អន្តរជាតិ
បាតុករហុងកុងប៉ះទង្គិចជាមួយប៉ូលិស ខណៈលោកស្រី ការី ឡាំ នៅប៉េកាំង ប្រភពរូប៖ Bloomberg
× ក្រុមបាតុករហុងកុង បានប៉ះទង្គិចគ្នាជាមួយប៉ូលិស នៅយប់ថ្ងៃអាទិត្យ ១៥ ខែធ្នូ ខណៈប្រធានប្រតិបត្តិ លោកស្រី ការី ឡាំ បានធ្វើទស្សនកិច្ចនៅប៉េកាំង។ នៅទីនោះ លោកស្រី រំពឹងនឹងធ្វើបច្ចុប្បន្នភាពជុំវិញបញ្ហាបាតុកម្មហិង្សាដែលញាំញីទីក្រុងនេះអស់ពេលជាង៦ខែ ទៅដល់លោកប្រធានាធិបតីចិន ស៊ី ជិនភីង ។
ផ្លូវក្នុងតំបន់ Mong Kok ដែលជាកន្លែងសម្រាប់ភ្ញៀវទេសចដ៏ល្បីល្បាញដោយសារផ្សាររាត្រីខ្លួន ត្រូវបានរារាំងដោយដុំឥដ្ឋ ខណៈក្រុមបាតុករបានចោលដបទឹកថ្ម និងសម្ភារផ្សេងៗទៀតទៅលើមន្ត្រីប៉ូលិស នៅវេលាម៉ោងប្រមាណ១១យប់ នាថ្ងៃអាទិត្យ។ ជាការឆ្លើយតប ប៉ូលិស បានបាញ់ឧស្ម័នបង្ហូរទឹកភ្នែកលើពួកបាតុករ។ នេះបើតាមសេចក្តីថ្លែងការណ៍របស់រដ្ឋាភិបាលហុងកុង។ ការតវ៉ានេះ បានអូសបន្លាយរហូតដល់ម៉ោង ១៖៣០ ព្រឹកថ្ងៃចន្ទ ដោយគេឃើញថា បាតុករបានវាយកម្ទេចបង្គោលភ្លើងចរាចរណ៍ ហើយប៉ូលិសបានស្រែកគំរាមកាន់តែខ្លាំង។
ការប៉ះទង្គិចនៅយប់ថ្ងៃអាទិត្យនេះ កើតឡើងក្រោយពីមានការស្ងប់ស្ងាត់ជាងមួយសប្តាហ៍ ហើយស្របពេលដែលលោកស្រី ការី ឡាំ បានធ្វើដំណើរទៅកាន់ទីក្រុងប៉េកាំង ។ ថ្លែងក្នុងសន្និសីទព័ត៌មានមួយ កាលពីសប្តាហ៍មុន លោកស្រី អះអាងថា គោលដៅនៃទស្សនកិច្ចនេះ គឺដើម្បីផ្តល់របាយការណ៍លម្អិតអំពីអ្វីបានកើតឡើងក្នុងទីក្រុងហុងកុង ក្នុងរយៈពេល១ឆ្នាំមកនេះ ហើយជាពិសេស អ្វីដែលបានកើតឡើងក្នុងទីក្រុងហុងកុង ក្នុងរយៈពេល៦ខែចុងក្រោយ។
ឆ្លងកាត់ភាពវឹកវរនេះ រដ្ឋាភិបាលចិន បានគាំទ្រជានិច្ចចំពោះលោកស្រី ការី ឡាំ ទោះបីជាប្រជាប្រិយភាពលោកស្រី ក្នុងទីក្រុងនេះ បានធ្លាក់ចុះដល់កម្រិតទាបកំណត់ត្រាក៏ដោយក្តី។ ចំណែក មន្ត្រីចិន បានថ្កោលទោសក្រុមបាតុករ ហើយថែមទាំងបានសម្តែងការគាំទ្រចំពោះចំណាត់ការរបស់ប៉ូលិសហុងកុងទៀតផង។
សូមបញ្ជាក់ថា បាតុកម្ម បានផ្ទុះឡើងក្នុងទីក្រុងហុងកុង តាំងពីខែមិថុនាមកម្ល៉េះ ដោយកាលនោះ ពលរដ្ឋហុងកុងជាង១លាននាក់បាននាំគ្នាធ្វើសកម្មភាពតវ៉ាតាមដងផ្លូវប្រឆាំងនឹងសំណើច្បាប់មួយដែលនឹងអនុញ្ញាតឲ្យធ្វើបត្យាប័នទៅកាន់ប្រទេសចិន។ ទោះបីជារដ្ឋាភិបាលលោកស្រី ការី ឡាំ នៅទីបំផុតទៅ បានសម្រេចដកហូតសំណើច្បាប់បត្យាប័ននេះ ការទាមទាររបស់បាតុករ បានរីកធំឡើងទៅជាការទាមទារលទ្ធិប្រជាធិបតេយ្យ៕
Tag:
ចិន
ហុងកុង
ការីឡាំ
ប៉េកាំង
© រក្សាសិទ្ធិដោយ thmeythmey.com