កីឡាអន្តរជាតិ
អន្តរជាតិ
ប្រមុខការទូតអាមេរិក គាំទ្រ Ozil ដែលរិះគន់ចិន រឿងបំពានជនជាតិភាគតិចវីហ្គ័រ លោក ម៉ៃ ប៉ុមប៉េអូ រដ្ឋមន្រ្តីក្រសួងការបរទេសអាមេរិក (ឆ្វេង) និង Mesut Ozil
× រដ្ឋមន្ត្រីក្រសួងការបរទេសអាមេរិកលោក ម៉ៃ ប៉ុមប៉េអូ នៅថ្ងៃទី១៧ ខែធ្នូ បានថ្កោលទោសចិនជាថ្មីចំពោះបញ្ហាសិទ្ធិមនុស្ស និងថែមទាំងគាំទ្រ Mesut Ozil ក្រោយខ្សែបម្រើ Arsenal រូបនេះ រិះគន់ចិនជុំវិញការបង្ក្រាបជនជាតិភាគតិចមូស្លីមវីហ្គ័រ នៅតំបន់ស៊ីនជាំង ប្រទេសចិន។
«ការឃោសនារបស់បក្សកុម្មុយនីស្តចិន (CCP) អាចបិទការផ្សាយការប្រកួតរបស់ Mesut Ozil និងក្រុម Arsenal ពេញមួយរដូវកាល ប៉ុន្តែការពិតនៅតែជាការពិត។ CCP មិនអាចលាក់បាំងការរំលោភសិទ្ធិមនុស្ស ការប្រព្រឹត្តបទឩក្រិដ្ឋប្រឆាំងជនជាតិវីហ្គ័រ និងក្រុមអ្នកមានជំនឿសាសនាដទៃទៀតនៅជុំវីពិភពលោកបានទេ»។ លោក ប៉ុមប៉េអូ បានបង្ហោះសារនៅលើបណ្តាញសង្គម Twitter ផ្ទាល់របស់លោកដូច្នេះ។
Ozil ដែលមានដើមកំណើតតួកគី និងជាអ្នកកាន់សាសនាឥស្លាមផង បានថ្កោលទោសការបង្ក្រាបរបស់ចិន ទៅលើជនជាតិភាគតិចវីហ្គ័រ និងជនជាតិភាគតិចដទៃទៀត ក្នុងខេត្តស៊ីនជាំង ប្រទេសចិន។ បុរសវ័យ៣១ឆ្នាំ ដែលបានហៅជនជាតិភាគតិចវីហ្គ័រ ថាជាអ្នកចម្បាំងក្រោយពួកគេប្រឆាំងនឹងការធ្វើទុក្ខបុកម្នេញពីសំណាក់ចិននោះ បានបង្ហោះសារក្នុងបណ្តាញសង្គម Twitter របស់ខ្លួន នៅថ្ងៃទី១៣ ខែធ្នូ ដោយបានរិះគន់ចិន និងប្រទេសមូស្លីមផ្សេងទៀត ដែលមិនហ៊ានហាមាត់ ប្រឆាំងនឹងការរំលោភបំពាននេះ។
Arsenal បានព្យាយាមនៅឆ្ងាយពីការអត្ថាធិប្បាយរបស់ Ozil នេះ។ គណនីផ្លូវការរបស់ក្រុមការងារក្រុមកាំភ្លើងធំបានបង្ហោះសារលើបណ្តាញសង្គមហ្វេសប៊ុករបស់ខ្លួនថា «ការលើកឡើងរបស់ Ozil គឺជាគំនិតផ្ទាល់គេប៉ុណ្ណោះ»។
យ៉ាងណាក៏ ដោយសារការរិះគន់របស់ Ozil បែបនេះ បានធ្វើឲ្យទូរទស្សន៍រដ្ឋចិន CCTV បិទការ Live ផ្ទាល់ការប្រកួតរវាងក្រុម Arsenal និង Manchester City នាជំនួបប្រកួតក្នុងក្របខណ្ឌ Premier League សប្តាហ៍ទី១៧ នៅយប់ថ្ងៃទី១៥ ខែធ្នូ។ ហើយបន្ទាប់មកទៀតនោះ អ្នកនាំពាក្យក្រសួងការបរទេសចិនលោក Geng Shuang បានឆ្លើយតបទៅកាន់ Ozil ដែលបានរិះគន់ខ្លួននោះ ថាខ្សែបម្រើក្រុមកាំភ្លើងធំរូបនេះទទួលបានព័ត៌មានក្លែក្លាយប៉ុណ្ណោ និងចង់បបួល Ozil ទៅមើលស្ថានភាពដ៏រីករាយពិតប្រាកដរបស់ប្រជាជន និងជនជាតិភាគតិចក្នុងខេត្តស៊ីនជាំងសព្វថ្ងៃទៀតផង។
ក្រោយភាគីចិនឆ្លើយតបទៅកាន់ Ozil បែបនេះ លោក ប៉ុមប៉េអូ រដ្ឋមន្ត្រីក្រសួងការបរទេសអាមេរិកបានបន្តវាយប្រហារ និងថ្កោលទោសចិនជាថ្មីម្តងទៀត ដោយបញ្ជាក់ការគាំទ្រការរិះគន់របស់ខ្សែបម្រើសញ្ជាតិអាល្លឺម៉ង់ទៀតផង។ លើសពីនេះទៅទៀត បញ្ជាសិទ្ធិមនុស្សនេះ ក៏កំពុងតែជាប្រធានបទក្តៅខ្លាំងឡើងរវាងប្រទេសយក្សសេដ្ឋកិច្ចទាំងពីរផងដែរ។
កាលពីខែតុលាកន្លងទៅ ក្រសួងការបរទេសអាមេរិក ថាខ្លួននឹងបញ្ឈប់ការផ្តល់ទិដ្ឋាការដល់រដ្ឋាភិបាលចិន និងមន្ត្រីបក្សកុម្មុយនិស្តចិនចំពោះការធ្វើទុក្ខបុកម្នេញលើជនជាតិភាគតិចវីហ្គ័រ និងជនជាតិដទៃទៀត នៅតំបន់ស៊ីនជាំង ភាគខាងលិចប្រទេសចិន។
សភាតំណាងរាស្ត្រអាមេរិក កាលពីថ្ងៃទី៤ ខែធ្នូ បានអនុម័ត លើសេចក្តីស្នើច្បាប់ ស្តីពីជនជាតិវីហ្គ័រ ដើម្បីទាមទារឲ្យរដ្ឋាភិបាលអាមេរិក ដាក់សម្ពាធ និងដាក់ទណ្ឌកម្ម លើក្រុងប៉េកាំង ពាក់ព័ន្ធករណីនេះសិទ្ធិមនុស្សនេះ៕
Tag:
Mesut Ozil
វីហ្គ័រ
ចិន
Mike Pompeo
© រក្សាសិទ្ធិដោយ thmeythmey.com