អន្តរជាតិ
យុវតី Greta Thunberg ជាប់ឈ្មោះជា «បុគ្គលឆ្នើមប្រចាំឆ្នាំ២០១៩» របស់ទស្សនាវដ្តី Time
× Greta Thunberg សិស្សស្រីជនជាតិស៊ុយអែត ដែលជួយបំផុសចលនាសកលមួយប្រយុទ្ធនឹងការប្រែប្រួលអាកាសធាតុ នៅថ្ងៃពុធ ១១ ធ្នូ ត្រូវបានជ្រើសរើសជា «បុគ្គលឆ្នើមប្រចាំឆ្នាំ២០១៩» របស់ទស្សនាវដ្តី Time ។ នៅលើក្របមុខនៃទស្សនាវដ្តីនេះ មានបង្ហាញរូបភាពរបស់នាង Thunberg ដោយភ្ជាប់នឹងចំណងជើងថា «អំណាចយុវជន» ឬជាភាសាអង់គ្លេស «The Power of Youth»។
យុវតី Thunberg ទទួលបានចំណាប់អារម្មណ៍ខ្លាំងពីសំណាក់សារព័ត៌មានធំៗ នៅពេលរូបនាងបានចេញមុខតវ៉ាតែឯកឯងប្រឆាំងនឹងការឡើងកម្តៅពិភពលោក នៅក្រៅបរិវេណអគាររដ្ឋសភាស៊ុយអែតកាលពីឆ្នាំមុន។ នៅខែកញ្ញា ឆ្នាំ២០១៩នេះ នៅសន្និសីទអាកាសធាតុ UN នាទីក្រុង ញូវយ៉ក សហរដ្ឋអាមេរិក នាងបានរិះគន់ខ្លាំងៗលើមេដឹកនាំពិភពលោក ដោយចោទថា ពួកគេ ពឹងលើយុវជនសម្រាប់ដំណោះស្រាយលើបញ្ហាបម្រែបម្រួលអាកាស។ ជាសុន្ទរកថាដ៏ល្បីល្បាញ នាង និយាយដូច្នេះ៖«អ្នកបានលួចក្តីសុបិននិងកុមារភាពខ្ញុំ ជាមួយសម្តីដ៏គ្មានបានការរបស់អ្នក។ យើងកំពុងតាមដានអ្នក»។
មានវ័យត្រឹម១៦ឆ្នាំ សកម្មជនបរិស្ថានរូបនេះ ក្លាយជាមនុស្សវ័យក្មេងបំផុតដែលត្រូវបានជ្រើសរើស ក្នុងប្រវត្តិសាស្ត្ររបស់ទស្សនាវដ្តី Time ។ ទាក់ទិននឹងការសម្រេចចិត្តនេះ និពន្ធនាយក Edward Felsentha បញ្ជាក់ថា៖«នាងក្លាយជាសំឡេងដ៏ធំបំផុតមួយលើបញ្ហាដ៏ធំបំផុតដែលភពផែនដីកំពុងជួបប្រទះក្នុងឆ្នាំនេះ»។
ក្នុងបទសម្ភាសជាមួយទស្សនាវដ្តី Time នាង Thunberg លើកឡើងបែបនេះ៖«យើង មិនអាចគ្រាន់តែរស់នៅ ដោយគិតថាពិភពលោកនេះ គ្មានថ្ងៃស្អែកនោះឡើយ ព្រោះថាការពិត វាមានថ្ងៃស្អែក»។ នាង ផ្ញើសារត្រង់ៗទៅកាន់មេដឹកនាំពិភពលោកថា «សូមស្តាប់អ្នកវិទ្យាសាស្ត្រ» ហើយនាងក៏បានចោទភាពអសកម្មរបស់ពួកគេលើបញ្ហាការប្រែប្រួលអាកាសធាតុនេះ។
សកម្មជនស៊ុយអែតរូបនេ បានស្ថិតនៅរដ្ឋធានី ម៉ាឌ្រីដ នៃអេស្ប៉ាញ ខណៈនាងត្រូវបានផ្តល់កិត្តិយសជា «បុគ្គលឆ្នើមប្រចាំឆ្នាំ២០១៩» របស់ទស្សនាវដ្តី Time ។ នៅសន្និសីទអាកាសធាតុ UN នាង Thunberg បញ្ជាក់ថា គ្រោះថ្នាក់បំផុតនោះគឺថា អ្នកនយោបាយ និងនាយកប្រតិបត្តិក្រុមហ៊ុនធំៗ កំពុងធ្វើពុតជាព្យាយាមបង្កើតដំណោះស្រាយ ប៉ុន្តែធាតុពិតស្ទើរតែគ្មានអ្វីសោះបានធ្វើឡើង ក្រៅពីការបង្កើតសារសាធារណៈដ៏ច្នៃប្រឌិតនោះ។
ក្រៅពីបញ្ជី ទស្សនាវដ្តី Time ក៏បានការស្ទង់មតិពីសំណាក់អ្នកអាន (Reader’s Poll) មួយផងដែរ ដែលបានស្នើសុំឲ្យពួកគេបោះឆ្នោតរើសបុគ្គលដែលពួកគេយល់ឃើញថា មានឥទ្ធិពលខ្លាំងបំផុតក្នុងឆ្នាំ២០១៩។ ក្នុងបញ្ជីនេះ បាតុករហុងកុង ជាជម្រើសដំបូងគេ ដោយមានសំឡេងគាំទ្រ ២៧លាន, ទី២គឺ ក្រុមអ្នកតវ៉ាដើម្បីបុព្វហេតុអាកាសធាតុនៅជុំវិញពិភពលោក, តារាសម្តែងអាមេរិក Keanu Reeves ជាប់លេខ ៣ តាមពីក្រោយដោយក្រុមតារាចម្រៀង K-pop BTS ហើយនាង Thunberg ជាប់លេខ ៥ ៕
Tag:
ស្វីស
Time
Greta Thunberg
Time
© រក្សាសិទ្ធិដោយ thmeythmey.com