ជាតិ
រោងម៉ាស៊ិនកិនស្រូវ ១៨ទៀត ត្រូវបានក្រសួងកសិកម្ម និងចិន អនុញ្ញាតឱ្យនាំអង្ករចេញទៅចិន
× ក្រសួងកសិកម្ម រុក្ខាប្រមាញ់ និងនេសាទ និងភាគីចិន បានអនុញ្ញាតរោងម៉ាស៊ីនកិនស្រូវចំនួន១៨ បន្ថែមទៀត នាំចេញអង្ករទៅកាន់ប្រទេសចិន ដើម្បីបង្កើនលទ្ធភាព និងឱកាសពង្រីកទីផ្សារ។ រោងម៉ាស៊ីនទាំង១៨នេះ ត្រូវបានប្រកាសដោយក្រសួងកសិកម្ម នៅថ្ងៃទី១៩ ធ្នូ។
រដ្ឋមន្ត្រីក្រសួងកសិកម្ម លោក វេង សាខុន ប្រាប់ឱ្យរោងម៉ាស៊ីនកិនស្រូវ ដែលទទួលបានការអនុញ្ញាតនាំចេញអង្ករទៅប្រទេសចិននេះ ស្រូវត្រូវលើកកម្ពស់សមត្ថភាពកែច្នៃ ធ្វើយ៉ាងណាធានាបានគុណភាព និងស្តង់ដារតម្រូវនៃទីផ្សារនាំចេញ ពិសេសបទដ្ឋាន SPS។
ថ្លែងក្នុងពិធីប្រកាសទទួលស្គាល់នេះ រដ្ឋមន្ត្រីកសិកម្ម បាននិយាយដូច្នេះថា៖«អ្នកផលិតក៏ត្រូវក្លាយខ្លួនចេញពី “កសិករ” ទៅជា “កសិ-ពាណិជ្ជករ” ដើម្បីទទួលបានបច្ចេកវិទ្យាទំនើប ទាន់សម័យ សមស្រប មានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងការអនុវត្តកសិកម្មតាមកិច្ចសន្យា ដែលនាំដល់ការបង្កើនសមត្ថភាពផលិត តម្លៃបន្ថែម ធានាបរិមាណ គុណភាព និងស្តង់ដារទីផ្សារនាំចេញ»។
ជាមួយគ្នានេះលោក វេង សាខុន ក៏ជំរុញឱ្យអគ្គនាយកដ្ឋានកសិកម្ម និងវិទ្យាស្ថានស្រាវជ្រាវនិងអភិវឌ្ឍន៍កសិកម្មកម្ពុជា ពិនិត្យឡើងវិញនៅប្រភេទពូជស្រូវ ដែលមានតម្រូវការទីផ្សារ និងដាក់ទិសដៅជំរុញការផលិតពូជទាំងនោះ ជាពិសេសត្រូវកំណត់ឈ្មោះសមស្រប ដោយមិនត្រូវបង្កើតឈ្មោះច្រើន ដែលនាំឱ្យមានការភ័ន្តច្រឡំប្រភេទពូជឡើយ។
«យើងអាចឈានមកដល់ចំណុចនេះគឺបានមកពីកិច្ចសហការយ៉ាងជិតស្និទ របស់អគ្គរដ្ឋបាលគយចិន និងស្ថានទូតចិនប្រចាំនៅកម្ពុជា ដែលបានបង្កលក្ខណ:ល្អប្រសើរ ធ្វើយ៉ាងណាជំរុញឱ្យផលិតផលអង្ករកម្ពុជាអាចនឹងនាំចេញទៅកាន់ទីផ្សារចិនគ្រប់តាមកូតា ៤០ម៉ឺនតោនក្នុងមួយឆ្នាំស្របតាមសុឆន្ទ:របស់ប្រមុខរាជរដ្ឋាភិបាលកម្ពុជា»។នេះជាការលើកឡើងរបស់រដ្ឋមន្ត្រីកសិកម្ម ដែលរំពឹងថា ភាគីចិននឹងបន្តពន្លឿនការចរចានូវប្រភេទមុខដំណាំដទៃទៀត ដែលកំពុងមានសក្តានុពលនាំចេញ ដើម្បីធានាដល់ទីផ្សារនៃការផលិត និងកំណើនសេដ្ឋកិច្ចកម្ពុជា។
ជាការឆ្លើយតបលោក Wu Guoquan តំណាងស្ថានទូតចិន បានសង្កត់ធ្ងន់ថា ទីផ្សារចិនមានសក្តានុពលសម្រាប់កសិផលកម្ពុជា ដោយមិនមែនតែអង្ករនោះទេ ប៉ុន្តែដំឡូងមី ម្រេច ស្វាយ ស្វាយចន្ទី ត្រី កៅស៊ូ ដូង និងកសិផលផ្សេងៗទៀត ក៏ជាឱកាសដ៏ប្រសើរសម្រាប់កសិករកម្ពុជានាពេលអនាគតដែរ។ «រដ្ឋាភិបាលទាំងពីរបានដាក់ចេញគឺការពង្រឹង និងពង្រីកចំណងសាមគ្គីភាព មិត្តភាព និងកិច្ចសហការគ្នាគ្រប់កាល:ទេស:តាមរយ:ការពង្រឹង និងពង្រីកវិស័យកសិកម្ម និងសេដ្ឋកិច្ច»។ នេះបើតាមតំណាងចិនរូបនេះ។
បច្ចុប្បន្នកម្ពុជា មានរោងម៉ាស៊ីនកិនស្រូវចំនួន ៤៤ ហើយ ដែលមានលទ្ធភាពនាំចេញអង្ករទៅកាន់ទីផ្សារចិន៕
Tag:
វេង សាខុន
កសិកម្ម
© រក្សាសិទ្ធិដោយ thmeythmey.com