អន្តរជាតិ
ប្រមុខUN៖ សហគមន៍អន្តរជាតិ បាត់បង់ឱកាសដ៏សំខាន់ក្នុងការទប់ស្កាត់បម្រែបម្រួលអាកាសធាតុ
អគ្គលេខាធិការអង្គការសហប្រជាជាតិ Antonio Guterres មានវត្តមាននៅក្នុងកិច្ចប្រជុំ COP 25 នាទីក្រុងម៉ាឌ្រីដ អេស្ប៉ាញ, រូបភាព៖ AP
×![]()
ដោយ: ធៀន ភារិន្ទ
អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស (Antonio Guterres) បានប្រកាសយ៉ាងច្បាស់ៗថា សហគមន៍អន្តរជាតិ បានបាត់បង់ឱកាសដ៏សំខាន់មួយ ដើម្បីចាត់វិធានការកាត់បន្ថយបម្រែបម្រួលអាកាសធាតុនៅលើភពផែនដី។ ការអះអាងរបស់លោកបែបនេះ បន្ទាប់ពីលោកមើលឃើញក្នុងកិច្ចព្រមព្រៀង នាទីក្រុងម៉ាឌ្រីដ មានប្រទេសជាច្រើន បានបង្ហាញឆន្ទៈតិចតួចប៉ុណ្ណោះ ដើម្បីទប់ស្កាត់បម្រែបម្រួលអាកាសធាតុ។
សន្និសីទលើកទី២៥ ស្តីពីការដោះស្រាយបម្រែបម្រួលអាកាសធាតុ (COP25) ដែលបានប្រព្រឹត្តទៅរយៈ២សបា្តហ៍កន្លងមកនេះនៅទឹកដីអេស្ប៉ាញ បានបិទបញ្ចប់ហើយ ប៉ុន្តែបញ្ហាសំខាន់នៅតែ មិនទាន់ត្រូវបានដោះស្រាយដដែល។ ភាគីដែលបានចូលរួមក្នុងវេទិកានាទីក្រុងម៉ាឌ្រីដលើកនេះ បានបង្ហាញពីឆន្ទៈបន្តិចបន្តួចប៉ុណ្ណោះ ក្នុងការដោះស្រាយបម្រែបម្រួលអាកាសធាតុ និងការកាត់បន្ថយឧស្ម័នកាបូនិកក្នុងបរិយាកាស។
ប្រទេសធំៗជាច្រើន ដូចជាចិន ប្រេស៊ីល ឥណ្ឌា បានច្រានចោលមហិច្ឆតាធំៗ ដើម្បីដោះស្រាយបញ្ហាអាកាសធាតុ ការកាត់បន្ថយឧស្ម័នកាបូនិកជាដើម។ មហាអំណាចទាំងនោះ ក៏និយាយរិះគន់គ្នាទៅមកលើការប្ដេជ្ញាចិត្តដោះស្រាយបញ្ហាសាកលមួយនេះ ខណៈដែលប្រទេសក្រីក្រខ្វះខាតធនធាន នៅតែទាមទារឲ្យប្រទេសអ្នកមាន បញ្ចេញថវិកាឲ្យបានច្រើនថែមទៀត។
ទាក់ទងទៅនឹងបញ្ហាខាងលើ នៅថ្ងៃទី១៥ ខែធ្នូ ប្រមុខអង្គការសហប្រជាជាតិ អាន់តូនីញ៉ូ ហ្គូតេរ៉េស បានបញ្ជាក់យ៉ាងដូច្នេះថា៖ «សហគមន៍អន្តរជាតិ បានបាត់បង់ឱកាសដ៏សំខាន់ ដើម្បីបង្ហាញពីការបង្កើនមហិច្ឆតា លើការកាត់បន្ថយ ការកែប្រែ និងការគ្រាំទ្រផ្នែកហិរញ្ញវត្ថុ ដើម្បីដោះស្រាយវិបត្តិអាកាសធាតុ» ។ ក្នុងន័យនេះ លោកអគ្គលេខាធិការអង្គការសហប្រជាជាតិរូបនេះ មានការខកចិត្តជាខ្លាំង ចំពោះលទ្ធផលបន្តិចបន្តួចនៃកិច្ចប្រជុំ។
សេចក្តីប្រកាសចុងក្រោយនៃកិច្ចប្រជុំទីក្រុងម៉ាឌ្រីដ គ្រាន់តែអំពាវនាវឲ្យប្រទេសទាំងអស់កាត់បន្ថយការបញ្ចេញឧស្ម័យកាបូនិកជាបន្ទាន់តែប៉ុណ្ណោះ ប៉ុន្តែមិនមែនជាការចងកាតព្វកិច្ចសម្រាប់ប្រទេសទាំងអស់ឡើយ។ ក្នុងនោះ សេចក្តីប្រកាស បានអំពាវនាវឲ្យប្រទេសទាំងអស់ លុបចោលគម្លាតការបញ្ចេញឧស្ម័នកាបូនិកក្នុងពេលបច្ចុប្បន្ន និងអំឡុងជំនួបកិច្ចព្រមព្រៀងអាកាសធាតុទីក្រុងប៉ារីស ខណៈពេលបច្ចុប្បន្ន វាមានគម្លាតខ្លាំងពេក។
សូមបញ្ជាក់ថា កិច្ចប្រជុំដោះស្រាយបញ្ហាបម្រែបម្រួលអាកាសធាតុលើកទី២៥ ដំបូងឡើយគ្រោងបារព្ធធ្វើនៅប្រទេសស៊ីលី ប៉ុន្តែដោយសារវិបត្តិផ្ទៃក្នុង រដ្ឋាភិបាលស៊ីលី បានប្រកាសលុបចោលកិច្ចប្រជុំមួយនេះវិញ ដើម្បីការពារសុវត្ថិភាពប្រតិភូមកពីបណ្តាប្រទេសផ្សេងៗ។ ក្រោយមកទើបរដ្ឋាភិបាលអេស្ប៉ាញ ប្រកាសបើកកិច្ចប្រជុំមួយនេះ នៅទីក្រុងម៉ាឌ្រីដ ជំនួសវិញ៕
Tag:
បម្រែបម្រួលអាកាសធាតុ
អង្គការសហប្រជាជាតិ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
