អន្តរជាតិ
នយោបាយអន្តរជាតិ
ពលរដ្ឋមីយ៉ាន់ម៉ាស្វាគមន៍អ្នកស្រី ស៊ូជី ដែលត្រឡប់ពីការការពារមុខមាត់ប្រទេសនៅឡាអេ
ពលរដ្ឋមីយ៉ាន់ម៉ាស្វាគមន៍ដំណើរវិលត្រឡប់របស់អ្នកស្រី អ៊ុងសាន ស៊ូជី ។ រូបភាព AFP
×![]()
ដោយ: តន ចាន់រិទ្ធារ៉ា
ពលរដ្ឋមីយ៉ាន់ម៉ារាប់នាក់ នៅថ្ងៃទី១៤ ខែធ្នូ បានឈរជាជួរៗតាមដងផ្លូវក្នុងរដ្ឋធានីណៃពិដោដើម្បីទទួលដំណើររបស់អ្នកស្រីទីប្រឹក្សារដ្ឋ អ៊ុងសាន ស៊ូជី ដែលត្រឡប់មកពីការការពារមុខមាត់ជាតិនៅឯតុលាការយុត្តិធម៌អន្តរជាតិ (ICJ) នៅទីក្រុងឡាអេ។ អ្នកស្រី ស៊ូជី ធ្វើដំណើរទៅតតាំងក្ដីនៅតុលាការដោយផ្ទាល់ក្នុងគោលដៅបដិសេធការចោទប្រកាន់របស់ប្រទេសអាហ្វ្រិកហ្គំប៊ីពាក់ព័ន្ធឧក្រិដ្ឋកម្មប្រឆាំងជនភាគតិចមូស្លីមរ៉ូហ៊ីងយ៉ា។
ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានទៅដល់ទឹកដីមីយ៉ាន់ម៉ាវិញហើយនៅថ្ងៃទី១៤ ខែធ្នូ បន្ទាប់ពីតតាំងក្ដីនៅឯតុលាការយុត្តិធម៌អន្តរជាតិទីក្រុងឡាអេ ប្រទេសហូឡង់។ តាមបណ្ដោយផ្លូវនានាក្នុងរដ្ឋធានីណៃពិដោ ប្រជាជនមីយ៉ាន់ម៉ាក្មេងចាស់ប្រុសស្រី ខ្លះឈរកាន់ទង់ជាតិ ខ្លះកាន់រូបថតមេដឹកនាំមីយ៉ាន់ម៉ា ហើយខ្លះទៀតកាន់បដាសាទរនោះ បានឈរទទួលអ្នកស្រី ស៊ូជី ដែលត្រឡប់មកពីការការពារប្រទេសលើឆាកអន្តរជាតិ។
រដ្ឋអាហ្វ្រិកខាងលិចហ្គំប៊ីដែលមានអង្គការកិច្ចសហប្រតិបត្តិការឥស្លាមនៅពីក្រោយ បានប្ដឹងមីយ៉ាន់ម៉ាទៅកាន់តុលាការអន្តរជាតិពីបទបំពានអនុសញ្ញាឆ្នាំ១៩៤៨ស្ដីពីការប្រល័យពូជសាសន៍ជុំវិញករណីធ្វើទុក្ខបុកម្នេញជនជាតិរ៉ូហ៊ីងយ៉ា ដែលត្រូវបានអង្គការសហប្រជាជាតិមើលឃើញថា មានបំណងប្រល័យពូជសាសន៍ផងដែរ។ ប្រទេសអាហ្វ្រិកមួយនេះ ចង់ឲ្យតុលាការចេញសេចក្ដីសម្រេចមួយបញ្ជាឲ្យមីយ៉ាន់ម៉ាផ្អាកសកម្មភាពរបស់ខ្លួន។
ជារឿងគួរឲ្យភ្ញាក់ផ្អើល អ្នកស្រី ស៊ូជី ក៏ចេញមុខតតាំងក្ដីដោយខ្លួនឯ។ ក្នុងសវនាការដែលបញ្ចប់នៅថ្ងៃទី១៣ ខែធ្នូ អ្នកស្រី ស៊ូជី ដែលជារដ្ឋមន្ត្រីការបរទេសផងនោះ បានចេញនិយាយការពារចំណាត់ការរបស់យោធាក្នុងប្រតិបត្តិការហិង្សានៅរដ្ឋរ៉ាក់ឃីនដែលបង្ខំឲ្យជនភាគតិចរ៉ូហ៊ីងយ៉ាជាង៧សែននាក់ភៀសខ្លួនទៅរស់នៅជំរំក្នុងទឹកដីបង់ក្លាដែសក្បែរខាង។ ខណៈទាត់ចោលការចោទប្រកាន់ប្រល័យពូជសាសន៍ អ្នកស្រី ស៊ូជី ក៏ទទួលស្គាល់ពីការប្រើកម្លាំងជ្រុលរបស់យោធាដែរ។
ចេញមុខដោយផ្ទាល់បែបនេះ អ្នកស្រី ស៊ូជី ទទួលបានទាំងការសរសើរ ទាំងពាក្យរិះគន់។ នៅក្នុងមីយ៉ាន់ម៉ា ការតតាំងក្ដីនៅឡាអេ ជាការការពារមុខមាត់ជាតិ ហើយប្រជាជនរាប់ពាន់នាក់ បានជូនដំណើរអ្នកស្រីពេលចាកចេញម្ដងទៅហើយ។ ប៉ុន្តែក្នុងក្រសែភ្នែកអន្តរជាតិ ម្ចាស់ពានរង្វាន់ណូបែលសន្តិភាពរូបនេះ ជាតំណាងឲ្យក្រុមយោធាដែលរំលោភបំពានធ្ងន់ធ្ងរលើជនភាគតិចរ៉ូហ៊ីងយ៉ា ដែលបាត់បង់ផ្ទះសម្បែង និងរងកាបំពានគ្រប់បែបយ៉ាង។
ធ្លាប់តែជាវីរនារីសិទ្ធិមនុស្ស និងប្រជាធិបតេយ្យ កេរិ៍្តឈ្មោះអ្នកស្រី ស៊ូជី បានរលាយបាត់បន្តិចម្ដងៗដោយសារវិបត្តិរ៉ូហ៊ីងយ៉ានេះ។ អ្នកស្រី ត្រូវបានដកហូតពានរង្វាន់ជាច្រើន ហើយកំពុងប្រឈមមុខការអំពាវនាវឲ្យដកហូតពានរង្វាន់ណូបែលដែលទទួលបាននៅឆ្នាំ១៩៩១ទៀតផង។ ប្រទេសជាច្រើន អង្គការអន្តរជាតិ និងសូម្បីតែតារាល្បីឈ្មោះ បានរិះគន់រដ្ឋាភិបាលស៊ីវិលដែលមិនព្រមចាត់វិធានការក្ដៅប្រឆាំងក្រុមយោធា៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
