កីឡាអន្តរជាតិ
អន្តរជាតិ
រុស្ស៊ីអាចលេងអូឡាំពិកក្រុងតូក្យូបានទោះជាប់បម្រាម តែស្ថិតក្រោមវិន័យតឹងរ៉ឹង
× រុស្ស៊ីអាចនឹងត្រូវហាមឃាត់មិនឲ្យចូលរួមប្រកួតកីឡាអូឡាំពិកចំនួនពីរលើក បន្ទាប់ពីទីភ្នាក់ងារប្រឆាំងការប្រើសារធាតុញៀនពិភពលោក( WADA) ពិន័យមិនឲ្យចូលរួមព្រឹត្តិការណ៍កីឡាអន្តរជាតិធំៗរយៈពេល៤ឆ្នាំ។ យ៉ាងណា ទ្វារនៅតែបើកចំហសម្រាប់ការចូលរួមរបស់រុស្ស៊ីនៅអូឡាំពិកនាក្រុងតូក្យូឆ្នាំ២០២០ ប្រសិនបើអត្តពលិកអាចបំពេញតាមលក្ខណវិនិច្ឆ័យតឹងរឹងដែលបានកំណត់ដោយ WADA។
ផ្លូវឆ្ពោះទៅអូឡាំពិកដែលជប៉ុនធ្វើម្ចាស់ផ្ទះ ប្រហែលជាមិនងាយស្រួលទេសម្រាប់រុស្ស៊ី បន្ទាប់ពីប្រទេសនេះត្រូវបាន WADA រកឃើញថា បានបន្លំទិន្នន័យក្នុងមន្ទីរពិសោធន៍ដែលធ្វើឲ្យឯកសារស៊ើបអង្កេតមិនស៊ីចង្វាក់គ្នាជុំវិញការធ្វើតេស្តរកសារធាតុខុសច្បាប់នេះ។
យ៉ាងណាក៏ដោយ អត្តពលិករុស្ស៊ីដែលចង់មានវត្តមាននៅឯកីឡាអូឡាំពិកក្រុងតូក្យូឆ្នាំ២០២០ នៅតែអាចចូលរួមបាន ប៉ុន្តែក្នុងនាមជាប្រទេសអព្យាក្រឹតដោយស្ថិតក្រោមទង់អូឡាំពិក និងបំពេញតាមលក្ខខណ្ឌដែល WADA កំណត់។
ព្រឹត្តិការណ៍អូឡាំពិកក្រុងឡុងដ៍ឆ្នាំ២០១២ ជាការប្រកួតកីឡាអូឡាំពិករដូវក្តៅចុងក្រោយរបស់រុស្ស៊ីដែលគ្មានរឿងអាស្រូវជុំវិញការប្រើសារធាតុញៀន ដោយកាលនោះពួកគេបានបញ្ជូនអត្តពលិករហូតដល់ចំនួន៤៣៦រូប ទៅប្រជែងមេដាយ។
៤ឆ្នាំក្រោយ ពោលគឺនៅអូឡាំពិកក្រុងរីយ៉ូ ឆ្នាំ២០១៦ អត្តពលិករុស្ស៊ីមួយចំនួនក្នុងចំណោម២៨២នាក់បានបង្កភាពចម្រូងចម្រាសជុំវិញករណីប្រើប្រាស់សារធាតុប៉ូវកម្លាំង រហូតត្រូវហាមឃាត់ចូលរួមប្រកួតព្រឹត្តិការណ៍កីឡាធំៗរយៈពេល៤ឆ្នាំ តាមរយៈការប្រកាសរបស់ WADA នៅថ្ងៃទី៩ ខែធ្នូ ឆ្នាំ២០១៩។
ទោះយ៉ាងណា ជុំវិញការហាមអត្តពលិករុស្ស៊ី ត្រូវសម្រេចលើកចុងក្រោយដោយអាស្រ័យលើតុលាការអាជ្ញាកណ្តាលកីឡា (CAS) ខណៈដែលរុស្ស៊ីបានដាក់បណ្តឹងឧទ្ធរណ៍ដោយអះអាងថាពួកគេទទួលរងភាពអយុត្តិធម៌ពីការប្រកួតប្រជែងនៅទីក្រុងតូក្យូ ប្រទេសជប៉ុនឆ្នាំក្រោយ៕
Tag:
WADA
សារធាតុហាមឃាត់
© រក្សាសិទ្ធិដោយ thmeythmey.com