ពិព័រណ៍សៀវភៅ ជំរុញឲ្យយុវជន កាន់តែចូលចិត្តអានសៀវភៅ

ជាតិ

សង្គមជាតិ

ពិព័រណ៍សៀវភៅ ជំរុញឲ្យយុវជន កាន់តែចូលចិត្តអានសៀវភៅ

13, Dec 2019 , 10:19 pm

រូបភាព

ដោយ:

ភ្នំពេញ៖ «ផ្តើមក្តីស្រមៃ ដៃកាន់សៀវភៅ» ជាប្រធានបទនៅក្នុងពិព័រណ៍សៀវភៅថ្នាក់ជាតិលើកទី៨ ដែលប្រព្រឹត្តទៅនៅថ្ងៃទី១៣-១៥ ខែឆ្នូ ឆ្នាំ២០១៩នេះ។ កម្ពុជារៀបចំពិព័រណ៍សៀវភៅនេះ ដើម្បីផ្តល់ឱកាសឲ្យយុវជន សិស្ស-និស្សិត ចូលរួមអានសៀវភៅ និងអាចពិភាក្សាជាមួយអ្នកនិពន្ធ ហើយអ្នកនិពន្ធក៏អាចផ្សព្វផ្សាយសៀវភៅរបស់ខ្លួនផងដែរ។ ពិព័រណ៍សៀវភៅឆ្នាំនេះ គេរំពឹងទុកថា នឹងមានអ្នកចូលរួមប្រមាណ១០ម៉ឺននាក់។

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលមានវត្តមាននៅថ្ងៃដំបូងនៃពិព័រណ៍សៀវភៅ បានបញ្ជាក់ថា ពិព័រណ៍សៀវភៅឆ្នាំនេះ មានលក្ខណៈខុសប្លែកពីប៉ុន្មានឆ្នាំកន្លងទៅ ដោយឆ្នាំនេះមិនមែនមានតែការតាំងពិព័រណ៍សៀវភៅបែបខេមរភាសានោះទេ តែក៏មានការតាំងពិព័រណ៍សៀវភៅបរទេសផងដែរ។ លោក បញ្ជាក់ថា៖«ពិព័រណ៍សៀវភៅឆ្នាំនេះ យើងមានដៃគូចូលរួមផ្សេងៗ មិនមែនត្រឹមតែភាសាខ្មែរទេ យើងមានជាសៀវភៅភាសាបារាំង ភាសារុស្សី និងភាសាអង់គ្លេស»។

លោករដ្ឋមន្ត្រី បន្តថា ដើម្បីលើកកម្ពស់ការអាន ក្រសួងអប់រំ បានរៀបចំគោលនយោបាយ ពង្រឹងការអានដំបូង សម្រាប់ថ្នាក់មត្តេយ្យ សម្រាប់ជាទុនឲ្យពួកគេចូលចិត្តការអាន។ លោក បន្ថែមថា តាមរយៈគោលនយោបាយពង្រឹងការអានដំបូងនេះ ក្រសួងអប់រំ នឹងជំរុញឲ្យគ្រឹះស្ថានអប់រំនិងសាលារៀន បង្កើនការតែងសេចក្តី និងពង្រឹងការអានអក្សរសិល្បិ៍ខ្មែរ និងអក្សរសិល្បិ៍បរទេស ដល់កុមារ ដើម្បីឲ្យពួកគេមានទម្លាប់អានសៀវភៅតាំងពីក្មេងមក។

សិស្ស និស្សិត កំពុងស្ថិតនៅក្នុងពិព័រណ៍សៀវភៅ នាថ្ងៃទី១៣ ខែឆ្នូ ឆ្នាំ២០១៩

លោក ហុក សុទ្ធិ ប្រធានសមាគមនៃបណ្ណាល័យកម្ពុជា និងនាយកអង្គការស៊ីប៉ា លើកឡើងថា ឆ្នាំនេះអ្នកនិពន្ធសៀវភៅមានការកើនឡើង ហើយសៀវភៅក៏មានច្រើនប្រភេទដែរ ជាពិសេសសៀវភៅកុមារ សៀវភៅទស្សនវិជ្ជា និងសៀវភៅបែបអប់រំ និងសៀវភៅបែបលើកទឹកចិត្ត។ លោក យល់ថា ពិព័រណ៍សៀវភៅនេះ នឹងធ្វើឲ្យសិស្ស-និស្សិត អាចរកសៀវភៅណាដែលផ្តល់ផលប្រយោជន៍ដល់ការសិក្សា និងជំនាញរបស់ពួកគេផងដែរ។

ក្នុងបរិវេណបណ្ណាល័យជាតិ នាវេលាម៉ោង១០ព្រឹកថ្ងៃទី១៣ ខែឆ្នូនេះ មានអ្នកចូលរួមទស្សនាសៀវភៅរាប់ពាន់នាក់ ដែលភាគច្រើនជាកុមារ សិស្ស-និស្សិត និងយុវជន-យុវតី។ យុវតី លី ម៉ីលីង ដែលនៅក្នុងដៃមានកាន់សៀវភៅប្រលោមលោកមួយក្បាល បានប្រាប់ឲ្យដឹងថា នាងតែងតែមកចូលរួមពិព័រណ៍សៀវភៅជារៀងរាល់ឆ្នាំ ហើយក៏បានចូលរួមទិញសៀវភៅជាច្រើនផងដែរ។

ក្នុងពិធីតាំងពិព័រណ៍សៀវភៅនេះ កញ្ញា ម៉ីលីង បានទិញសៀវភៅបែបប្រលោមលោក និងសៀវភៅបែបអប់រំ។ ម៉ីលីង បានបញ្ជាក់ថា ការអានសៀវភៅគឺជាចំណង់ចំណូលចិត្តរបស់នាងនៅពេលដែលនាងទំនេរពីការសិក្សា។ សៀវភៅដែលនាងចូលចិត្តអានជាប្រចាំថ្ងៃនៅពេលយប់ គឺប្រភេទសៀវភៅប្រលោមលោកខ្មែរ និងបរទេស។

សិស្ស និស្សិត ដើរមើល និងទិញសៀវភៅនៅក្នុងពិព័រណ៍សៀវភៅ នាថ្ងៃទី១៣ ខែឆ្នូ ឆ្នាំ២០១៩

ទោះបីមិនមានពេលច្រើនក្នុងការអានសៀវភៅ កញ្ញា ម៉ីលីង ដែលជានិស្សិតផ្នែកហរិញ្ញវត្ថុ និងគណនេយ្យនៅសាលា CamEd Business School និយាយថា កញ្ញា តែងតែឆ្លៀតពេលអានយ៉ាងហោចណាស់ក៏មួយថ្ងៃម្តងដែរ ដើម្បីបង្កើនចំណេះដឹង។ កញ្ញា ប្រាប់ថា ចូលចិត្តអានសៀវភៅនៅកន្លែងស្ងប់ស្ងាត់ ដើម្បីផ្ចង់ស្មារតីបានល្អ និងអានបានលឿន។

យុវជនម្នាក់ទៀត ឈ្មោះ គយ ប៉ារ៉ាទី ជាសិស្សថ្នាក់ទី១២ ក៏បានទិញសៀវភៅជាច្រើនក្បាលផងដែរ។ សៀវភៅដែលប៉ារ៉ាឌីទិញនោះ សុទ្ធតែជាសៀវភៅបែបប្រវត្តិសាស្ត្រ វប្បធម៌ និងអរិយធម៌របស់បណ្តាប្រទេសនានា។ មួលហេតុដែលប៉ារ៉ាទីមកទិញសៀវភៅប្រភេទនេះ ដោយសារតែប៉ារ៉ាទីចង់ដឹងពីការរីកចម្រើន និងភាពអច្ឆរិយរបស់ប្រទេសនីមួយៗ។

កំពុងតែឈរនៅពីមុខស្តង់លក់សៀវភៅ យុវជនរូបនេះ និយាយថា៖«យើងសិក្សាពីគេ ដើម្បីយកមកអភិវឌ្ឍខ្លួនឯង ក៏ដូចជាប្រទេសជាតិរបស់យើង»។ ក្រៅពីនេះ ប៉ារាទី ក៏ឆ្លៀតអានសៀវភៅបែបអប់រំប្រាជ្ញា បណ្តុះគំនិត និងសិល្បៈក្នុងការនិយាយផងដែរ។

សូមបញ្ជាក់ថា ពិព័រណ៍សៀវភៅឆ្នាំនេះ មានស្តង់លក់សៀវភៅចំនួន១៩៣តូប។ នៅឆ្នាំនេះដែរ សម្តេច ហ៊ុន សែន នាយករដ្ឋមន្ត្រីកម្ពុជា ក៏បានឧបត្ថម្ភសៀវភៅស្រីហិតោបទេសភាគ១ និងភាគ២ ចំនួន២ម៉ឺនក្បាល ដើម្បីចែកជូនដោយឥតគិតថ្លៃសម្រាប់ឲ្យអ្នកចូលរួមតាំងពិព័រណ៍សៀវភៅផងដែរ៕