អន្តរជាតិ
លោក មូន ចេអ៊ីន តែងតាំងអតីតប្រធានសភាជាតិជានាយករដ្ឋមន្ត្រី លោក ជុង សេឃ្យុន អតីតប្រធានសភាជាតិ ត្រូវបានប្រធានាធិបតី មូន ចេអ៊ីន តែងតាំងជានាយករដ្ឋមន្រ្តី។ រូបភាព AFP
× ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១៧ ខែធ្នូ បានតែងតាំងអតីតប្រធានសភាជាតិ ជុង សេឃ្យុន (Chung Sye-kyun) ឲ្យធ្វើជានាយករដ្ឋមន្ត្រីថ្មី។ បេក្ខភាពលោក ជុង ដែលជាអ្នកជំនាញផ្នែកសេដ្ឋកិច្ច និងមុខញញឹមប្រិមប្រិយ ត្រូវបានមើលឃើញថា ជាចំណាត់ការបន្ថែមរបស់លោក មូន ក្នុងការជំរុញសេដ្ឋកិច្ចប្រទេសដែលធ្លាក់ចុះ។ ប៉ុន្តែការតែងតាំងនេះ ក៏រងការរិះគន់ ដ្បិតលោក ជុង ធ្លាប់ដឹកនាំស្ថាប័ននីតិបញ្ញត្តិរួចហើយដែរ។
លោក ជុង សេឃ្យុន ដែលជាអតីតប្រធានរដ្ឋសភា និងបច្ចុប្បន្នជាសមាជិកសភាសម្រាប់អាណត្តិទី៦ ហើយនោះ ត្រូវបានលោកប្រធានាធិបតី មូន ចេអ៊ីន ជ្រើសតាំងជានាយករដ្ឋមន្ត្រីជំនួសលោក លី ណាក់យុន ដែលទំនងជាត្រឡប់ចូលឆាកនយោបាយម្ដងទៀត។ លោក មូន បាននិយាយលើកសរសើរលោក ជុង ថា ជាមនុស្សម្នាក់មានសមត្ថភាពក្នុងការជំរុញសេដ្ឋកិច្ចប្រទេសឡើងវិញ ដែលកំពុងតែជួបបញ្ហាថមថយល្បឿន។
ក្នុងសន្និសីទសារព័ត៌មាននៅវិមានប្រធានាធិបតី លោក មូន លើកឡើងថា៖ «លោក ជុង តែងតែអនុវត្តគោលនយោបាយដោយការស្ដាប់ ឲ្យតម្លៃលើកិច្ចសន្ទនា និងការសម្របសម្រួលជាមួយបុគ្គលិកលក្ខណៈទន់ភ្លន់របស់លោក។»
លោក ជុង ដែលជាសមាជិកសភាបក្សប្រជាធិបតេយ្យកំពុងកាន់អំណាច មានបទពិសោធក្រាស់ក្រែលលើកិច្ចការសេដ្ឋកិច្ច។ លោកធ្លាប់ធ្វើការក្នុងក្រុមហ៊ុនឯកជនរយៈពេល១៧ឆ្នាំមុនប្រឡូកចូលនយោបាយ ក្លាយជារដ្ឋមន្ត្រីពាណិជ្ជកម្មពីឆ្នាំ២០០៦ ដល់ឆ្នាំ២០០៧ និងចុងក្រោយជាប្រធានសភាជាតិ។ លោក ត្រូវបានចាត់ទុកជាអ្នកនយោបាយម្នាក់ដែលប្រិមប្រិយ មុខរីកមិនដាច់ រហូតត្រូវបានអ្នកសារព័ត៌មានកូរ៉េខាងត្បូងផ្ដល់រហស្សនាមថា «បុរសមុខញញឹម»។
តាមច្បាប់កូរ៉េខាងត្បូង បេក្ខភាពរបស់លោក ជុង ត្រូវការការយល់ព្រមពីសភាជាមុនសិន។ សវនាការដើម្បីជជែកពីបេក្ខភាពលោក ជុង បានចាប់ផ្ដើមនៅថ្ងៃទី១៨ ខែធ្នូនេះ។ យ៉ាងណាមិញ សំឡេងប្រឆាំង បានលាន់រន្ថើនបណ្ដើរៗហើយ។ គណបក្សសេរីភាពកូរ៉េដែលជាបក្សប្រឆាំងហៅការតែងតាំងនេះ ជាការប្រកាសចេតនាទៅរករបបផ្ដាច់ការ ដែលបំផ្លាញការបែងចែកអំណាចនីតិបញ្ញត្តិ តុលាការ និងនីតិប្រតិបត្តិ ក៏ដូចជាការយកសភាជាទាសករផងដែរ។
តាមពិតទៅ នៅកូរ៉េខាងត្បូង តំណែងនាយករដ្ឋមន្ត្រីមិនសូវមានអំណាចឡើយ ខណៈប្រទេសនេះអនុវត្តប្រព័ន្ធដឹកនាំរដ្ឋបែបប្រធានាធិបតីនិយម ដែលជាប្រមុខរដ្ឋផង និងជាប្រមុខរដ្ឋាភិបាលផង។ នាយករដ្ឋមន្ត្រី គ្រាន់តែជាជំនួយការក្នុងការដឹកនាំកិច្ចការក្នុងប្រទេសប៉ុណ្ណោះ។ ប៉ុន្តែក្នុងអាណត្តិលោក មូន កៅអីនាយករដ្ឋមន្ត្រី ហាក់មានអំណាចខ្លាំង ហើយចេញមុខចេញមាត់ញឹកញាប់លើឆាអន្តរជាតិផងដែរ។ កន្លងទៅ លោក មូន បានផ្ដល់សិទ្ធិឲ្យលោក លី មានជំនួបកំពូលជាមួយមេដឹកនាំបរទេសទៀតផង៕
Tag:
កូរ៉េខាងត្បូង
មូន ចេអ៊ីន ជុង សេឃ្យុន
© រក្សាសិទ្ធិដោយ thmeythmey.com