លោក ត្រាំ ប្រតិកម្មនឹងបក្សប្រជាធិបតេយ្យនៅសភាថា«ពោរពេញដោយការស្អប់» ក្រោយរងការចោទប្រកាន់ផ្លូវការ

អន្តរជាតិ

លោក ត្រាំ ប្រតិកម្មនឹងបក្សប្រជាធិបតេយ្យនៅសភាថា«ពោរពេញដោយការស្អប់» ក្រោយរងការចោទប្រកាន់ផ្លូវការ

19, Dec 2019 , 10:59 am

រូបភាព

លោកប្រធានាធិបតីអាមេរិក ដូណាល់ ត្រាំ (AFP)

ដោយ:

ប្រធានាធិបតីអាមេរិក លោក ដូណាល់ ត្រាំ ប្រតិកម្មខ្លាំងប្រឆាំងនឹងបក្សប្រជាធិបតេយ្យដែលចោទពួកគេថា «ពោរពេញដោយការស្អប់ខ្ពើម» ក្រោយពីលោកត្រូវបានចោទប្រកាន់ជាផ្លូវការដោយសភាក្នុងការបោះឆ្នោតលើមាត្រានៃការចោទប្រកាន់ដែលអាចឈានដល់ការដកហូតតំណែង (impeachment) ។ ការបោះឆ្នោតពីសំណាក់សមាជិកសភានេះ ធ្វើឡើងនៅថ្ងៃពុធ ១៨ ខែធ្នូ លើបទចោទចំនួនពីរ គឺការរំលោភអំណាច និងការរារាំងដំណើរការសភា ។

នៅចំពោះមុខអ្នកគាំទ្រក្នុងរដ្ឋ Michigan លោក ដូណាល់ ត្រាំ និយាយថា ខណៈរដ្ឋបាលលោកប្រឹងប្រែងបង្កើតការងារ ក្រុមបក្សប្រជាធិបតេយ្យឆ្វេងនិយមក្នុងសភា គឺពោរពេញដោយការច្រណែន, ការស្អប់ខ្ពើម និងកំហឹង។

តាមការចុះផ្សាយរបស់ទីភ្នាក់ងារព័ត៌មាន AFP មេដឹកនាំមកពីបក្សសាធារណរដ្ឋរូបនេះ លើកឡើងចំៗថា៖«អ្នកទាំងនេះ គឺជាមនុស្សឆ្អួត»។ លោក ត្រាំ បញ្ជាក់ទៀតថា បក្សប្រជាធិបតេយ្យដែលគ្រប់គ្រងសភាតំណាង បានព្យាយាមបង្ខូចសន្លឹកឆ្នោតរបស់ប្រជាជនអាមេរិករាប់លាននាក់ដែលជាអ្នកស្នេហាជាតិ។

អត្ថបទទាក់ទង

ទីបំផុត រដ្ឋសភាអាមេរិកបោះឆ្នោតចោទប្រកាន់លោក ត្រាំ ជាផ្លូវការ មុនឈានទៅដកតំណែង

ប្រធានាធិបតី ត្រាំ ចោទប្រធានសភាតំណាងថា «ប្រកាសសង្គ្រាមជាមួយលទ្ធិប្រជាធិបតេយ្យ»

ក្រោយពីការជជែកតស៊ូមតិ១០ម៉ោងឥតសម្រាក សមាជិកសភាអាមេរិក បានសម្រេចបោះឆ្នោត ២៣០ ទល់នឹង១៩៧ សំឡេង អនុម័តបទចោទប្រកាន់ទី១ នោះគឺ ការរំលោភអំណាច ដែលអះអាងថា លោក ត្រាំ បានអនុវត្តអំណាចប្រធានាធិបតីដើម្បីបានផលចំណេញផ្ទាល់ខ្លួន ខណៈមិនខ្វាយខ្វល់ ឬប៉ះពាល់ដល់ប្រយោជន៍ជាតិ ដោយដាក់សម្ពាធលើអ៊ុយក្រែនឲ្យជ្រៀតជ្រែកការបោះឆ្នោតជ្រើសរើសប្រធានាធិបតី ២០២០។

ជាមួយគ្នានេះ សមាជិកសភាអាមេរិក ក៏បានបោះឆ្នោត ២២៩ ទល់នឹង ១៩៨ សំឡេង អនុម័តបទចោទប្រកាន់ទី២ ដែលអះអាងថា នៅពេលត្រូវបានចាប់កំហុសបាន, នៅពេលសភាតំណាងបានបើកការស៊ើបអង្កេត និងស៊ើបសួរក្នុងនីតិវិធីដកតំណែងប្រធានាធិបតីនោះ លោក ត្រាំ បានព្យាយាមរារាំងដំណើរការរបស់សភានេះ។

ជាមួយលទ្ធផលបោះឆ្នោតនេះ លោកដូណាល់ ត្រាំ បានក្លាយជាប្រធានាធិបតីទី៣ក្នុងប្រវត្តិសាស្ត្រអាមេរិក ដែលត្រូវបានចោទប្រកាន់ដែលអាចឈានដល់ការដកហូតតំណែង ក៏ប៉ុន្តែមិនមានន័យថា លោក ត្រាំ អស់តំណែងឡើយ។ ជានីតិវិធី ប្រធានាធិបតីអាមេរិកទី៤៥រូបនេះ នឹងទៅឡើងសវនាការក្នុងព្រឹទ្ធសភាដែលគ្រប់គ្រងដោយបក្សសាធារណរដ្ឋ។ ហើយការជំនុំជម្រះនេះ រំពឹងរៀបចំឡើង នាខែមករា ឆ្នាំ២០២០ខាងមុខ។ ក្នុងករណីព្រឹទ្ធសភាសម្រេចចិត្តដកតំណែងដែរ ទើបលោក ត្រាំ អស់តំណែង។ អនុប្រធានាធិបតី ម៉ៃ ផេន នឹងឡើងអង្គុយកៅអីប្រធានាធិបតីជំនួស។

សូមបញ្ជាក់ថា ការបោះឆ្នោតរបស់សភាតំណាងអាមេរិកនៅថ្ងៃពុធនេះ ធ្វើឡើង៤ខែក្រោយពី មន្ត្រីចារកិច្ចអាមេរិកមួយរូបដែលមិនបញ្ចេញឈ្មោះ (whistleblower) បានដាក់ពាក្យបណ្តឹងទៅសភាក្នុងខែកញ្ញា អំពីការជជែកគ្នាតាមទូរសព្ទរវាងលោក ត្រាំ និងប្រធានាធិបតីអ៊ុយក្រែន។ អំឡុងការជជែកគ្នាតាមរយៈទូរសព្ទក្នុងខែកក្កដានេះ លោក ត្រាំ បានដាក់សម្ពាធលោក Zelensky បើកការស៊ើបអង្កេតលើលោក ចូ បៃឌិន ដែលបច្ចុប្បន្នជាបេក្ខជនបក្សប្រជាធិបតេយ្យឈានមុខម្នាក់ក្នុងការបោះឆ្នោតឆ្នាំក្រោយ ដោយភ្ជាប់ទៅនឹងជំនួយយោធា៕