ជាតិ
អត្ថបទពាណិជ្ជកម្ម
សមាគមអ្នកជំនាញអចលនទ្រព្យកម្ពុជា បាននិងកំពុងរួមចំណែកអភិវឌ្ឍន៍វិស័យអចលនទ្រព្យនៅកម្ពុជា
× បច្ចុប្បន្ននេះ វិស័យអចលនទ្រព្យ បាននឹងកំពុងដើរតួនាទីយ៉ាងសំខាន់ នៅក្នុងការអភិវឌ្ឍន៍សេដ្ឋកិច្ចកម្ពុជា ដែលជាក់ស្តែងការរីកចម្រើននៃវិស័យនេះ គឺបាននិងកំពុងទាក់ទាញការវិនិយោគ ពីសំណាក់វិនិយោគិនជាតិ និងអន្តរជាតិ។ ជាមួយគ្នានេះ វត្តមានរបស់សមាគមអ្នកជំនាញអចលនទ្រព្យកម្ពុជា ដែលបង្កើតឡើងតាំងពីឆ្នាំ២០១៦ គឺដើម្បីចូលរួមចំណែកក្នុងតម្រូវការ នៃការបណ្តុះបណ្តាលវិជ្ជាជីវៈ និងជំនាញផ្នែកអចលនទ្រព្យ ក៏ដូចជាក្នុងគោលបំណងពង្រីកការសហការ ក្នុងការវិនិយោគ និងអភិវឌ្ឍន៍វិស័យអចលនទ្រព្យនៅកម្ពុជា។
កម្មវិធី រាត្រីជួបជុំសមាជិកសមាគមអ្នកជំនាញអចលនទ្រព្យកម្ពុជា កាលពីថ្ងៃទី៧ ខែធ្នូ ឆ្នាំ២០១៩កន្លងថ្មីៗនេះ បានរៀបចំឡើង ដើម្បីជាការអបអរសាទរ ដល់ការសម្រេចបាននូវលទ្ធផលគួរជាទីមោទក ក្នុងការបោះឆ្នោតជ្រើសរើសប្រធានក្រុមប្រឹក្សាភិបាល និងប្រធានសមាគមអ្នកជំនាញអចលទ្រព្យកមម្ពុជាសម្រាប់អាណត្តិថ្មី ២០២០។
លោក ផៃ ប៊ុនឈឿន រដ្ឋលេខាធិការប្រចាំការ ក្រសួងបរិស្ថាន បានមានប្រសាសន៍ថា កម្មវិធីជួបជុំសមាគមអ្នកជំនាញអចលនទ្រព្យកម្ពុជា គឺជាផ្នែកមួយក្នុងការចូលរួមចែករំលែកនូវចំណេះដឹង និងបទពិសោធន៍ ក៏ដូចជាការផ្លាស់ប្តូរគំនិតយោបល់នានា ដើម្បីបង្កើននូវទំនាក់ទំនងល្អរវាងគ្នានិងគ្នា ផ្នែកធុរកិច្ចនៅលើវិស័យអចលនទ្រព្យ ដោយបានដាក់ចេញនូវកម្មវិធីជាច្រើន ក្នុងបំណងបង្កើនការលើទឹកចិត្តដល់អ្នកដែលមានជំនាញ ផ្នែកកអចលនទ្រព្យ ក៏ដូចជាចូលរួមចំណែកអភិវឌ្ឍន៍សេដ្ឋកិច្ចជាតិ ស្របតាមគោលនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។
លោកស្រី ចេវ សុឃុន អគ្គនាយិកាក្រុមហ៊ុនអចលនទ្រព្យ ខេត អេបប្រេស៊ល ខូអ៊ិលធីឌី (KAT Appraisal Co,.Ltd) បានជាប់ឈ្មោះជាប្រធានសមាគមអ្នកជំនាញអចលនទ្រព្យកម្ពុជា អាណត្តិទី៣ សម្រាប់ឆ្នាំ២០២០ខាងមុខ។ ប្រធានសមាគមថ្មីរូបនេះ បានប្តេជ្ញាថា នឹងខិតខំប្រឹងប្រែងដឹកនាំសមាគមននេះឲ្យកាន់តែរីកចម្រើន ក៏ដូចជានាំសមាគមទៅលើឆាកអន្តរជាតិផងដែរ។
សូមបញ្ជាក់ថា សម្រាប់បេក្ខភាពដែលឈរឈ្មោះបោះឆ្នោតជាប្រធានសមាគមអ្នកជំនាញអចលនទ្រព្យកម្ពុជាអាណត្តិទី៣ ឆ្នាំ២០២០ មានចំនួន២រូប គឺលោកស្រី ចេវ សុឃុន អគ្គនាយិកាក្រុមហ៊ុនអចលនទ្រព្យ ខេត និង លោក ចក់ ស៊ីណាត អគ្គនាយកក្រុមហ៊ុនអចលនទ្រព្យ ក្រាទី រៀលធី ខូអ៊ិលធីឌី (Kraty Realty Co,. Ltd)។ នៅក្នុងការបោះឆ្នោតនេះដែរ លោក ឃាង ពុទ្ធី ដែលជាអតីប្រធានសមាគមអ្នកជំនាញអចលនទ្រព្យកម្ពុជា អាណត្តិទី២ ជាប់ឈ្មោះជាប្រធានក្រុមប្រឹក្សាភិបាលនៅក្នុងអាណត្តិទី៣ផងដែរ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com