ពន្ធដារ និងពន្ធគយ ប្រមូលបានជាង៥ពាន់លានដុល្លារ

ជាតិ

សេដ្ឋកិច្ច

ពន្ធដារ និងពន្ធគយ ប្រមូលបានជាង៥ពាន់លានដុល្លារ

13, Dec 2019 , 10:06 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ គិតត្រឹមពាក់កណ្ដាលខែធ្នូនេះ ទាំងពន្ធគយ និងពន្ធដារ ប្រមូលពន្ធបាន ៥,៦៥២ លានដុល្លារ ដែលលើសពីផែនការកំណត់ប្រមាណ ១,១០៤ លានដុល្លារ។ របាយការណ៍ពន្ធនេះ ត្រូវបានបញ្ជាក់ដោយលោកនាយករដ្ឋមន្ត្រីកម្ពុជា។

សម្ដេច ហ៊ុន សែន បានសរសេរនៅលើហ្វេសប៊ុកថា ចំណូលដែលប្រមូលបានដោយអគ្គនាយកដ្ឋានគយមានចំនួន ៣,០១៣ លានដុល្លារ លើសផែនការប្រចាំឆ្នាំប្រមាណ ៧៥៨ លានដុល្លារ (ស្មើនឹង៣៣.៥% ) បើធៀបគម្រោងកំណត់ឲ្យត្រូវប្រមូលបាន ២,២៦០ លានដុល្លារ ។ បើតាមប្រមុខរដ្ឋាភិបាល តួលេខចំណូលពន្ធគយនេះ ដែលគិតជាមធ្យម គឺប្រមូលបានប្រមាណ១០លានដុល្លារក្នុងមួយថ្ងៃៗ។

«យើងនៅសល់ជិត២០ថ្ងៃទៀត ដែលមិនទាន់បានគិតបូកថែម ហើយដែលយើងរំពឹងថាចំណូលគយគឺនឹងកើនលើសផែនការប្រមាណជាង ៨០០លានដុល្លារ»។ នេះជាការបញ្ជាក់របស់លោកនាយករដ្ឋមន្ត្រី ដែលអះអាងថា លទ្ធផលនេះ កើតចេញពីប្រសិទ្ធភាពនៃយុទ្ធសាស្ត្រ «ចុងខ្សែពីរនៃចំណងខ្សែមួយ» ក្នុងការគ្រប់គ្រងស្ថានភាពនយោបាយ និងស្ថានភាពម៉ាក្រូសេដ្ឋកិច្ចឲ្យមានស្ថិរភាពរឹងមាំ។

ងាកមកចំណូលពន្ធដារវិញ គឺបានប្រមូលចំណូល ២,៦៣៤ លានដុល្លារ ដែលលើសផែនការប្រមាណ ៣៤៥ លានដុល្លារ។ ផែនការប្រចាំឆ្នាំ បានកំណត់ប្រមូលពន្ធដារឲ្យបានប្រមាណ ២,២៨៨ លានដុល្លារ។ ដូច្នេះបើសរុបទាំងចំណូលពន្ធគយ និងពន្ធដារ មានចំនួន៥,៦៥២ លានដុល្លារ ដែលប្រមូលបានលើសពីផែនការកំណត់ប្រមាណ ១,១០៤ លានដុល្លារ ខណៈដែលច្បាប់ផែនការថវិកាពន្ធទាំងពីរនេះ បានដាក់ចេញគម្រោងប្រមូលប្រមាណ ៤,៥៤៨លានដុល្លារ។ នេះបើតាមសម្ដេច ហ៊ុន សែន។

ប្រមុខរដ្ឋាភិបាល បានសង្កត់ធ្ងន់ដូច្នេះថា៖«បើយើងបូករួមទាំង២ខែមុន យើងអាចប៉ាន់ស្មានបានថាចំណូលលើសផែនការគឺនឹងឈានដល់ ១,៣០០លានដុល្លារ ដែលជាថវិកាដ៏ល្អបានមកពីចំណូលសារពើពន្ធ ហើយដែលមិនទាន់បានបូកបញ្ចូលពីចំណូលមិនមែនសារពើពន្ធមាន ដូចជាចំណូលបានមកពីថ្លៃទិដ្ឋាការទេសចរណ៍, អាការយានដ្ឋាន, អាកាសចរណ៍,ប័ណ្ណចូលទស្សនាអង្គវត្ត និងពីដីកសិកម្ម(ដីសម្បទានសេដ្ឋកិច្ចដែលជួលទៅឲ្យឯកជនវិនិយោគ)… ជាដើម»។

ក្រៅពីចំណូលពន្ធខាងលើនេះ រាជរដ្ឋាភិបាល ក៏មានថវិកាក្នុងដៃជាសាច់ប្រាក់ប្រមាណ ៣,៥០០លានដុល្លារ ដែលអាចប្រើប្រាស់ដោះស្រាយបញ្ហាបានភ្លាមៗផងដែរ ដោយមិនទាន់បូកបញ្ចូលពីទុនបម្រុងអន្តរជាតិប្រមាណ ១៥ពាន់លានដុល្លារ និង មាសប្រមាណ៣០តោនទៀតផង។

«កម្ពុជាដែលបានដើរមកដល់ដំណាក់កាលនេះ គឺដោយសារមានការចូលរួមពីប្រទេសជាដៃគូ ដៃគូវិនិយោគឯកជន និងពីជនរួមជាតិទាំងអស់គ្នា ដែលបានចូលរួមថែរក្សាការពារសន្តិភាព និងចូលរួមទទួលខុសត្រូវបង់ពន្ធទាំងអស់គ្នា ដើម្បីកម្ពុជាកាន់តែរីកលូតលាស់ឆាប់រហ័សលឿនទៅមុខ»។ នេះជាការលើកឡើងរបស់លោកនាយករដ្ឋមន្ត្រី ហ៊ុន សែន ដែលបានអះអាងថា កំណើនសេដ្ឋកិច្ចជាតិ ក្នុងរង្វង់ប្រមាណ ៧,១ ភាគរយ ដែលមានអត្រាអតិផរណាត្រឹមតែ ២,៥ ភាគរយប៉ុណ្ណោះ៕