អន្តរជាតិ
គ.ជ.ប.ថៃ ស្នើតុលាការរំលាយបក្សប្រឆាំងដ៏ធំរបស់លោក Thanathorn លោក Thanathorn Juangroongruangkit មេដឹកនាំបក្សប្រឆាំងថៃ (AFP)
× គណៈកម្មការរៀបចំការបោះឆ្នោតថៃ (គ.ជ.ប.) បានបោះឆ្នោតស្នើឲ្យតុលាការធម្មនុញ្ញ រំលាយគណបក្សអនាគតឆ្ពោះទៅមុខ (Future Forward) ដោយឈរលើមូលដ្ឋានថា បក្សនេះទទួលយកលុយ ឬការបរិច្ចាគពីប្រភពមិនស្របច្បាប់។ ជុំវិញរឿងនេះ មេដឹកនាំបក្សប្រឆាំងនេះ បានអំពាវនាវឲ្យអ្នកគាំទ្រនាំគ្នាចេញតវ៉ានៅទីក្រុងបាងកក ដើម្បីបុព្វហេតុយុត្តិធម៌។
គណៈកម្មការរៀបចំការបោះឆ្នោតថៃ បានចេញសេចក្តីថ្លែងការណ៍មួយ នៅថ្ងៃពុធ ១១ ធ្នូ ថា ខ្លួនបានរកឃើញថា បក្សនេះបានបំពានត្រង់វាក្យខណ្ឌ ៧៧ នៃច្បាប់គណបក្សនយោបាយរបស់ថៃ ដែលហាមឃាត់គណបក្សនយោបាយនានា និងគណៈកម្មាធិការប្រតិបត្តិពីការទទួលលុយ ទ្រព្យសម្បត្តិ ឬផលប្រយោជន៍ផ្សេងៗ នៅពេលពួកគេដឹង ឬគួរដឹងថា លុយទាំងនោះគឺចេញមកពីប្រភពខុសច្បាប់។ នេះបើតាមកាចុះផ្សាយរបស់កាសែត បាងកកប៉ុស្តិ៍។
ប្រសិនបើតុលាការយល់ព្រមតាមសំណើរបស់គណៈកម្មការនេះមែន គណៈកម្មាធិការប្រតិបត្តិទាំង១៥នាក់ របស់បក្សនេះ ដែលរួមមាន លោក Thanathorn Juangroongruangkit ដែលអស់តំណែងជាសមាជិកសភាកាលពីខែមុន, អគ្គលេខាធិការបក្ស និងអ្នកនាំបក្ស នឹងត្រូវហាមប្រាមពីការធ្វើនយោបាយ។ មិនត្រឹមតែប៉ុណ្ណោះ ពួកគេ ក៏នឹងមិនត្រូវអនុញ្ញាតឲ្យចុះឈ្មោះ ឬបង្កើតបក្ស រយៈពេល១០ឆ្នាំទៀតៀង។ ចំណែកសមាជិកសភាបក្សទាំង៨០នាក់របស់បក្សនេះ នឹងអាចមានសិទ្ធិចូលរួមគណបក្សផ្សេងៗទៀតបាន។ ទន្ទឹមនេះ តុលាការក៏អាចផ្អាកដំណើរការរបស់បក្សនេះ ខណៈពិចារណាថា រំលាយចោលទាំងស្រុងឬ យ៉ាងណានោះ។
ទាក់ទិននឹងដំណឹងនេះ មេដឹកនាំបក្សប្រឆាំងលោក Thanathorn តាមរយៈគណនីហ្វេសប៊ុក បានទទូចឲ្យអ្នកគាំទ្រលោកនាំគ្នាចេញតវ៉ាតាមដងផ្លូវនៃរាជធានី បាងកក នាថ្ងៃសៅរ៍ ទី១៤ ខែធ្នូ ខាងមុខ ។ លោក លើកឡើងថា នេះជាពេលដែលអ្នកគាំទ្រលោកនាំគ្នាក្រោកឈរ ហើយទាមទារយុត្តិធម៌និងភាពស្មើគ្នា។
សូមបញ្ជាក់ថា ក្នុងខែឧសភា ឆ្នាំ២០១៩ កន្លងទៅ លោក Thanathorn បានប្រាប់វេទិកាក្នុងស្រុកមួយថា លោកបានផ្តល់កម្ចីជិត២០០លានបាត ឬស្មើនឹងជាង៦,៦លានដុល្លារ ទៅកាន់គណបក្សអនាគតឆ្ពោះទៅមុខ (FFP)។ លោកក៏បានប្រកាសលុយកម្ចីនេះក្នុងការប្រកាសទ្រព្យសម្បត្តិលោក ដោយដាក់ឈ្មោះគណបក្សនេះជាកូនបំណុលមួយរបស់លោក។ ម្យ៉ាងទៀត កិច្ចសន្យាខ្ចីបុលចំនួនពីរត្រូវបានធ្វើឡើងរវាងលោក Thanathorn និងប្រធានហិរញ្ញវត្ថុរបស់បក្ស ដោយមួយគឺក្នុងខែ មករា និងមួយទៀត ក្នុងខែមេសា ឆ្នាំ២០១៩៕
Tag:
ថៃ
បក្សប្រឆាំង
គជប
Thanathorn
© រក្សាសិទ្ធិដោយ thmeythmey.com