លោក យ៉ង សាំងកុមារ គ្រោងបង្កើតសិប្បកម្មច្នៃកាកដូងកាកអំពៅ ទៅជាជីសរីរាង្គ

ជាតិ

បទយកការណ៍ / បទសម្ភាសន៍

លោក យ៉ង សាំងកុមារ គ្រោងបង្កើតសិប្បកម្មច្នៃកាកដូងកាកអំពៅ ទៅជាជីសរីរាង្គ

19, Dec 2019 , 9:59 pm

រូបភាព

ដោយ:

ភ្នំពេញ៖ អ្នកជំនាញកសិកម្ម លោក យ៉ង សាំងកុមារ គ្រោងបង្កើតសិប្បកម្ម ដែលច្នៃកាកអំពៅកាកដូង ទៅជាសាធាតុសរីរាង្គ សម្រាប់យកទៅប្រើជួយលើកកម្ពស់ដីដាំដំណាំបន្លែផ្លែឈើ។

សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក យ៉ង សាំងកុមារ ដូចតទៅនេះ៖

លោក យ៉ង សាំងកុមារ ឲ្យដឹងថា សព្វថ្ងៃ លោកមានការកែច្នៃកាកសំណល់ ពិសេសគឺអង្កាម ទៅជាសាធាតុសរីរាង្គរួចទៅហើយ តែទ្រង់ទ្រាយតូចប៉ុណ្ណោះ។ ដូចនេះលោកកំពុងសិក្សាបង្កើតទៅជាសិប្បកម្មខ្នាតមធ្យមឬធំជាលក្ខណៈអាជីវកម្ម ដើម្បីច្នៃកាកអំពៅ កាកដូង ទៅជាសាធាតុសរីរាង្គដើម្បីលក់ចែកចាយ។ លោកបញ្ជាក់ថា កាកសំណល់ទាំងពីរមុខនេះ ត្រូវបានលោកសាកល្បងរួចហើយគឺពិតជាអាចធ្វើជាសាធាតុសរីរាង្គ ជួយដល់ដំណាំ។ លោកបានអំពាវនាវរកដៃគូវិនិយោគលើគម្រោងនេះ ដែលត្រូវការបណ្ដាក់ទុនលើទីតាំង និងម៉ាស៊ីននាំចូលពីក្រៅប្រទេស សម្រាប់បង្កើតសិប្បកម្មនេះឡើង។

ការច្នៃកាកអំពៅ និងកាកដូងនេះ នឹងផលិតបានជាសាធាតុសរីរាង្គ៣មុខ ដែលទី១គឺកិនឲ្យហ្មត់យកទៅក្រាលលើដីដំណាំ ទី២យកទៅលាយជាមួយកាកសំណល់ផ្សេងៗធ្វើជាជីកំប៉ុស្ត និងទី៣គឺផលិតជាធ្យូងជីវៈ។ លោក យ៉ង សាំងកុមារ អះអាងថា ជារួម សាធាតុសរីរាង្គទាំងនេះត្រូវបានប្រើសម្រាប់ធ្វើជាគម្របដីដើម្បីឲ្យដីរក្សាភាពសំណើម និងយកទៅលាយបញ្ចូលក្នុងដីនោះដើម្បីឲ្យដីផុស និងមានជីវជាតិ ពោលគឺសំដៅកែប្រែលក្ខខណ្ឌដីឲ្យបានល្អមានជីវជាតិមានសំណើម ផ្ដល់ទិន្នផលដំណាំខ្ពស់។

ស្ថាបនិកអង្គការសេដាករូបនេះ មានប្រសាសន៍ថា ក្រៅពីជួយដល់ដីដាំដំណាំ សិប្បកម្មនេះក៏នឹងជួយកាត់បន្ថយការសំរាមនៅទីក្រុងផងដែរ តាមរយៈការប្រមូលកាកដូង កាកអំពៅ និងសំណល់ផ្លែឈើផ្សេងៗទៀត យកមកកែច្នៃ។ លោកប្រាប់ថា បើសិប្បកម្មដែលោកគ្រោងបង្កើតឡើងនេះ ត្រូវការកាកអំពៅ និងដូង ប្រមាណ៤០តោនក្នុងមួយថ្ងៃ យកមកកែច្នៃផលិត។

ជាមួយគ្នានេះ បណ្ឌិតកសិកម្មរូបនេះ ក៏បានណែនាំឲ្យប្រជាពលរដ្ឋ យកសំណល់សរីរាង្គ ដូចជាកាកដូង កាកអំពៅជាដើម មកគ្របដីដាំដំណាំរបស់ខ្លួនដែលហុចផលល្អដល់ដីនោះ ជាជាងចោលកាកសំណល់ទាំងនោះគ្មានប្រយោជន៍៕