វិធីសាស្ត្រងាយៗ សម្រាប់ធ្វើជីកំប៉ុស្តទឹក ស្រោចដំណាំ

ពីនេះ ពីនោះ

វិធីសាស្ត្រងាយៗ សម្រាប់ធ្វើជីកំប៉ុស្តទឹក ស្រោចដំណាំ

29, Jan 2022 , 6:39 pm

រូបភាព

ដោយ: ផាត ដាណេ

ភ្នំពេញ៖ ជីកំប៉ុស្ត ជាប្រភេទជីធម្មជាតិម្យ៉ាងដែលកសិករអាចធ្វើដោយខ្លួនឯង សម្រាប់ស្រោចស្រពលើដំណាំ។ ក្នុងការធ្វើជីកំប៉ុស្តលោកអ្នកត្រូវមានគ្រឿងផ្សំដូចជា ស្ករត្នោត, លាមកមាន់, កូនត្រី, ទឹកនោមគោ, ស្លឹកស្ដៅ, ទន្ទ្រានខែត្រស្រស់ និងកាកសំណល់ផ្ទះបាយ។

ក្នុងការផ្សំគ្រឿងសម្រាប់ធ្វើជីកំប៉ុស្តលោកអ្នកត្រូវមាន ស្ករត្នោតចំនួន ៣គីឡូក្រាម, លាមកមាន់ចំនួន ១០គីឡូក្រាម, កូនត្រី ២៤គីឡូក្រាម, ទឹកនោមគោ ៥លីត្រ, ស្លឹកស្ដៅ និងទន្ទ្រានខែត្រស្រស់ចិញ្ច្រាំឲ្យម៉ត់ចំនួន ១០គីឡូក្រាម និងកាកសំណល់ផ្ទះបាយ។ បន្ទាប់ពីមានគ្រឿងផ្សំគ្រប់ ត្រូវយកដាក់លាយបញ្ចូលគ្នាក្នុងពាងចំណុះ ៣០០លីត្រ និងបន្ថែមទឹកធម្មតាឲ្យពេញពាង រួចបិទគម្របឲ្យជិតទុកក្រោមដើមឈើរយៈពេល ២-៣ថ្ងៃកូរម្ដង។

បន្ទាប់ពីផ្សំបានរយៈពេល ២០-៣០ថ្ងៃ លោកអ្នកអាចយកទៅប្រើប្រាស់បានលើដំណាំគ្រប់ប្រភេទ។ ក្នុងការប្រើ លោកអ្នកត្រូវប្រើតាមដំណាក់កាលនៃដំណាំផងដែរ។ ដំណាក់កាលទី១ បើប្រើជាមួយប្រភេទស្ពៃ គឺប្រើនៅពេលស្ទូងកូនដំណាំបាន ១សប្ដាហ៍ ដាក់ជីកំប៉ុស្តទឹកត្រឹមចំនួន ០.៣លីត្រ ជាមួយទឹកធម្មតាចំនួន ១០លីត្រ រួចស្រោចលើដំណាំ។

ក្នុងដំណាក់កាលទី២ នៅពេលកូនដំណាំស្ទូងបានចំនួន ១០ថ្ងៃ ត្រូវប្រើជីកំប៉ុស្តទឹកចំនួន ០.៥លីត្រលាយជាមួយទឹកធម្មតាចំនួន ១០លីត្រ រួចស្រោចទៅលើកូនដំណាំរយៈពេល ៣ថ្ងៃ។ ក្រោយកូនដំណាំស្ទូងបាន ១៩ថ្ងៃគឺជាដំណាក់កាលទី៣ ដែលត្រូវលាយជីកំប៉ុស្តទឹកចំនួន ០.៧លីត្រ ជាមួយទឹកធម្មតា ១០លីត្រ រួចស្រោចលើដំណាំរយៈពេល ២ថ្ងៃម្ដង។

សូមបញ្ជាក់ថា លោកអ្នកត្រូវផ្អាកស្រោចជីកំប៉ុស្តទឹកនេះ មុនពេលប្រមូលផលចំនួន ៧ថ្ងៃ ដើម្បីកុំឲ្យប៉ះពាល់គុណភាពដំណាំ ឬសុខភាពអ្នកបរិភោគ៕

(សារព័ត៌មានថ្មីៗដកស្រង់ចេញពីសៀវភៅកសិករជោគជ័យនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា)