អន្តរជាតិ
បរាជ័យបង្កើតរដ្ឋាភិបាលចម្រុះ អ៊ីស្រាអែលនឹងរៀបចំបោះឆ្នោតលើកទី៣ក្នុងឆ្នាំនេះ
លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (ឆ្វេង) និងលោក Benny Gantz អតីតនាយឧត្តមសេនីយ៍ និងមេដឹកនាំសម្ព័ន្ធភាពនយោបាយកណ្ដាលនិយមមួយឈ្មោះថា «Blue and White»
×![]()
អ៊ីស្រាអែល នឹងរៀបចំការបោះឆ្នោតទូទៅលើកទីបីរបស់ខ្លួន ក្នុងរយៈពេលមិនដល់មួយឆ្នាំផង ក្រោយពីគណបក្សធំពីរបរាជ័យបង្កើតកិច្ចព្រមព្រៀងចែករំលែកអំណាចគ្នា មុនពេលកំណត់ថ្ងៃពុធ ១១ ខែធ្នូ។ ពួកគេ បានសម្រេចរំលាយសភាចោល ហើយរំពឹងនឹងដាក់កាលបរិច្ឆេទបោះឆ្នោត នៅថ្ងៃទី ២ មីនា ឆ្នាំ២០២០ ខាងមុខ។ 
លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ដែលដឹកនាំបក្សស្តាំនិយម Likud និងគូប្រជែងនយោបាយសំខាន់របស់លោក គឺ លោក Benny Gantz អតីតនាយឧត្តមសេនីយ៍ និងមេដឹកនាំសម្ព័ន្ធភាពនយោបាយកណ្ដាលនិយមមួយឈ្មោះថា «Blue and White» ពុំអាចបង្កើតរដ្ឋាភិបាលចម្រុះមួយបាន បន្ទាប់ពីការបោះឆ្នោតទូទៅដែលមិនដាច់ស្រេច។ នេះជាលើកទី២ហើយក្នុងឆ្នាំ២០១៩នេះ ដែលបក្សនាំមុខទាំងពីរបរាជ័យក្នុងការបង្កើតរដ្ឋាភិបាល។
ក្នុងខែកញ្ញា កន្លងទៅ សម្ព័ន្ធភាពនយោបាយរបស់លោក Gantz ឈ្នះបានកៅអី៣៣ ក្នុងសមាជិកសភាសរុប១២០ ខណៈបក្សរបស់លោក ណេតាន់យ៉ាហ៊ូ ទទួលបាន៣២កៅអី។ ដោយគ្មានបក្សណាមួយអាចបង្កើតរដ្ឋាភិបាលចម្រុះមួយដែលត្រូវបានកៅអី៦១ឡើងទៅ លោកប្រធានាធិបតីអ៊ីស្រាអែល Reuven Rivlin បានអំពាវនាវឲ្យពួកគេបង្កើតរដ្ឋាភិបាលសាមគ្គីជាតិមួយ។
ក៏ប៉ុន្តែ ការជជែកពិភាក្សាអំពីការបែងចែកអំណាច បានបរាជ័យជុំវិញការសម្រេចថា អ្នកណានឹងកាន់តំណែងជានាយករដ្ឋមន្ត្រីមុនគេ ដោយលោកណានតាន់យ៉ាហ៊ូប្រកែកមិនព្រមចូលរួមជាមួយបក្សដែលប្រកាន់ខ្ជាប់នូវតម្លៃនិងគោលការណ៍តឹងរ៉ឹងពេក ខណៈលោក Gantz បដិសេធធ្វើការក្រោមនាយករដ្ឋមន្ត្រីដែលកំពុងប្រឈមនឹងបទឧក្រិដ្ឋ។
កាលពីខែមុន អគ្គរដ្ឋអាជ្ញារបស់អ៊ីស្រាអែល បានចោទប្រកាន់លោក ណេតាន់យ៉ាហ៊ូ ពីបទពុករលួយ ឆបោក និងបំផ្លាញទំនុកចិត្តពាក់ព័ន្ធនឹងករណីចំនួន៣។ លោកនាយករដ្ឋមន្ត្រីបានច្រានចោលការចោទប្រកាន់ពីកំហុសទាំងនេះ ហើយចាត់ទុកពួកថាថាជា «ការប៉ុនប៉ង់ធ្វើរដ្ឋប្រហារ» និងបន្ទោសថាជានីតិវិធីដ៏អាក្រក់ ។ ខណៈនេះ លោក ណេតាន់យ៉ាហ៊ូ ពុំទាន់ប្រកាសនៅឡើយទេថាតើលោកនឹងស្នើឲ្យសភាផ្តល់អភ័យឯកសិទ្ធិដល់លោកដើម្បីបញ្ចៀសការកាត់ទោស ក៏ប៉ុន្តែគេ រំពឹងច្រើនថា លោកនឹងធ្វើបែបនេះ៕
Tag:
អ៊ីស្រាអែល
បេនចាមីន ណេតាន់យ៉ាហ៊ូ
ការបោះឆ្នោត
© រក្សាសិទ្ធិដោយ thmeythmey.com
