អន្តរជាតិ
ប្រេសិតពិសេសអាមេរិកផ្ដាំទៅកូរ៉េខាងជើង៖ អាមេរិកមិនមានឱសានវាទសម្រាប់ការចរចាឡើយ លោក Stephen Biegun អ្នកតំណាងពិសេសអាមេរិកលើបញ្ហាកូរ៉េខាងជើង ធ្វើសន្និសីទរួមគ្នាជាមួយលោក Lee Do-hoon អ្នកតំណាងពិសេសកូរ៉េខាងត្បូង, រូបភាព៖ Reuter
× តំណាងពិសេសអាមេរិកលើបញ្ហាកូរ៉េខាងជើង លោកStephen Biegun នៅថ្ងៃទី១៦ ខែធ្នូ បានជំរុញឲ្យទីក្រុងព្យុងយ៉ាង ចូលតុចរចាស្តីពីការរំសាយកម្មវិធីនុយក្លេអ៊ែរសាជាថ្មី។ ដោយការច្រានចោលឱសានវាទកូរ៉េខាងជើង ដែលកាន់តែកៀកថ្ងៃនោះ លោក Stephen Biegun បានព្រលយថា ទីក្រុងវ៉ាស៊ីនតោន ព្រមពិភាក្សាជាមួយទីក្រុងព្យុងយ៉ាងលើរាល់បញ្ហាផលប្រយោជន៍ទាំងអស់។
លោក Stephen Biegun អ្នកតំណាងពិសេសអាមេរិកលើបញ្ហាកូរ៉េខាងជើង បានទៅដល់កូរ៉េខាងត្បូងនាថ្ងៃទី១៥ ខែធ្នូ ស្របពេដែលការប៉ះពាក្យសម្តីគ្នាអាមេរិក និងកូរ៉េខាងជើងបានកើនឡើងគួរឲ្យកត់សម្គាល់។ ការណ៍នេះ ត្រូវបានគេជឿថា ស្ថានភាពនៅលើឧបទ្វីបកូរ៉េ អាចវិវត្តទៅរកភាពដើមវិញ។ ពោលគឺ ជាស្ថានភាពមួយ ដែលកូរ៉េខាងជើងសាកល្បងមីស៊ីលបាលីស្ទិកអន្តរទ្វីបជាច្រើនគ្រាប់ មុនជំនួបមេដឹកនាំទាំងពីរលើកទីមួយ នាសិង្ហបុរី។
តាមរយៈសន្និសីទកាសែតរួមគ្នាជាមួយសមភាគីលោក Lee Do-hoon ក្នុងទឹកដីកូរ៉េខាងត្បូង លោក Biegun អះអាងថា អាមេរិក មិនមានឱសានវាទសម្រាប់ការចរចាទេ ហើយមានតែគោលដៅប៉ុណ្ណោះ។ ចំណែកគោលដៅនេះ គឺជាការចរចាជាមួយកូរ៉េខាងជើង។ ក្នុងន័យនេះ អ្នកតំណាងពិសេសអាមេរិក បានជំរុញឲ្យកូរ៉េខាងជើងចូលតុចរចាជាមួយអាមេរិកសាជាថ្មី បន្ទាប់ពីកិច្ចប្រជុំទីក្រុងវ៉ាស៊ីនតោន និងព្យុងយ៉ាងនៅស៊ុយអ៊ែតត្រូវបរាជ័យ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
បេសកជនពិសេសរូបនេះបានលើកឡើងថា៖ «យើងនៅទីនេះ[កូរ៉េខាងត្បូង] ហើយអ្នក [កូរ៉េខាងជើង] ដឹងពីរបៀបឆ្លើយតបយ៉ាងណាហើយ»។ ការព្រលយពាក្យពីសំណាក់មន្ត្រីអាមេរិកបែបនេះ គឺទំនងជាចង់ឲ្យកូរ៉េខាងជើងឆ្លើយតបមកវិញ ក្នុងសារជាវិជ្ជមាន ពាក់ព័ន្ធទៅនឹងការចរចារំសាយនុយក្លេអ៊ែរ។ អាចជាន័យព្រមានកូរ៉េខាងជើង មន្ត្រីជាន់ខ្ពស់អាមេរិករូបនេះ បានបញ្ជាក់ថា ការសាកល្បងអាវុធដ៏សំខាន់នាពេលខាងមុខ មិនមែនជារឿងល្អទេសម្រាប់កូរ៉េខាងជើង។
ពាក់ព័ន្ឌការសាកល្បងនាពេលខាងមុខនេះ លោក Biegun ទំនងជាចង់សំដៅទៅដល់សារព្រមានរបស់កូរ៉េខាងជើង ដែលបានដាក់ឲ្យអាមេរិកផ្លាស់ប្តូររបៀបវារៈរបស់ខ្លួនចេញ។
ក្រៅពីបញ្ហាខាងលើ មន្ត្រីជាន់ខ្ពស់អាមេរិករូបនេះ ក៏បានលើកឡើងទៀតថា សេចក្តីថ្លែងការណ៍ជាច្រើនរបស់មន្ត្រីកូរ៉េខាងជើងគឺជារឿង «បង្កសត្រូវ អវិជ្ជមាន និងមិនសំខាន់» ទាល់តែសោះ។ កន្លងមកសេចក្តីថ្លែងការណ៍របស់មន្ត្រីទីក្រុងព្យុងយ៉ាង ធ្លាប់បានឆ្លើយតប ទៅនឹងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិលើការសាកល្បងអាវុធថ្មីៗរបស់ទីក្រុងព្យុងយ៉ាង និងការឆ្លើយតបពាក្យសម្តីរបស់ដូណាល់ ត្រាំ ដែលហៅលោក គីម ជុងអ៊ុន ជា«បុរសរ៉ុក្កែត» និងបញ្ហាផ្សេងទៀតជាដើម។
សូមបញ្ជាក់ថា មួយរយៈចុងក្រោយនេះ ឧបទ្វីបកូរ៉េ ហាក់កាន់តែកើនឡើងកម្តៅខ្លាំង បន្ទាប់ពីកូរ៉េខាងជើង និងអាមេរិក បានប៉ះសម្តីគ្នា។ ជាពិសេសគឺ ការប្រកាសអំពីការសាកល្បងអាវុធថ្មីៗជាច្រើនលើកកន្លងមកនេះ ខណៈពេលឱសានវាទរបស់កូរ៉េខាងជើងជិតដល់ថ្ងៃកំណត់៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com