ពីនេះ ពីនោះ
ត្រីអាចម៍កុក ហាក់ត្រូវបានរងផលប៉ះពាល់តាមផ្នែកខ្លះចំពោះពួកវា ដោយសារទំបន់វារិអគ្គិសនី និងការបំពុលទឹក
ត្រីអាចម៍កុក។ រូបភាព៖ សៀវភៅមគ្គុទ្ទេសក៍ ស្តីពីប្រភេទត្រីរស់នៅក្នុងដែនទឹកសាប នៃប្រទេសកម្ពុជា
×![]()
គម្រោងអច្ឆរិយភាពនៃទន្លេមេគង្គ (Wonders of the Mekong) សូមដកស្រង់ត្រីមានស្រកាមួយប្រភេទចេញពីប្រភព៖ មគ្គុទ្ទេសក៍ ស្តីពីប្រភេទត្រីរស់នៅក្នុងដែនទឹកសាប នៃប្រទេសកម្ពុជា, fishbase.org និង iucnredlist.org ដែលជាប្រភេទត្រីមានរស់នៅក្នុងប្រទេសកម្ពុជា ឡាវ ថៃ និងវៀតណាម។ 
ត្រីអាចម៍កុក មានឈ្មោះវិទ្យាសាស្ត្រ (Labiobarbus siamensis) មានប្រវែងដងខ្លួនអតិបរមាសរុប ២២ ស.ម មានរស់នៅចាប់ពីពាក់កណ្តាលជម្រៅទឹក ដល់បាតនៃ ទន្លេ ស្ទឹង បឹង អូរ ប្រឡាយ និងតាមតំបន់វាលទំនាបលិចទឹក។ វាធ្វើចរាចរផ្លាស់ទីចេញទន្លេ ស្ទឹង បឹង អូរ ប្រឡាយ និងតាមតំបន់វាលទំនាបលិចទឹក ចូលទៅក្នុងព្រៃលិចទឹក ក្នុងរដូវវស្សា និងត្រឡប់ចូលទៅកន្លែងដើមវិញ នារដូវប្រាំង។ ត្រីអាចម៍កុកស៊ី ប្លង់តុងរុក្ខជាតិ ស្លែស្រទាប់បាត និង ស៊ីតិចតួចនូវប្លង់តុងសត្វជាអាហារ។ ភាគច្រើនប្រជាជនខ្មែរយើង និយមយកត្រីអាចម៍ធ្វើប្រហុក។ ត្រីអាចម៍កុក ត្រូវបានក្រុមអ្នកវិទ្យាសាស្ត្រកត់ត្រាចូលក្នុងបញ្ជីក្រហម IUCN Red List (Least Concern (LC) ) ក្នុងឆ្នាំ ២០១១ ជាប្រភេទត្រីដែលមានការព្រួយបារម្ភតិចតួច ដែលថានឹងអាចឈានទៅផុតពូជបាននោះ។
លក្ខណៈសម្គាល់៖ មានពុកមាត់ខ្លី។ ស្រកានៅលើខ្សែឆ្នូតចំហៀង មានចំនួន ៣៩ - ៤២ស្រកា។ ទ្រនង់ខ្នងទន់បែក មានចំនួន ២៥-២៨ ទ្រនង់។ ស្រកាជុំវិញគល់កន្ទុយមានចំនួន ២០-២៣ ស្រកា។ ព្រុយខ្នង និងព្រុយកន្ទុយមានពណ៌ខ្មៅស្រគាំ។
បញ្ហាប្រឈមចំពោះត្រីប្រភេទនេះ មានដូចជា៖ ហាក់ដូចជាត្រូវបានរងផលប៉ះពាល់តាមផ្នែកខ្លះចំពោះពួកវា ដោយសារទំបន់វារិអគ្គិសនី និងការបំពុលទឹក។
សូមចូលរួមជួយថែរក្សាព្រៃលិចទឹក ដែលជាជម្រកពងកូនរបស់មច្ឆជាតិ ឲ្យបានគង់វង្ស និងជួយលប់បំបាត់រាល់ការប្រើប្រាស់ឧបករណ៍នេសាទដែលច្បាប់ហាមគាត់គ្រប់ប្រភេទ ប្រយោជន៍ដើម្បីឲ្យត្រីគ្រប់ប្រភេទសម្បូរឡើងវិញ សម្រាប់ទុកឲ្យកូនចៅយើងជំនាន់ក្រោយ។
© រក្សាសិទ្ធិដោយ thmeythmey.com
