អន្តរជាតិ
អតីតមេដឹកនាំប៉ាគីស្ថាន Musharraf ថាការកាត់ទោសប្រហារជីវិតលោកជា«គំនុំផ្ទាល់ខ្លួន»
×![]()
អតីតប្រធានាធិបតីប៉ាគីស្ថាន លោក Pervez Musharraf ដែលកំពុងនិរទេសខ្លួននៅបរទេស បានច្រានចោលការកាត់ទោសលោកថា «ក្បត់ជាតិ» និងទោសប្រហារជីវិតដល់លោក កាលពីថ្មីៗនេះ ។ ពីទីក្រុងឌូបៃ លោកបានអះអាងថា សាលក្រមរបស់តុលាការពិសេសរបស់ប៉ាគីស្ថាននេះ គឺជាលទ្ធផលនៃ «គំនុំសងសឹកផ្ទាល់ខ្លួន»។ 
«រឿងក្តី (ក្បត់ជាតិ) នេះ ត្រូវបានលើកឡើង ហើយបើកនីតិវិធីដោយសារតែគំនុំសងសឹកផ្ទាល់ខ្លួន ពីសំណាក់មនុស្សខ្លះដែលប្រឆាំងនឹងខ្ញុំ»។ លោក Musharraft បាននិយាយបែបនេះក្នុងវីដេអូមួយដោយបង្ហោះដោយជំនួយការលោក នៅយប់ថ្ងៃពុធ ១៨ ខែធ្នូ។
លោក Musharraf ត្រូវបានរាយការណ៍ថាកំពុងនៅក្នុងទីក្រុង ឌូបៃ ប្រទេសអេមីរ៉ាតអារ៉ាប់រួម ហើយមានសុខភាពមិនល្អ ។ តាមរយៈវីដេអូដែលបានបង្ហោះនោះ អតីតប្រធានាធិបតីប៉ាគីស្ថានដែលមានទោសក្បត់ជាតិនេះ កំពុងសម្រាកព្យាបាលលើគ្រែមន្ទីរពេទ្យមួយ ដោយមើលទៅទន់ខ្សោយ ហើយនិយាយសឹងមិនរួច។
យ៉ាងណាមិញ អតីតឧត្តមសេនីយ៍រូបនេះ បានបញ្ជាក់ថា លោកនៅតែមានទាន់សម្រេចចិត្តច្បាស់ទេ ចំពោះជំហានបន្ទាប់របស់លោកថាតើក្រុមការងារច្បាប់របស់លោក រៀបចំប្តឹងតវ៉ាក្តីចំពោះការកាត់ទោសនេះឬយ៉ាងណានោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
សូមបញ្ជាក់ថា សវនាការកាត់ទោសបទចោទ «ក្បត់ជាតិ» ប្រឆាំងលោក Musharraf បានចាប់ផ្តើម ក្នុងឆ្នាំ២០១៤។ សកម្មភាពលោកក្នុងឆ្នាំ២០០៧ ជាមូលដ្ឋានដ៏សំខាន់មួយក្នុងករណីទោសក្បត់ជាតិប្រឆាំងអតីតមេដឹកនាំវ័យ៧៦ឆ្នាំរូបនេះ។ កាលនោះគឺនៅថ្ងៃ ៣ វិច្ឆិកា ឆ្នាំ២០០៧ មេដឹកនាំសឹករូបនេះ បានប្រកាសដាក់រដ្ឋក្នុងភាពអាសន្ន និងបានព្យួររដ្ឋធម្មនុញ្ញ ព្រមទាំងបានឃុំឃាំងមេដឹកនាំនយោបាយជាន់ខ្ពស់ និងចៅក្រម។
ក្រោយមក វិបត្តិនយោបាយនេះកាន់តែដុនដាប ក្នុងខែមីនា ឆ្នាំ ២០០៧ ដោយកាលនោះ លោក Musharraf បានប៉ុនប៉ងដកហូតតំណែងរបស់ប្រធានតុលាការកំពូលប៉ាគីស្ថាន គឺលោក Iftikhar Muhammad Chaudhry ។ នេះទង្វើមួយដែលតុលាការកំពូល នៅពេលក្រោយមក បានចាត់ទុកថា ខុសច្បាប់។ ការប៉ុនប៉ងនេះ បានរងការបាតុកម្មយ៉ាងខ្លាំងក្លាពីសំណាក់មេធាវីនៅទូទាំងប្រទេស ។
លោក Musharraf បានចូលក្តោបអំណាចដោយការធ្វើរដ្ឋប្រហារយោធាមួយ ក្នុងឆ្នាំ១៩៩៩ ហើយបានដឹកនាំប្រទេសក្នុងតំបន់អាស៊ីខាងត្បូងនេះអស់ពេល៩ឆ្នាំ។ ក្នុងឆ្នាំ២០០៨ លោកបានសុំលាលែងពីតំណែងជាប្រធានាធិបតីទី១០របស់ប៉ាគីស្ថាន ក្រោយពីបក្សប្រឆាំងបានព្យាយាមបណ្តេញរូបលោកពីតំណែងកំពូលនេះ៕
Tag:
ប៉ាគីស្ថាន
Pervez Musharraf
ក្បត់ជាតិ
© រក្សាសិទ្ធិដោយ thmeythmey.com
