អន្តរជាតិ
អាមេរិកបន្ថែមទណ្ឌកម្មលើប្រមុខយោធាមីយ៉ាន់ម៉ា ខណៈអ្នកស្រី ស៊ូជី កំពុងតតាំងក្តីនៅឡាអេ លោកស្រីអ៊ុងសាន ស៊ូជី ទីប្រឹក្សារដ្ឋ និងរដ្ឋមន្រ្តីក្រសួងការបរទេស មានវត្តមាននៅតុលាការយុត្តិធម៌អន្តរជាតិទីក្រុងឡាអេ ហូឡង់, រូបភាព៖ AFP
× អាមេរិក នៅថ្ងៃទី១០ ខែធ្នូ បានដាក់ទណ្ឌកម្មទៅលើអគ្គមេបញ្ជាការយោធា មីន អ៊ុងឡាំង (Min Aung Hlaing) និងមន្ត្រីយោធាជាន់ខ្ពស់បីរូបទៀត ខណៈពេលលោកស្រីអ៊ុងសាន ស៊ូជី បានឡើងទៅតតាំងរឿងក្តីនៅតុលាការយុត្តិធម៌អន្តរជាតិ នាទីក្រុងឡាអេ ប្រទេសហូឡង់ ទាក់ទងទៅនឹងសំណុំរឿង ឧក្រិដ្ឋកម្មប្រល័យពូជាសាសន៍ជនជាតិភាគតិចរ៉ូហ៊ីងយ៉ា។
នាថ្ងៃសិទ្ធិមនុស្សអន្តរជាតិ ១០ ធ្នូ តុលាការយុត្តិធម៌អន្តរជាតិ បានបើកសវនាការជាលើកដំបូង ជុំវិញការបង្ក្រាបលើជនជាតិភាគតិចរ៉ូហ៊ីងយ៉ា។ ក្នុងសវនាការមួយនេះ លោកស្រីអ៊ុងសាន ស៊ូជី រដ្ឋមន្ត្រីក្រសួងការបរទេស និងជាទីប្រឹក្សារដ្ឋមីយ៉ាន់ម៉ា បានដឹកនាំក្រុមការងារដោយផ្ទាល់ ដើម្បីទៅតតាំងរឿងក្តីនៅតុលាការអន្តរជាតិទីក្រុងឡាអេជាមួយប្រទេសហ្គំប៊ី ដែលតំណាងឲ្យក្រុមប្រទេសកិច្ចសហប្រតិបត្តិការឥស្លាមទាំង ៥៧ប្រទេស។
ក្នុងអង្គសវនាការនាទីក្រុងឡាអេ លោក Abubacarr Tambadou រដ្ឋមន្ត្រីយុត្តិធម៌ហ្គំប៊ី បានប្រាប់ចៅក្រមនៅថ្ងៃទី១០ ខែធ្នូថា មីយ៉ាន់ម៉ា គួរតែបញ្ឈប់សកម្មភាពសម្លាប់រង្គាល ការប្រព្រឹត្តអំពើអមនុស្សធម៌ និងអំពើប្រល័យពូជសាសន៍លើជនជាតិរបស់ខ្លួន។ លោករដ្ឋមន្ត្រី បានបន្តទៀតថា ដោយសារតែគ្មានវិធានការទប់ស្កាត់បទល្មើសទាំងនេះ មនុស្សជាច្រើនត្រូវបានសម្លាប់ ស្ត្រីជាច្រើនត្រូវបានគេបំពាន និងក្មេងៗជាច្រើនបានរងគ្រោះ។ បើតាមលោក Tambadou មីយ៉ាន់ម៉ា ត្រូវតែបញ្ឈប់ការបង្ក្រាប ការធ្វើទុក្ខបុកម្នេញ និងការើសអើសលើជនជាតិភាគតិចរ៉ូហ៊ីងយ៉ា។
មីយ៉ាន់ម៉ា មិនទាន់បានផ្តល់សក្ខីកម្មនៅថ្ងៃទី១០ ខែធ្នូ នៅឡើយទេ ពោលគឺត្រូវចាំរហូតដល់ថ្ងៃទី ១១ ខែធ្នូ។ បើតាមគេរំពឹងទុក លោកស្រីស៊ូជី ម្ចាស់ពានរង្វាន់ណូបែលសន្តិភាព ទំនងជាសំអាងទៅលើ ការអនុវត្តច្បាប់ ដើម្បីបង្ក្រាបលើក្រុមយោធារ៉ូហ៊ីងយ៉ា ដែលបង្កភាពអសកម្មនៅក្នុងប្រទេស និង ភាពគ្មានដែនយុត្តាធិការរបស់តុលាការយុតិ្តធម៌អន្តរជាតិលើសំណុំរឿងរ៉ូហ៊ីងយ៉ា។
ស្របពេលជាមួយអង្គសវនាការរបស់តុលាការទីក្រុងឡាអេ អាមេរិកបានសម្រេចបន្ថែមទណ្ឌកម្មលើមេបញ្ជាការយោធា មីន អ៊ុងឡាំង និងមន្ត្រីយោធាជាន់ខ្ពស់មីយ៉ាន់ម៉ា ៣រូបទៀត នៅចំថ្ងៃសិទ្ធិមនុស្សអន្តរជាតិ ១០ធ្នូ។ តាមរយៈទណ្ឌកម្មនេះ អាមេរិក បានបង្កកទ្រព្យសម្បត្តិ និងលំហូរហិរញ្ញវត្ថុទាំងប៉ុន្មាន ដែលមានជាប់ពាក់ព័ន្ធជាមួយមន្ត្រីយោធាទាំងបួនរូបនេះ។ បើតាមរដ្ឋមន្ត្រីរតនាគារអាមេរិក Steven Mnuchin អាមេរិកមិនអនុញ្ញាតឲ្យមានសកម្មភាពធ្វើទារុណកម្ម ការចាប់ជំរិត ការរំលោភបំពានផ្លូវភេទ ឧក្រិដ្ឋកម្ម និងការបង្ក្រាបណាមួយ លើជនស៊ីវិលនោះឡើយ។
សូមបញ្ជាក់ថា ការឡើងទៅតតាំងរឿងក្តីរបស់លោកស្រី ស៊ូជី នៅតុលាការយុត្តិធម៌អន្តរជាតិក្នុងពេលនេះ គឺមានទាំងការគាំទ្រ និងការប្រឆាំងដោយជនរងគ្រោះ ដែលអំពាវនាវស្វែករកយុត្តិធម៌។ ជាក់ស្តែងនៅក្នុងមីយ៉ាន់ម៉ា ប្រជាជនជាច្រើន បានជួបជុំគ្នា ដើម្បីសម្តែងពីការគាំទ្រ ចំពោះវត្តមាន និងសេចក្តីក្លាហានរបស់លោកស្រី ស៊ូជី ក្នុងការតតាំងរឿងក្តីជាមួយហ្គំប៊ី។ ចំណែកនៅពីមុខតុលាការយុត្តិធម៌អន្តរជាតិវិញ ក្រុមជនជាតិភាគតិចរ៉ូហ៊ីងយ៉ាប្រមាណជា ៥០នាក់ បានអំពាវនាវឲ្យតុលាការស្វែងរកយុត្តិធម៌ពួកគេ។
ជាការពិតណាស់ ក្រៅពីបណ្តឹងរបស់ប្រទេសហ្គំប៊ី មីយ៉ាន់ម៉ាបានរងសម្ពាធតាមផ្លូវច្បាប់ពីអន្តរជាតិពីរបន្ថែមទៀត។ ក្នុងនោះមានដូចជា ក្រុមសិទ្ធិមនុស្សដាក់ពាក្យប្តឹងលោកស្រីស៊ូជី និងក្រុមយោធាមីយ៉ាន់ម៉ា នៅប្រទេសអាហ្សង់ទីនក្រោម«យុត្តិការសកល» និងចុងក្រោយគឺ តុលាការឧក្រិដ្ឋកម្មអន្តរជាតិចេញសេចក្តីសម្រេច បើកការស៊ើបអង្កេតពេញលេញជុំវិញសំណុំរឿងរ៉ូហ៊ីងយ៉ា៕
Tag:
អាមេរិក
មីយ៉ាន់ម៉ា
រ៉ូហ៊ីងយ៉ា
អ៊ុងសាន ស៊ូជី
តុលាការយុត្តិធម៌អន្តរជាតិ
ហ្គំប៊ី
© រក្សាសិទ្ធិដោយ thmeythmey.com