ម្ចាស់មេដាយមាស ខាន់ ចេសា ប្តេជ្ញាជួយកម្ពុជាលើការប្រកួតឆាកអន្តរជាតិ បើសិនត្រូវការនាង

កីឡាជាតិ

ជាតិ

ម្ចាស់មេដាយមាស ខាន់ ចេសា ប្តេជ្ញាជួយកម្ពុជាលើការប្រកួតឆាកអន្តរជាតិ បើសិនត្រូវការនាង

18, Dec 2019 , 10:50 am

រូបភាព

ដោយ:

ម្ចាស់មេដាយមាសកីឡាស៊ីហ្គេមលើកទី៣០នៅប្រទេសហ្វីលីពីន ខាន់ ចេសា ប្តេជ្ញាបន្តប្រកួតតំណាងឲ្យកម្ពុជាក្នុងព្រឹត្តិការណ៍អន្តរជាតិផ្សេងៗ បើកម្ពុជាត្រូវការរូបនាង។ កីឡាការិនីមានឱពុកខ្មែរ និងម្តាយជនជាតិម៉ិកស៊ិកកាត់អាមេរិក ប្តេជ្ញាបែបនេះក្នុងពិធីប្រគល់និងទទួលថវិកាលើកទឺកចិត្តពីណាហ្គាវើលដ៍នៅថ្ងៃទី១៦ ធ្នូ ដោយនាងទទួលបានថវិកាចំនួន៦ពាន់ដុល្លារ។ ចេសា អះអាងថា ការប្រកួត SEA Games មានភាពងាយស្រួលជាងជាងការប្រកួតកីឡា Asian Games នៅឥណ្ឌូណេស៊ីកាលពីឆ្នាំ២០១៨ ដែលនាងដណ្តើមបានមេដាយមាសដូចគ្នា។

គ្មានឡើយពាក្យថា«ទេ»សម្រាប់កីឡាការិនីខ្មែរ-អាមេរិក ខាន់ ចេសា ប្រសិនបើកម្ពុជាត្រូវការ នាង ដើម្បីចូលរួមប្រកួតប្រជែងដណ្តើមជើងឯកក្នុងព្រឹត្តិការណ៍អន្តរជាតិនានា នៅថ្ងៃអនាគត។ លើសពីនេះ នាង ប្តេជ្ញានឹងបន្តប្រកួតតំណាងឲ្យប្រទេសកំណើតរបស់ឪពុកខ្លួន ព្រោះចង់លើកស្ទួយមុខមាត់ និងសាងភាពល្បីល្បាញជូនប្រទេសកម្ពុជានៅលើឆាកអន្តរជាតិ។

ឆ្លើយសំនួររបស់លោក ញ៉ាន សុខវិសាល អ្នកសម្របសម្រួលក្នុងកម្មវិធីប្រគល់ថវិកាលើកទីកចិត្តរបស់ណាហ្គាវើលដ៍ជូនម្ចាស់មេដាយមាសកីឡាស៊ីហ្គេម ដែលសួរថា តើកីឡាការិនី ខាន់ ចេសា នឹងបន្តប្រកួតតំណាងឲ្យកម្ពុជាទៀតឬយ៉ាងណា? ចេសា ឆ្លើយយ៉ាងខ្លីថា៖«ខ្ញុំនឹងនៅតែប្រកួតតំណាងឲ្យកម្ពុជាបើពួកគេត្រូវការខ្ញុំ»។ កីឡាការិនីរូបនេះ ជំរុញឲ្យយុវជនយុវនារីងាកមកលេងកីឡាជឺជិតស៊ូឲ្យបានច្រើន ព្រោះកីឡានេះមិនត្រឹមតែធ្វើឲ្យរាងកាយរឹងមាំប៉ុណ្ណោះទេ ថែមទាំងជួយពង្រឹងស្មារតីទៀតផង។

នៅពេលសួរសំនួរប្រៀបធៀបរវាងការប្រកួតស៊ីហ្គេមនិងកីឡាអាស៊ី កីឡាការិនីខ្មែរ-អាមេរិករូបនេះឆ្លើយដោយគ្មានស្ទាក់ស្ទើរថា ការប្រកួតកីឡាស៊ីហ្គេមមានភាពងាយស្រួលជាងការប្រកួតកីឡាអាស៊ី ព្រោះនាងឆ្លងកាត់តែ៣ប្រកួតប៉ុណ្ណោះក្នុងការទទួលបានមេដាយមាស ខណៈកីឡាអាសុីត្រូវឆ្លងកាត់ជាច្រើនប្រកួត ទម្រាំទទួលបានមេដាយ។

គួររំលឹកថាកីឡាការិនី ខាន់ ចេសា ជាម្ចាស់មេដាយមាសកីឡាស៊ីហ្គេមលើកទី៣០នៅប្រទេសហ្វីលីពីន លើប្រភេទកីឡាជឺជិតស៊ូក្នុងទម្ងន់ក្រោម៤៩គីឡូក្រាម ក្រោយយកឈ្នះកីឡាការិនីម្ចាស់ផ្ទះហ្វីលីពីន Napolis Jenna Kaila នៅវគ្គផ្តាច់ព្រ័ត្រ។ នាង ក៏ជាម្ចាស់មេដាយមាសកីឡាអាស៊ី Asian Games នៅឥណ្ឌូណេស៊ីកាលពីឆ្នាំ២០១៨ ផងដែរ។

មេដាយមាសកីឡាស៊ីហ្គេមនេះ ចេសា ទទួលបានថវិកាលើកទឹកពីយុទ្ធនាការឆ្ពោះទៅរកមេដាយមាសរបស់ណាហ្គាវើលដ៍ចំនួន៦ពាន់ដុល្លារ។ យុទ្ធនាការដំណើរឆ្ពោះទៅរកមេដាយមាសនេះ ក៏បានផ្តល់ថវិកាលើកទឹកចិត្តដល់ម្ចាស់ជ័យលាភីមេដាយមាស៣ប្រភេទកីឡាទៀតផងដែរ។

កីឡាករ យ៉ុង ម៉េងលី ម្ចាស់មេដាយមាសកីឡា Arnis, ម្ចាស់មេដាយមាស់កីឡាតេក្វាន់ដូ ស៊ន សៀវម៉ី ទទួលបានម្នាក់៦ពាន់ដុល្លារ។ ចំណែកមេដាយមាសកីឡាប៉េតង់ដែលមានកីឡាការិនី ស្រ៊ាង សុរ៉ាឃីម, ឃួន យ៉ារី, ដួង ឌីណា និង អ៊ុន ស្រីយ៉ា ទទួលបាន១ម៉ឺនដុល្លារ។ ដោយឡែកគ្រូបង្វឹកទាំង៤ប្រភេទកីឡាទទួលបានម្នាក់ៗ១ពាន់ដុល្លារ។ ណាហ្គាវើលដ៏ ក៏បានផ្តល់ថវិកា៤ពាន់ដុល្លារដល់គណៈកម្មាធិការជាតិអូឡាំពិកកម្ពុជាផងដែរ។ សរុបមេដាយមាសកីឡាស៊ីហ្គេមនៅឆ្នាំនេះ ណាហ្គាវើលចំណាយថវិកាអស់ចំនួន៣៦,០០០ដុល្លារ៕