ក្រុមហ៊ុន Smart Axiata រាយការណ៍ពីការអភិវឌ្ឍវិស័យបច្ចេកវិទ្យាទូរគមនាគមន៍ ដល់សម្ដេច ហ៊ុន សែន

អត្ថបទពាណិជ្ជកម្ម

ក្រុមហ៊ុន Smart Axiata រាយការណ៍ពីការអភិវឌ្ឍវិស័យបច្ចេកវិទ្យាទូរគមនាគមន៍ ដល់សម្ដេច ហ៊ុន សែន

17, Dec 2019 , 3:05 pm

រូបភាព

ដោយ: ថ្មីៗ

រាជធានីភ្នំពេញ ថ្ងៃទី ១៧ ខែធ្នូ ឆ្នាំ២០១៩៖ លោក Tan Sri Jamaludin Ibrahim ដែលជានាយកចាត់ចែងទូទៅ និងជាប្រធាននាយកប្រតិបត្តិក្រុមហ៊ុនបុត្រសម្ព័ន្ធទាំងអស់ របស់ Axiata Group Berhad ជាម្ចាស់ភាគហ៊ុនធំរបស់ក្រុមហ៊ុន Smart Axiata ព្រមជាមួយលោក Thomas Hundt នាយកប្រតិបត្តិក្រុមហ៊ុន Smart Axiata និងលោក Asri Hassan នាយកទូទៅផ្នែកសហប្រតិបត្តិការនៃក្រុមហ៊ុន Axiata Group ត្រូវបានផ្តល់កិត្តិយសយ៉ាងខ្ពង់ខ្ពស់បំផុត ចូលជួបសម្តែងការគួរសម និងផ្តល់របាយការណ៍ជូនចំពោះ សម្តេច ហ៊ុន សែន នាយករដ្ឋមន្ត្រីកម្ពុជា ។

កិច្ចប្រជុំដែលត្រូវបានរៀបចំឡើងនៅវិមានសន្តិភាពនេះ គឺជាសាក្ខីភាពដ៏សំខាន់បំផុត ដែលឆ្លុះបញ្ចាំងអំពីកិច្ចខិតខំប្រឹងប្រែង និងការតាំងចិត្តដ៏ម៉ុះម៉ុត របស់ក្រុមហ៊ុន Smart Axiata និងក្រុមហ៊ុនជាម្ចាស់ភាគហ៊ុន(Axiata Group Berhad) ក្នុងការចូលរួមចំណែកអភិវឌ្ឍវិស័យ ទូរគមនាគមន៍ បច្ចេកវិទ្យាគមនាគមន៍ និងព័ត៌មានកម្ពុជា ឲ្យកាន់តែមានភាពរីកចម្រើនបំផុត។ ប្រតិភូនៃកិច្ចប្រជុំខាងលើ បានពិភាក្សាគ្នាយ៉ាងស៊ីជម្រៅលើកិច្ចការងារសំខាន់ៗមួយចំនួន ក្នុងទិសដៅលើកម្ពស់ និងសម្រេចឲ្យបាន នូវសេដ្ឋកិច្ចបែបឌីជីថល ទិសដៅអភិវឌ្ឍបច្ចេកវិទ្យាជំនាន់ទី៥ (5G) សម្រាប់កម្ពុជា និងវិធានការជាអាទិភាពនានា សម្រាប់ការពង្រីកដែនសេវាគ្របដណ្តប់ និងសេវាអ៊ីនធឺណិតល្បឿនលឿន ទៅកាន់តំបន់ទីជនបទនានា។

ចំណុចទាំងអស់នេះ គឺមានភាពសមស្របបំផុតសម្រាប់ជូនទៅដល់យុវជនវ័យក្មេងកម្ពុជាទាំងអស់ ដែលពួកគាត់មានការយល់ដឹង និងតម្រូវការចាំបាច់លើសេវាទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន ហើយអនុលោមទៅតាមទស្សនវិស័យ របស់សម្តេច ហ៊ុន សែន ក្នុងការនាំមុខគេក្នុងតំបន់ ASEAN និងការតភ្ជាប់ និងកាត់បន្ថយគម្លាតឌីជីថល ទៅកាន់តំបន់ទីជនបទដាច់ស្រយាល។

ក្នុងអំឡុងពេលនៃកិច្ចប្រជុំនេះ ការចូលរួមចំណែកក្នុងសេដ្ឋកិច្ចជាតិ របស់ក្រុមហ៊ុន Smart Axiata ក៏ត្រូវបានលើកឡើងផងដែរ។ គិតត្រឹមដំណាច់ឆ្នាំ២០១៨ ក្រុមហ៊ុន Smart Axiata បានបណ្តាក់ទុនវិនិយោគច្រើនជាង ១,៤២ ប៊ីលានដុល្លារអាមេរិក (មួយពាន់បួនរយម្ភៃលានដុល្លារអាមេរិក) សម្រាប់ជាដើមទុន និងប្រតិបត្តិការចំណាយនានា ព្រមទាំងបានបង់ពន្ធអាករ និងកម្រៃនិយ័តកម្មនានា ច្រើនជាង ៣៧០លានដុល្លារអាមេរិក (បីរយចិតសិបលានដុល្លាអាមេរិក)។ ក្រុមហ៊ុន ក៏បានប្រើប្រាស់ថវិកាច្រើនជាង ១%(មួយភាគរយ) នៃចំណូលដុលសរុបប្រចាំឆ្នាំរបស់ខ្លូន ដែលមានចំនួនទឹកប្រាក់ច្រើនជាង ៣លានដុល្លារអាមេរិក (បីលានដុល្លារអាមេរិក) ដើម្បីគាំទ្រដល់កម្មវិធី និងសកម្មភាពទទួលខុសត្រូវផ្នែកសង្គម (CSR Program) លើវិស័យមួយចំនួនរួមមាន៖ អប់រំ បរិស្ថាន កីឡាសហគមន៍ និងវិស័យបច្ចេកវិទ្យា និងនវានុវត្តន៍។ ដោយឡែកក្រុមហ៊ុន Smart Axiata ក៏បានបង់វិភាគទាន ចូលមូលនិធិកាតព្វកិច្ចសេវាសកលទូរគមនាគមន៍ (មូលនិធិ ក.ស.ទ) និងមូលនិធិការកសាងសមត្ថភាព និងការស្រាវជ្រាវ និងការអភិវឌ្ឍវិស័យទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន (មូលនិធិ ស.អ) ចំនួន៣% (បីភាគរយ) នៃចំណូលដុលសរុបប្រចាំឆ្នាំរបស់ខ្លួន សម្រាប់ការអភិវឌ្ឍហេដ្ឋារចនាសម្ពន្ធ និងបណ្តាញ សេវាអ៊ីនធឺណិតល្បឿនលឿន និងអភិវឌ្ឍន៍ធនធានមនុស្ស លើវិស័យបច្ចេកវិទ្យាគមនាគមន៍ និងព័ត៌មាននៅកម្ពុជា។

ក្រៅពីការរីកចម្រើនខ្លាំង លើការប្រើប្រាស់ផ្នែកសេវាទិន្នន័យ ព្រមជាមួយនិងការគ្រប់គ្រងគ្រប់ជ្រុងជ្រោយលើផ្នែកហិរញ្ញវត្ថុរបស់ក្រុមហ៊ុន Smart Axiata ប្រតិភូនៃកិច្ចប្រជុំក៏បានលើកឡើង អំពីសារៈសំខាន់នៃការរក្សាឲ្យបាននូវស្ថិរភាព នៃវិស័យទូរគមនាគមន៍ ស្របពេលកម្ពុជាបាន និងកំពុងបោះជំហាន ទៅកាន់ការវិនិយោគលើបច្ចេកវិទ្យាជំនាន់ទី៥ (5G) និងបច្ចេកវិទ្យាទូរគមនាគមន៍ទំនើបទាន់សម័យផ្សេងៗទៀត សម្រាប់គាំទ្រទៅដល់សេដ្ឋកិច្ចបែបឌីជីថល។

អំពីក្រុមហ៊ុន Smart Axiata

ក្រុមហ៊ុន Smart Axiata Co., Ltd គឺជាប្រតិបត្តិករទូរគមនាគមន៍ឈានមុខគេនៅកម្ពុជា ដែលនាពេលបច្ចុប្បន្នបាននឹងកំពុងបម្រើអតិថិជនច្រើនជាង៨ (ប្រាំបី)លាននាក់ ក្រោមស្លាកសញ្ញា “Smart”។ ក្រុមហ៊ុន Smart Axiata គឺជាបុត្រសម្ព័ន្ធនៃក្រុមហ៊ុនមេ មានឈ្មោះថា Axiata Group Berhard ដែលជាក្រុមហ៊ុនផ្តល់សេវាទូរគមនាគមន៍ធំជាងគេបង្អស់មួយ ក្នុងចំណោមក្រុមហ៊ុនធំៗនានាក្នុងទ្វីបអាស៊ី។

ក្រុមហ៊ុន Smart គឺប្រតិបត្តិករទូរគមនាគមន៍ចល័តដែលមានភាពឈានមុខគេបង្អស់ផ្នែកសេវាបច្ចេកវិទ្យាទំនើបទាន់សម័យក្នុងព្រះរាជាណាចក្រកម្ពុជា។ នាឆ្នាំ២០១៤ Smart គឺជាប្រតិបត្តិករដំបូងបង្អស់ក្នុងប្រទេសកម្ពុជា ដែលបាននាំមកនូវបច្ចេកវិទ្យាទូរគមនាគមន៍សេវា 4G LTE ហើយក៏បានអភិវឌ្ឍន៍ខ្លួនឲ្យកាន់តែប្រសើរថែមទៀត តាមរយៈការដាក់ឲ្យដំណើការសេវាបច្ចេកវិទ្យា 4G+ (LTE Advanced) នាដើមឆ្នាំ២០១៦ និងនាដើមឆ្នាំ២០១៧ ។ ជាពិសេសក្រុមហ៊ុន ក៏បានធ្វើការណែនាំនូវសេវាបច្ចេកវិទ្យាថ្មីមួយទៀតគឺ 4G+ HD Voice ឬ VoLTE ដែលសេវានេះបានធ្វើឲ្យ Smart កាន់តែមានភាពជាអ្នកដឹកនាំផ្នែកសេវាទិន្នន័យនៅក្នុងទីផ្សារនៃកម្ពុជា។ ជាមួយទៅនឹងបច្ចេកវិទ្យាដ៏សម្បូរបែបរួមមាន៖ សេវាបច្ចេកវិទ្យា 2G, 2.5G, 3G និង3.75G Smart បាននឹងកំពុងផ្តល់សេវាគ្របដណ្តប់ក្នុងតំបន់ប្រជាសាស្ត្រច្រើនជាង៩៨(កៅសិបប្រាំបី)ភាគរយទូទាំងកម្ពុជា ។

ដើម្បីឲ្យកាន់តែទំនើបទាន់សម័យស្របទៅតាមបរិបទសង្គមរស់នៅ ក្រុមហ៊ុន Smart បាននឹងកំពុងប្លែងខ្លួនយ៉ាងសកម្មទៅជាប្រតិបត្តិករបែបឌីជីថល តាមរយៈការផ្តល់ជូននូវសេវាកម្មឌីជីថលជាច្រើនក្នុងនោះរួមមាន៖ ការចាប់ដៃគូរជាមួយភាគីអន្តរជាតិដែលមានឈ្មោះល្បីរន្ទឺនានាដូចជា៖ Universal Music, Apple, Facebook និង iflix ហើយក៏មានសេវាកម្មបែប ឌីជីថលនានាទៀតដូចជា SmartLuy, Smart Insurance, SmartPay, Smart Music និង SmartNas។

ក្រុមហ៊ុន Smart មានទស្សនៈវិស័យយ៉ាងម៉ុតមាំ នឹងក្លាយខ្លួនជាប្រតិបត្តិករបែបឌីជីថលឈានមុខគេបង្អស់ និងដើរតួនាទីយ៉ាងសកម្មក្នុងការចូលរួមចំណែកអភិវឌ្ឍន៍សេដ្ឋកិច្ចជាតិ។ ក្រុមហ៊ុន Smart មានបុគ្គលិកនិយោជិតសរុបប្រមាណជាង១,០០០(មួយពាន់)នាក់ ក្នុងនោះរួមបញ្ចូលទាំងនិយោជិតក្នុងស្រុក និងនិយោជិតបរទេស។ Smart បាននឹងកំពុងយកចិត្តទុកដាក់ជាទីបំផុតចំពោះអតិថិជន បុគ្គលិកនិយោជិតរបស់ខ្លួន និងប្រជាពលរដ្ឋទាំងអស់នៅកម្ពុជា តាមរយៈការនាំមកនូវសេវាបច្ចេកវិទ្យាលំដាប់ពិភពលោក បទពិសោធ៍ឌីជីថលល្អឥតខ្ចោះនានា និងពិសេសគឺការចូលរួមយ៉ាងសកម្មទៅលើការងារទទួលខុសត្រូវសង្គម។

Smart ជីវិតរស់រវើក!

ក្រុមហ៊ុន Smart Axiata Co., Ltd.

No. 464A, មហាវិថីព្រះមនីវង្ស, ទន្លេបាសាក់, ខណ្ឌចំការមន, ភ្នំពេញ, កម្ពុជា

ទូរស័ព្ទ: +855 10 201 000

www.smart.com.kh

សម្រាប់ព័ត៌មានបន្ថែម សូមទាក់ទង

លោក គាំ ទីវា

ទូរស័ព្ទ៖ +855 10 202 271

អ៊ីម៉ែល៖ [email protected]

សម្រាប់ព័ត៌មានបន្ថែមស្តីអំពីក្រុមហ៊ុន Smart Axiata សូមចូលទៅកាន់បណ្តាញទំនាក់ទំនងសង្គម និងគេហទំព័ររបស់ក្រុមហ៊ុន ដូចខាងក្រោម៖ www.facebook.com/SmartAxiata និង www.smart.com.kh៕