អន្តរជាតិ
អាមេរិក ព្រមានថា កូរ៉េខាងជើងរងទណ្ឌកម្មធ្ងន់ជាងមុន បើបន្តផ្គើន លោកប្រធានាធិបតីអាមេរិក ដូណាល់ ត្រាំ (ខាងឆ្វេង) និងមេដឹកនាំកូរ៉េខាងជើងគីម ជុងអ៊ុន នៅតំបន់គ្មានយោធាក្នុងឧបទ្វីបកូរ៉េ។ រូបភាព៖ Xinhua
× អាមេរិក នៅថ្ងៃទី១១ ខែធ្នូ បានព្រមានថា កូរ៉េខាងជើងអាចរងទណ្ឌកម្មកាន់តែធ្ងន់ជាងមុន បើនៅតែផ្គើនសាកល្បងអាវុធដែលខ្លាំងជាងមុននៅក្នុងឆ្នាំថ្មី។ ប៉ុន្តែអាមេរិកក៏នៅតែបារម្ភដែរថា កូរ៉េខាងជើងអាចសាកល្បងមីស៊ីលបាលីស្ទិក ក្នុងគោលបំណងវាយប្រហារមកលើខ្លួន ។
នាកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីបញ្ហាកូរ៉េខាងជើង ឯកអគ្គរដ្ឋទូត អាមេរិក លោកស្រី Kelly Craft បានបង្ហាញក្តីបារម្ភថា កូរ៉េខាងជើងអាចសាកល្បងមីស៊ីលបាលីស្ទិក ក្នុងគោលបំណងវាយប្រហារលើអាមេរិក ដែលភ្ជាប់ជាមួយក្បាលគ្រាប់នុយក្លេអ៊ែរ។ ការបង្ហាញក្តីបារម្ភរបស់លោកស្រី Kelly Craft នៅពេលនេះ គឺធ្វើឡើងបន្ទាប់កូរ៉េខាងជើងបានប្រកាសពីការទទួលជោគជ័យដ៏ធំមួយ នាទីតាំងសាកល្បងអាវុធ Tongchang-ri។
ថ្លែងនៅចំពោះមុខតំណាងជាន់ខ្ពស់មកពីរដ្ឋសមាជិក១៤ ទៀត លោកស្រី Craft បានបញ្ជាក់ថា អាមេរិក នៅតែជឿជាក់លើកូរ៉េខាងជើង អាចបញ្ឈប់សកម្មភាពអរិភាព និងគំរាមកំហែង ហើយជំនួសមកវិញ ជាមួយការភ្ជាប់ទំនាក់ទំនងជាមួយអាមេរិក។ យ៉ាងណាមិញ តំណាងអាមេរិករូបនេះ ក៏បានព្រមានទីក្រុងព្យុងយ៉ាងដែរ បើសិនបើនៅតែសាកល្បងកម្មវិធីនុយក្លេអ៊ែរ មីស៊ីល ឬអាវុធផ្សេងទៀត ក្រុមប្រឹក្សាសន្តិសុខនឹងចាត់វិធានការទៅតាមនោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្នុងន័យសំដៅទៅដល់ឱសានវាទរបស់កូរ៉េខាងជើង លោកស្រី Craft ក៏បានលោមចិត្តកូរ៉េខាងជើង តាមរយៈផ្លូវចរចាផងដែរ បន្ទាប់ពីពាក្យព្រមានរួច។ ក្នុងនោះលោកស្រី បានលើកឡើងថា អាមេរិក និងក្រុមប្រឹក្សាសន្តិសុខ គឺមានគោលដៅ ប៉ុន្តែមិនមែនឱសានវាទនោះទេ។ ក្នុងន័យនេះ ភាគីអាមេរិក ចង់ឲ្យកូរ៉េខាងជើងចូលតុចរចាម្តងទៀត ដើម្បីឲ្យភាគីទីក្រុងព្យុងយ៉ាង និងទីក្រុងវ៉ាស៊ីនតោន អាចសម្រេចកិច្ចព្រមព្រៀងជាមួយគ្នា។
ពាក់ព័ន្ធនឹងការចរចានេះ កូរ៉េខាងជើង បានដាក់ឱសានវាទឲ្យអាមេរិកផ្លាស់ប្តូររបៀបវារៈចាស់ៗ ដែលទីក្រុងព្យុងយ៉ាងមិនពេញចិត្ត។ បើមិនដូច្នោះទេ កូរ៉េខាងជើង នឹងចាត់វិធានការយ៉ាងធំសម្បើម ប៉ុន្តែវិធានការទាំងនោះ គឺមិនទាន់ដឹងច្បាស់ថាជាអ្វីទេ។
សូមបញ្ជាក់ថា កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិលើកនេះ ធ្វើឡើង បន្ទាប់ពីកូរ៉េខាងជើងបានប្រកាសជាសាធារណៈថា ខ្លួនបានទទួលជោគជ័យលើការសាកល្បងដ៏ធំមួយ នៅក្នុងមជ្ឈមណ្ឌលបាញ់បង្ហោះផ្កាយរណបSohae ក្នុងទីតាំងសាកល្បងអាវុធ Tongchang-ri។ ប៉ុន្តែមកទល់ពេលនេះ គេមិនទាន់ដឹងនៅឡើយទេ ថាតើទីក្រុងព្យុងយ៉ាងបានសាកល្បងអាវុធ ឬសម្ភារបច្ចេកទេសអ្វីទេ។ បើតាមអ្នកជំនាញមីស៊ីល កូរ៉េខាងជើងទំនងជាសាកល្បងលើម៉ាស៊ីនបាញ់គ្រាប់រ៉ុក្កែត សម្រាប់បំពាក់មីស៊ីលបាលីស្ទិកអន្តរទ្វីប៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com