ជាតិ
នយោបាយជាតិ
ជំនួយការ៖ លោក កឹម សុខា ត្រៀមខ្លួនជានិច្ច សម្រាប់ការផ្សះផ្សាជាតិ
× លោក កឹម សុខា ប្រធានអតីតគណបក្សប្រឆាំង បន្តបង្ហាញឆន្ទៈរបស់លោក ក្នុងការដោះស្រាយបញ្ហានយោបាយនៅកម្ពុជា ជាមួយគណបក្សកាន់អំណាច។ លោក បង្ហាញឆន្ទៈនេះ ក្នុងជំនួយជាមួយលោក Taha Macpherson ឯកអគ្គរាជទូតនូវែលសេឡង់ កាលពីថ្ងៃទី១៧ ខែធ្នូ ឆ្នាំ២០១៩ នៅគេហដ្ឋានរបស់លោក ក្នុងសង្កាត់បឹងកក់២។
ក្រោយបញ្ចប់ជំនួប លោក មុត ចន្ថា ជំនួយការរបស់លោក កឹម សុខា បានថ្លែងទៅកាន់អ្នកកាសែតដូច្នេះថា៖«ឯកឧត្តមកឹម សុខា បានបញ្ជាក់ជំហរថា លោក ត្រៀមខ្លួនជានិច្ច ដើម្បីចូលរួមដំណើរការផ្សះផ្សារ និងបង្រួបបង្រួមជាតិ ក្នុងលក្ខខណ្ឌមួយ ដែលលោក មានសេរីភាពពេញលេញខាងនយោបាយឡើងវិញ»។
យ៉ាងណាក៏ដោយ មកដល់ពេលនេះ គេ មិនទាន់ឃើញសញ្ញាវិជ្ជមានណាមួយពីគណបក្សកាន់អំណាច ក៏ដូចជា រដ្ឋាភិបាល ដែលបង្ហាញពីបំណងនៃការចរចាជាមួយលោក លោក កឹម សុខា ឬក្រុមអ្នកប្រឆាំងឡើយ។
ក្នុងជំនួបនោះ ឯកអគ្គរាជទូតនូវែលសេឡង់ ប្រាប់ថា លោក នឹងបន្តតាមដានចំពោះសំណុំរឿងរបស់លោក កឹម សុខា និងបន្តជួយដល់ដំណើរការប្រជាធិបតេយ្យនៅកម្ពុជា។ នេះបើតាមលោក មុត ចន្ថាដដែល។ លោក Taha Macpherson ជាឯកអគ្គរាជទូតនូវែលសេឡង់ ទទួលបន្ទុកប្រចាំកម្ពុជា ថៃ និង ឡាវ ដោយមានស្ថានទូតនៅថៃ។
ចំពោះសំណុំរឿងរបស់លោក កឹម សុខា តុលាការរាជធានីភ្នំពេញ កំណត់បើកសវនាការនៅថ្ងៃទី១៥ ខែមករា ឆ្នាំ២០២០ ក្រោយពីឆ្លងកាត់ការស៊ើបសួរអស់រយៈពេល២ឆ្នាំរួចមក។ អាមេរិក ប្រកាសមុននូវែលសេឡង់ថា នឹងតាមដានការកាត់ក្តីលោក កឹម សុខា។ សហមេធាវី នៅមិនទាន់អាចបញ្ជាក់បានឡើយថា លោក កឹម សុខា នឹងចូលរួមសវនាការ ឬក៏មិនចូលរួម៕
© រក្សាសិទ្ធិដោយ thmeythmey.com