ជាតិ
សង្គមជាតិ
ដំណើរការរោងចក្រប្រព្រឹត្តកម្មទឹកស្អាតទឹកវិល២ តែមិនទាន់គ្រប់គ្រាន់ឡើយសម្រាប់អ្នកក្រុងសៀមរាប រោងចក្រប្រព្រឹត្តកម្មទឹកស្អាតទី២ នៅក្រុងសៀមរាប ខេត្តសៀមរាប។
× ភ្នំពេញ៖ រោងចក្រប្រព្រឹត្តកម្មទឹកស្អាតទឹកវិល២ នៅក្រុងសៀមរាប ខេត្តសៀមរាប ដែលអាចផលិតទឹកស្អាតបាន ១៥ ពាន់ម៉ែត្រគូប ក្នុងមួយថ្ងៃ ត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១០ធ្នូ ឆ្នាំ២០១៩។ រោងចក្រប្រព្រឹត្តកម្មទឹកស្អាតនេះ មានតម្លៃជិត១៣លានដុលា្លរដែលស្ថិតក្រោមក្របខណ្ឌឥណទាន ពីទីភ្នាក់ងារបារាំងសម្រាប់ការអភិវឌ្ឍ (AFD) ដោយមានបំពង់មេនាំទឹកស្អាត ទំហំ៧០០ មីលីម៉ែត្រ និងប្រវែងជាង៦ពាន់ម៉ែត្រ ដោយយកប្រភពទឹកពីអាងបារាយណ៍ខាងលិច។
តាមការផ្សាយរបស់រដ្ឋបាលខេត្តសៀមរាប ទោះជារោងចក្រប្រព្រឹត្តកម្មទឹកស្អាតទី២នេះ ដំណើរការក៏ដោយ ប៉ុន្តែវានៅតែមិនទាន់អាចឆ្លើយតបនឹងតម្រូវការប្រើប្រាស់ទឹកស្អាតប្រចាំថ្ងៃ ក្នុងក្រុងសៀមរាបបានឡើយ។ លោក ទៀ សីហា អភិបាលខេត្តសៀមរាប បញ្ជាក់ថា ក្រុងសៀមរាបមានតម្រូវការទឹកស្អាតជាមធ្យម ៦០ពាន់ម៉ែត្រគូប ក្នុងមួយថ្ងៃ ហើយរោងចក្រប្រព្រឹត្តកម្មទឹកស្អាតដែលទើបសម្ពោធនេះ អាចផលិតទឹកស្អាតបាន១៥ពាន់ម៉ែត្រគូប ក្នុងមួយថ្ងៃ។ រីឯរដ្ឋាករទឹកស្វយ័តសៀមរាប អាចផ្គត់ផ្គង់ទឹកស្អាត ត្រឹម ៣០ពាន់ម៉ែត្រគូបប៉ុណ្ណោះក្នុងមួយថ្ងៃ។
យោងតាមការសិក្សារបស់ក្រុមហ៊ុនបារាំង និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នៅឆ្នាំ២០៣០ តម្រូវការប្រាស់ទឹកស្អាតក្នុងក្រុងសៀមរាប នឹងកើនដល់ ៩០ ពាន់ម៉ែត្រគូបក្នុង១ថ្ងៃ។
លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងលោកស្រី អេវ៉ា ង្វៀនប៊ិញ ឯកអគ្គរដ្ឋទូតបារាំងប្រចាំកម្ពុជា បានចូលរួមជាអធិបតីក្នុងពិធីសម្ពោធនេះ។ លោក ចម ប្រសិទ្ធ បានគូសបញ្ជាក់ថា ក្រុងសៀមរាប ត្រូវមានការគិតគូរទុកជាមុន ក្នុងរយៈពេលវែង ពី១០ ទៅ២០ឆ្នាំខាងមុខ ដើម្បីត្រៀមដោះស្រាយបញ្ហាផ្គត់ផ្គង់ទឹកស្អាតជូនប្រជាពលរដ្ឋ និងបម្រើដល់ការអភិវឌ្ឍវិស័យសេដ្ឋកិច្ច និងទេសចរណ៍។
បច្ចុប្បន្នរដ្ឋាករទឹកស្វយ័តសៀមរាបមានគម្រោងវិនិយោគមួយផ្សេងទៀត ក្រោមក្របខណ្ឌឥណទានពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ជាមួយនឹងទំហំទឹកប្រាក់ប្រមាណជា ១០៦លានដុល្លាអាមេរិក សម្រាប់ការសាងសង់រោងចក្រទឹកស្អាតថ្មីមួយទៀត ដែលមានសមត្ថភាពផលិត ៦០ពាន់ម៉ែត្រត្រីគុណក្នុងមួយថ្ងៃ ស្ថិតក្នុងសង្កាត់ជ្រាវ ក្រុងសៀមរាប ដោយយកប្រភពទឹកពីបឹងទន្លេសាប និងការដំឡើងបំពង់មេនាំទឹក និងបំពង់ចែកចាយទឹកស្អាត ប្រវែងសរុប ២២០គីឡូម៉ែត្រ ។ គម្រោងនេះនឹងបញ្ចប់ការដ្ឋានសាងសង់ក្នុងឆ្នាំ២០២៣ ៕
© រក្សាសិទ្ធិដោយ thmeythmey.com