សង្គមអន្តរជាតិ
អន្តរជាតិ
បុរសអាហ្វហ្គានីស្ថានម្នាក់ធ្វើដំណើរ១២គីឡូម៉ែត្រជូនកូនស្រីបីនាក់ទៅសាលារាល់ថ្ងៃ
× លោក Mia Khan ពលរដ្ឋរស់នៅស្រុក Sharana ខេត្ត Paktika ប្រទេសអាហ្វហ្គានីស្ថាន ទទួលបាននូវការគោរពយ៉ាងខ្លាំងពីសំណាក់អ្នកប្រើប្រាស់បណ្តាញសង្គម ដោយលោកធ្វើដំណើរជារៀងរាល់ថ្ងៃលើចម្ងាយផ្លូវប្រមាណ១២គីឡូម៉ែត្រដើម្បីដឹកម៉ូតូជូនកូនស្រីបីនាក់ទៅសាលារៀន។ នេះបើតាមការបញ្ជាក់របស់គណៈកម្មការស៊ុយអែតសម្រាប់អាហ្វហ្គានីស្ថាន ដែលជាអង្គការក្រៅរដ្ឋាភិបាលផ្តោតលើវិស័យអប់រំនៅតំបន់ដាច់ស្រយាលនោះ។
Nooraniya School ជាសាលារៀនដែលដំណើរការដោយណៈកម្មការស៊ុយអែតសម្រាប់អាហ្វហ្គានីស្ថាន ប៉ុន្តែមានចម្ងាយឆ្ងាយពីផ្ទះរបស់លោក Mia Khan។ ជារៀងរាល់ថ្ងៃ បុរសវ័យប្រមាណ៦០ឆ្នាំរូបនេះ តែងតែចំណាយពេលដឹកកូនស្រីទាំងបីនាក់របស់ខ្លួនទៅសាលារៀន លើចម្ងាយផ្លូវ១២គីឡូម៉ែត្រ ហើយលោកបន្តរង់ចាំនៅខាងក្រៅជាច្រើនម៉ោងទៀតរហូតដល់ពួកគេចេញទៅផ្ទះវិញ។
លោក Khan បានពន្យល់ថា ការអប់រំដល់កូនស្រីទាំងអស់របស់គាត់ពិតជាមានសារសំខាន់ខ្លាំងណាស់ ពីព្រោះតំបន់ដែលគាត់រស់នៅមិនមានវេជ្ជបណ្ឌិតជាស្ត្រីនោះឡើយ។ «ខ្ញុំមិនចេះអក្សរ ហើយរស់មួយថ្ងៃពឹងមួយថ្ងៃ ប៉ុន្តែការអប់រំដល់កូនស្រីរបស់ខ្ញុំពិតជាមានតម្លៃខ្លាំងណស។ បំណងប្រាថ្នាដ៏ធំបំផុតរបស់ខ្ញុំគឺឲ្យកូនស្រី ទទួលបានការអប់រំដូចជាកូនប្រុសផងដែរ»។ លោកបានពន្យល់យ៉ាងដូច្នេះ។
Rozi កូនស្រីម្នាក់ក្នុងចំណោម៣នាក់របស់លោក Khan បានបញ្ជាក់ប្រាប់គេហទំព័រ គណៈកម្មការស៊ុយអែតសម្រាប់អាហ្វហ្គានីស្ថាន (Swedish Committee for Afghanistan) ថា នាងរីករាយយ៉ាងខ្លាំងដែលមានឱកាសសិក្សា។ «ពេលនេះ ខ្ញុំរៀនថ្នាក់ទី៦ ឪពុក ហើយពេលខ្លះ បងប្រុស បាននាំពួកយើងមកសាលារៀន ដោយម៉ូតូជារៀងរាល់ថ្ងៃ ហើយពេលចាំយកពួកយើងវិញ ពេលចេញពីសាលា»។
កាយវិការរបស់លោក Khan ទទួលបាននូវការគោរពយ៉ាងខ្លាំងពីអ្នកប្រើប្រាស់បណ្តាញសង្គមហ្វេសប៊ុក ដោយភាគច្រើនចាត់ទុកលោកជាវីរបុរស និងជាបិតាប្រកបដោយព្រហ្មវិហារធម៌។ ប៉ុន្តែមិនមានការផ្តល់ព័ត៌មានលំអិតនោះឡើយទាក់ទងនឹងក្រុមគ្រួសាររបស់លោក Khan៕
Tag:
អប់រំ
អាហ្វហ្គានីស្ថាន
© រក្សាសិទ្ធិដោយ thmeythmey.com