អន្តរជាតិ
ម៉ាកាវ រឹតបន្តឹងសន្តិសុខទទួលលោក ស៊ី ដើម្បីអបអរខួបទី២០ ការក្លាយជាទឹកដីចិនវិញ កម្លាំងសន្តិសុខ ដើរត្រួតពិនិត្យនៅព្រលានយន្តហោះម៉ាមាវ។ រូបថត AFP
× អាជ្ញាធរទីក្រុងម៉ាកាវ បានរឹតបន្តឹងសន្តិសុខយ៉ាងតឹងរ៉ឹងដើម្បីទទួលដំណើរទស្សនកិច្ចបីថ្ងៃរបស់ប្រធានាធិបតីចិន ស៊ី ជិនភីង ដើម្បីអបអរខួប២០ឆ្នាំដែលម៉ាកាវត្រូវប្រគល់ឲ្យចិនឡើងវិញ។ លោក ស៊ី ក៏នឹងចូលរួមក្នុងពិធីស្បថចូលកាន់តំណែងប្រមុខប្រតិបត្តិការតំបន់រដ្ឋបាលពិសេសមួយនេះ ក៏ដូចជាប្រកាសគោលនយោបាយថ្មីៗសម្រាប់ម៉ាកាវ ដែលត្រូវមើលឃើញថា ជាការផ្ដល់រង្វាន់ឲ្យទីក្រុងនេះសម្រាប់ការរក្សាស្ថិរភាពល្អ ខុសពីទីក្រុងហុងកុងក្បែរខាង។
ប្រធានាធិបតីចិន ស៊ី ជិនភីង ចាប់ផ្ដើមដំណើរទស្សនកិច្ចបីថ្ងៃនៅទីក្រុងម៉ាកាវនៅថ្ងៃទី១៨ ខែធ្នូនេះ ដើម្បីចូលរួមពិធីរំឭកខួបទី២០ នៃការទទួលបានម៉ាកាវវិញពីព័រទុយហ្កាល់។ ព័រទុយហ្កាល់ ប្រគល់ម៉ាកាវឲ្យចិនវិញនៅថ្ងៃទី២០ ខែធ្នូ ឆ្នាំ១៩៩៩ ហើយម៉ាកាវក៏ត្រូវចិនគ្រប់គ្រងក្រោមរូបភាព «ប្រទេសមួយ ប្រព័ន្ធពីរ» រហូតមក។
ដំណើរទស្សកិច្ចលោក ស៊ី នៅទីក្រុងល្បែងដ៏ធំរបស់ប្រទេស ត្រូវបានចាត់ទុកជាការលើកទឹកចិត្តអាជ្ញាធរទីក្រុងរដ្ឋបាលពិសេសមួយនេះ ដែលគោរពតាមការណែនាំរបស់រដ្ឋាភិបាលមជ្ឈិម និងការរក្សាស្ថិរភាពបានល្អ មិនដូចទីក្រុងហុងកុងដែលកំពុងជួបបញ្ហារំជើបរំជួលធ្ងន់ធ្ងរអស់រយៈពេល៦ខែមកនេះ។ ដូចម៉ាកាវដែរ ហុងកុងជាតំបន់រដ្ឋបាលពិសេសដែលចិនត្រួតត្រាតាមរូបមន្តប្រទេសមួយ ប្រព័ន្ធពីរ ដោយរក្សាសិទ្ធិស្វ័យភាពកម្រិតខ្ពស់ឲ្យរដ្ឋាភិបាលតំបន់។
ដើម្បីស្វាគមន៍លោក ស៊ី ម៉ាកាវទាំងមូល ស្ថិតក្រោមការពង្រឹងសន្តិសុខយ៉ាងខ្លាំង។ សេវាកម្មដឹកជញ្ជូនតាមផ្លូវទឹករវាងម៉ាកាវ និងហុងកុង ត្រូវបានកាត់បន្ថយពាក់កណ្ដាលដើម្បីសម្រួលដល់ការត្រួតពិនិត្យសន្តិសុខ។ ចំណែកឯប្រព័ន្ធរថភ្លើងធុនស្រាលដែលទើបដាក់ដំណើការ ក៏ត្រូវផ្អាកដើម្បីការពារសន្តិសុខផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
អំឡុងពេលស្នាក់នៅទីក្រុងម៉ាកាវ លោក ស៊ី នឹងធ្វើជាអធិបតីក្នុងពិធីស្បថចូលកាន់តំណែងប្រមុខប្រតិបត្តិថ្មី គឺលោក Ho Iat-seng នៅថ្ងៃទី២០ ខែធ្នូ។ មេដឹកនាំចិន ក៏ត្រូវរំពឹងថា នឹងប្រកាសពីគោលនយោបាយគាំទ្រសេដ្ឋកិច្ចម៉ាកាវ ក៏ដូចជាវិធានការនានាដើម្បីប្រែក្លាយទីក្រុងដែលពឹងផ្អែកខ្លាំងលើកាស៊ីណូ ទៅជាមជ្ឈមណ្ឌលហិរញ្ញវត្ថុដ៏ធំ។ មានអ្នកវិភាគខ្លះជឿថា ក្រុងប៉េកាំងកំពុងបំប៉នម៉ាកាវដើម្បីទុកជំនួសហុងកុងផងដែរ។
ទោះមានស្វ័យភាពខ្ពស់ដូចគ្នាក្ដី គេកម្រឃើញមានការតវ៉ាប្រឆាំងណាមួយនៅទីក្រុងមានប្រជាជនជាង៦សែននាក់នេះណាស់ ខណៈនៅហុងកុងឯណោះ បាតុកម្មកើតឡើងមិនលស់ថ្ងៃផង។ នេះទំនងបណ្ដាលមកពី អាជ្ញាធរទីក្រុងនេះ អនុវត្តវិធានការក្ដៅលើអ្នកមាននិន្នាការទៅរកប្រជាធិបតេយ្យ។ ជាក់ស្ដែង កាលពីសប្ដាហ៍មុន អ្នកប្រឆាំងម្នាក់នៅហុងកុង និងប្រធានសភាពាណិជ្ជកម្មអាមេរិកនៅហុងកុង មិនត្រូវបានអនុញ្ញាតឲ្យចូលម៉ាកាវឡើយ៕
Tag:
ចិន
ម៉ាកាវ
ស៊ី ជិនភីង
© រក្សាសិទ្ធិដោយ thmeythmey.com