អន្តរជាតិ
អតីតប្រធានាធិបតីប៉ាគីស្ថាន Musharraf ត្រូវកាត់ទោសប្រហារជីវិតពីបទ «ក្បត់ជាតិ» លោក Pervez Musharraf អតីតមេដឹកនាំសឹក ប៉ាគីស្ថាន (AFP)
× តុលាការពិសេសមួយ ក្នុងប្រទេសប៉ាគីស្ថាន បានកាត់ទោសប្រហារជីវិតកំបាំងមុខអតីតមេដឹកនាំសឹក លោក Pervez Musharraf លើបទចោទ ក្បត់ជាតិកម្រិតធ្ងន់ និងធ្វើវិទ្ធង្សនារដ្ឋធម្មនុញ្ញ។ បច្ចុប្បន្ន ពិរុទ្ធជនរូបនេះ កំពុងរស់នៅដោយនិរទេសខ្លួននៅឌូបៃ ។
«លោក Pervez Musharraf ត្រូវបានរកឃើញថាមានទោសត្រង់មាត្រា ៦ ដោយល្មើសរដ្ឋធម្មនុញ្ញរបស់ប្រទេសប៉ាគីស្ថាន»។ មន្ត្រីការិយាល័យច្បាប់របស់រដ្ឋាភិបាល លោក Salman Nadeem ប្រាប់ទីភ្នាក់ងារព័ត៌មាន Reuters នៅថ្ងៃអង្គារ ១៧ ធ្នូនេះ។
តាមការចុះផ្សាយរបស់ទូរទស្សន៍កាតា Aljazeera លោក Musharraf ដែលបច្ចុប្បន្នកំពុងរស់នៅដោយនិរទេសខ្លួនក្នុងទីក្រុង ឌូបៃ ប្រទេសអេមីរ៉ាតអារ៉ាប់រួម ពុំទាន់បានឆ្លើយតបអ្វីឡើយចំពោះដំណឹងកាត់ទោសនេះ។ យ៉ាងណាមិញ កន្លងទៅ លោកធ្លាប់បានច្រានចោលរាល់ការចោទប្រកាន់ទាំងអស់មកលើលោក។
សវនាការកាត់ទោសបទចោទ «ក្បត់ជាតិ» ប្រឆាំងលោក Musharraf បានចាប់ផ្តើម ក្នុងឆ្នាំ២០១៤។ សកម្មភាពលោកក្នុងឆ្នាំ២០០៧ ជាមូលដ្ឋានដ៏សំខាន់មួយក្នុងករណីទោសក្បត់ជាតិប្រឆាំងអតីតមេដឹកនាំវ័យ៧៦ឆ្នាំរូបនេះ។ កាលនោះគឺនៅថ្ងៃ ៣ វិច្ឆិកា ឆ្នាំ២០០៧ មេដឹកនាំសឹករូបនេះ បានប្រកាសដាក់រដ្ឋក្នុងភាពអាសន្ន និងបានព្យួររដ្ឋធម្មនុញ្ញ ព្រមទាំងបានឃុំឃាំងមេដឹកនាំនយោបាយជាន់ខ្ពស់ និងចៅក្រម។
ក្រោយមក វិបត្តិនយោបាយនេះកាន់តែដុនដាប ក្នុងខែមីនា ឆ្នាំ ២០០៧ ដោយកាលនោះ លោក Musharraf បានប៉ុនប៉ុងដកហូតតំណែងរបស់ប្រធានយុត្តិធម៌របស់តុលាការកំពូលប៉ាគីស្ថាន គឺលោក Iftikhar Muhammad Chaudhry ។ ជាទង្វើមួយដែលតុលាការកំពូល ក្រោយមក បានចាត់ទុកថា ខុសច្បាប់។ ការប៉ុនប៉ុងនេះ បានរងការបាតុកម្មយ៉ាងខ្លាំងក្លាពីសំណាក់មេធាវីនៅទូទាំងប្រទេស ។
លោក Musharraf បានចូលក្តោបអំណាចដោយការធ្វើរដ្ឋប្រហារយោធាមួយ ក្នុងឆ្នាំ១៩៩៩ ហើយបានដឹកនាំប្រទេសក្នុងតំបន់អាស៊ីខាងត្បូងនេះអស់ពេល៩ឆ្នាំ។ ក្នុងឆ្នាំ២០០៨ លោកបានសុំលាលែងពីតំណែងជាប្រធានាធិបតីទី១០របស់ប៉ាគីស្ថាន ក្រោយពីបក្សប្រឆាំងបានព្យាយាមបណ្តេញរូបលោកពីតំណែងកំពូលនេះ៕
Tag:
ប៉ាគីស្ថាន
តុលាការ
Pervez Musharraf
© រក្សាសិទ្ធិដោយ thmeythmey.com