Firmino ស៊ុតចុងម៉ោងជួយ Liverpool ឈ្នះ Monterrey ឡើងវគ្គផ្តាច់ព្រ័ត្រ Club World Cup

FIFA

កីឡាអន្តរជាតិ

អន្តរជាតិ

Firmino ស៊ុតចុងម៉ោងជួយ Liverpool ឈ្នះ Monterrey ឡើងវគ្គផ្តាច់ព្រ័ត្រ Club World Cup

19, Dec 2019 , 3:43 pm

រូបភាព

រូបភាពពីវេបសាយ FIFA

ដោយ: ទេព ពិទូរ្យ

១គ្រាប់ចុងក្រោយដែលសម្រេចបានដោយខ្សែប្រយុទ្ធ Roberto Firmino នៅនាទី៩០ បានជួយ Liverpool ក្រុមពីម៉ិកស៊ិក Monterrey ២-១ ដើម្បីឡើងទៅជួបក្រុមពីប្រេស៊ីល Flamengo នៅវគ្គផ្តាច់ព្រ័ត្រ ដណ្តើមពានរង្វាន់ FIFA Club World Cup ឆ្នាំ២០១៩។

ខ្សែប្រយុទ្ធសញ្ជាតិប្រេស៊ីល Firmino ដែលទើបផ្តូរចូលជំនួស Divock Origi នៅនាទី៨៥ ទទួលបានបាល់ពីការបញ្ជូនដ៏ល្អរបស់ខ្សែការពារ Trent Alexander-Arnold ពីជ្រុងខាងស្តាំ ដើម្បីសម្រេចទីគ្រាប់ជ័យជម្នះឲ្យហង្សក្រហមក្នុងជំនួបវគ្គពាក់កណ្តាលផ្តាច់ព្រ័ត្រ នាកីឡដ្ឋាន Khalifa Int'l ក្នុងក្រុងដូហា ប្រទេសកាតា នៅយប់ថ្ងៃទី១៨ ខែធ្នូ។

Liverpool ដែលជាម្ចាស់ជើងឯកក្របខណ្ឌអឺរ៉ុប UEFA Champions League រដូវកាលមុន ជាអ្នករកបានគ្រាប់បាល់នាំមុខមុនតាំងពីនាទី១២ តាមរយៈការស៊ុតរបស់ខ្សែបម្រើ Naby Keita។ យ៉ាងណាក៏ដោយ ២នាទីក្រោយពីការនាំមុខ ខ្សែប្រយុទ្ធ Rogelio Funes Mori អាចរកគ្រាប់បាល់តាមស្មើវិញឲ្យក្រុម Monterrey វិញ ហើយក្រុមទាំងបញ្ចប់លទ្ធផលនៅវគ្គទីមួយ ១-១។

ចូលដល់វគ្គទី២ ក្រុមទាំងពីរបានបន្តការវាយសម្រុកគ្នាទៅវិញទៅមកយ៉ាងខ្លាំងក្លាប៉ុន្តែមិនអាចរកគ្រាប់ចូលទីនោះឡើយ។ រហូតដល់ចុងម៉ោងទៅហើយ Firmino បានក្លាយជាវីរបុរសរបស់ក្រុមលោក Jürgen Klopp ជាមួយគ្រាប់បាល់បញ្ចូលទីនៅនាទី៩០ ដើម្បីនាំ Liverpool ឡើងទៅដណ្តើមពានប្រចាំទ្វីប Club World Cup ជាមួយ Flamengo ដែលបានដៅអីរួចហើយ ក្រោយពួកគេឈ្នះ ក្រុមពីអារ៉ាប៊ីសាអូឌីត Al Hilal ដោយលទ្ធផល ៣-១ នៅវគ្គ៤ក្រុម។

Liverpool ដែលតំណាងក្រុមពីទ្វីបអឺរ៉ុប នឹងត្រូវជួប Flamengo តំណាងក្រុមពីទ្វីបអាមេរិកខាងត្បូង នៅថ្ងៃទី២១ ខែធ្នូ វេលាម៉ោង ១២:៣០នាទីយប់ [ម៉ោងនៅកម្ពុជា] ក្នុងក្រុងដូហា ប្រទេសកាតា បន្ទាប់ពីជំនួបរវាង Monterrey (ទ្វីបអាមេរិក) ជាមួយ Al Hilal (អាស៊ី) សម្រាប់តំណែងចំណាត់ថ្នាក់ទី៣ ដែលធ្វើឡើងនៅម៉ោង ៩:៣០នាទីយប់៕