្បីរំសាយកម្មវិធីនុយក្លេអ៊ែរកូរ៉េខាងជើង និងចូលរួមស្ថាបនាសន្តិភាពនៅលើឧបទ្វីបកូរ៉េជានិរន្តរ៍ ។
ក្រៅពីជំនួបត្រីភាគី លោកមូន ក៏គ្រោងនឹងមានជំនួបក្រៅផ្លូវការទ្វេភាគីជាមួយនាយករដ្ឋមន្ត្រីជប៉ុន អាបេ នៅទីក្រុងឆឹងទូ និងប្រធានាធិបតីចិន ស៊ី ជិនភីង នៅទីក្រុងប៉េកាំងផងដែរ។
សូមបញ្ជាក់ថា ភាពតានតឹងនៅលើឧបទ្វីបកូរ៉េ កាន់តែក្តៅឡើងៗ បន្ទាប់ពីកូរ៉េខាងជើង បានសាកល្បងមីស៊ីល ជើងទម្របាញ់គ្រាប់រ៉ុក្កែត និងកម្មវិធីថ្មីៗជាបន្តបន្ទាប់ ខណៈពេលកិច្ចចរចារំសាយកម្មវិធីនុយក្លេអ៊ែរ ត្រូវបរាជ័យជាច្រើនលើក៕
Tag:
មូន ចេអ៊ីន
កូរ៉េខាងត្បូង
ចិន
ជប៉ុន
© រក្សាសិទ្ធិដោយ thmeythmey.com