ក៏ដូចទៅនឹងស្បែកដែរ ស្ថានភាពនៃសក់របស់អ្នក គឺជាសញ្ញាមួយនៃសុខភាពល្អ។ កោសិកាដែលបង្កើតជាសរសៃសក់នីមួយៗទាមទារឱ្យមានការផ្គត់ផ្គង់ជាប្រចាំនូវសារធាតុចិញ្ចឹមសំខាន់ៗដើម្បីរក្សាបាននូវភាពរឹងមាំស្រស់ស្អាត។ អ្វីដែលអ្នកទទួលទានក៏ជះឥទ្ធិពលលើស្ថានភាពនៃសក់គួរឱ្យកត់សម្គាល់ផងដែរ។
ដូច្នេះថ្ងៃនេះយើង នឹងបង្ហាញឱ្យដឹងពីអ្វីដែលអ្នកគួរទទួលទានដើម្បីទទួលបានសក់ស្រស់ស្អាតមានសុខភាពល្អ ៖
១. វីតាមីន C
អាហារដែលមានផ្ទុកសម្បូរទៅដោយវីតាមីន C គួរត្រូវបានរួមបញ្ចូលក្នុងរបបអាហារប្រចាំថ្ងៃប្រសិនបើអ្នកចង់រក្សាបាននូវសុខភាពសក់ល្អប្រសើរ។ នោះក៏ព្រោះតែវីតាមីន C ជួយបង្កើនការស្រូបយកជាតិដែក ហើយការពាររាងកាយពីការរលាកនិងជំងឺផ្សេងៗដែលអាចបណ្ដាលឱ្យសក់ផុយស្រួយ បែកចុង និងឆាប់ជ្រុះ។ លើសពីនេះទៅទៀតអាហារដែលមានផ្ទុកសម្បូរទៅដោយវីតាមីន C ដែលជួយបង្កើនការផលិតកូឡាជែន ហើយពង្រឹងឫសសក់ឱ្យកាន់តែរឹងមាំផងដែរ។
២. ការ៉ុត
បន្លែមើមនេះជាប្រភពដ៏ល្អបំផុតមួយនៃវីតាមីន A ដែលចាំបាច់សម្រាប់ការផលិតជាតិប្រេងធម្មជាតិនៃសក់ ដើម្បីរក្សាបាននូវស្បែកក្បាលមានសុខភាពល្អ។ ប្រសិនបើគ្មានជាតិប្រេងគ្រប់គ្រាន់ទេនោះស្បែកក្បាលនឹងប្រែជាស្ងួត ហើយរមាស់។
៣. អាស៊ីតខ្លាញ់អូមេហ្កា ៣
អាស៊ីតខ្លាញ់ល្អអាចជួយចិញ្ចឹមសក់ ហើយបង្កើនការលូតលាស់ធ្វើឱ្យសក់ដុះលឿនឆាប់ក្រាស់។ ប្រភពដ៏ប្រសើរបំផុតនៃអាស៊ីតខ្លាញ់អូមេហ្កា ៣ គឺត្រីសម្បូរខ្លាញ់។
៤. ទឹកដោះគោ
មានផ្ទុកសម្បូរទៅដោយជាតិកាល់ស្យូមដែលមិនត្រឹមតែល្អសម្រាប់ឆ្អឹងនិងធ្មេញប៉ុណ្ណោះទេ ប៉ុន្តែក៏សំខាន់ចំពោះសុខភាពសក់ផងដែរ។ ដូច្នេះកុំភ្លេចរួមបញ្ចូលទឹកដោះគោក្នុងរបបអាហារប្រចាំថ្ងៃ។
៥. វីតាមីន E
វីតាមីន E ជួយឱ្យឫសនៃសក់ធ្វើការកាន់តែមានប្រសិទ្ធភាព និងបង្កើនចរន្តឈាមជំរុញការលូតលាស់សក់។ វាក៏ជួយរក្សាកម្រិតតុល្យភាព PH និងជាតិប្រេងទប់ស្កាត់ភាពរាំងស្ទះដល់ការលូតលាស់នៃសក់ផងដែរ។ ប្រភពដ៏ប្រសើរបំផុតនៃវីតាមីន E រួមមានផ្លែបឺរ និងគ្រាប់ធញ្ញជាតិ។
៦. ស៊ុត
ជាប្រភពដ៏ប្រសើរនៃសារធាតុ Biotin និង Protein ដែលសំខាន់សម្រាប់សុខភាពស្បែកក្បាល ព្រមទាំងការលូតលាស់នៃសក់៕
ត្រួតពិនិត្យដោយ www.health.com.kh