ជាតិ
សង្គមជាតិ
ផ្លូវមុខព្រះលានជល់ដំរី នឹងបិទចរាចរណ៍ ជំនួសដោយផ្លូវវាងថ្មី
× សៀមរាប៖ កំណាត់ផ្លូវមុខព្រះលានជល់ដំរី នឹងបិទចរាចរណ៍ទាំងស្រុង ហើយជំនួសដោយផ្លូវវាងនៅក្បែរនោះ។ នេះបើតាមលោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា ដែលបាន ថ្លែងក្នុងកិច្ចប្រជុំបច្ចេកទេសលើកទី៣៣ និងកិច្ចប្រជុំពេញអង្គលើកទី២៦ នៃគណៈកម្មាធិការអន្ដរជាតិ អាយស៊ីស៊ី-អង្គរនៅព្រឹកថ្ងៃទី១០ ធ្នូ។
ក្នុងកិច្ចប្រជុំនេះ លោក យិត ចាន់ដារដ្ឋ បានលើកឡើងថា គម្រោងស្ថាបនាផ្លូវវាងព្រះលានជល់ដំរីនេះ បានសិក្សា និងឆ្លងកាត់ការឯកភាព ពីអ្នកជំនាញការ នៃគណៈកម្មការធិការអាយស៊ីស៊ី-អង្គររួចហើយ។ លោក យិត ចាន់ដារដ្ឋ បញ្ជាក់ដូច្នេះ៖«ផ្លូវថ្មីនេះនឹងចាប់ផ្តើមស្ថាបនានៅដើមឆ្នាំឬអំឡុងខែមករា ឆ្នាំ២០២០ខាងមុខនេះ ហើយគ្រោងនឹងប្រើពេល៨ខែដើម្បីស្ថាបនា។ ផ្លូវនេះជាប្រភេទសំណង់ផ្លូវស្រាល ដែលមានប្រវែងសរុប១,៤២៧ម៉ែត្រ ទទឹង៦ម៉ែត្រ»។
លោក យិត ចាន់ដារដ្ឋ បន្តពន្យល់ថា អាជ្ញាធរជាតិអប្សរា បានសិក្សាពីហានិភ័យដែលកំពុងកើតមាននៅលើផ្លូវសព្វថ្ងៃ ដែលការចរាចរណ៍នៅកៀកតួប្រាសាទ ដែលបង្កផលប៉ះពាល់ដោយសំឡេងញ័រ ឬដោយផ្សែងយានយន្តដល់ថ្មប្រាសាទជាដើម។ អាជ្ញាធរ នឹងស្ថាបនាផ្លូវថ្មីជំនួស គឺលើផ្លូវដីក្រហមសព្វថ្ងៃ ដែលមានទីតាំងមុខ បរិវេណប្រាសាទសួរព្រ័ត១២ ឆ្ពោះទៅមុខប្រាសាទព្រះពិធូរ បត់ឆ្វេងឆ្ពោះទៅខ្លោងទ្វារដីឆ្នាំង ចំណែកផ្លូវចាស់ អាជ្ញាធរនឹងរៀបចំកែប្រែ ដាំស្មៅ លម្អបរិស្ថានលានជល់ដំរី ឱ្យកាន់តែមានភាពទាក់ទាញ។
យោងតាមឯកសារដែលអាជ្ញាធរជាតិអប្សរារកឃើញ នាអំឡុងឆ្នាំ១៩០៦ បរិវេណព្រះលានជល់ដំរី មិនទាន់មានការស្ថាបនាផ្លូវទេ ពោលផ្លូវនេះទើបនឹងមានអំឡុងឆ្នាំ១៩១១ប៉ុណ្ណោះ។ រីឯផ្លូវក្រហមនៅមុខប្រាសាទសួរព្រ័ត ក៏កសាងដំណាលគ្នានោះដែរ៕
Tag:
ព្រះលានជល់ដំរី
អប្សរា
យិត ចាន់ដារដ្ឋ
© រក្សាសិទ្ធិដោយ thmeythmey.com