ជាតិ
រូបពីហ្វេសប៊ុកលោក មុត ចន្ធា មនុស្សជំនិតលោក កឹម សុខា ប្រធានអតីតគណបក្សសង្គ្រោះជាតិ
×![]()
ដោយ: ធឿន បញ្ញាឬទិ្ធ
ភ្នំពេញ៖ កាណាដា នឹងបន្តតាមដានករណីលោក កឹម សុខា ប្រធានអតីតគណបក្សសង្គ្រោះជាតិ ដែលឈានដល់ការបើកសវនាការជំនុំជម្រះ នៅថ្ងៃទី១៥ មករា ឆ្នាំ២០២០ខាងមុខ។ លោកស្រី Allison Stewart ភារធារីនៃស្ថានទូតកាណាដាប្រចាំកម្ពុជា បានថ្លែងបែបនេះ ក្នុងជំនួបសួរសុខទុក្ខលោកប្រធាន កឹម សុខា នៅគេដ្ឋានរបស់លោក កាលពីថ្ងៃទី១៩ ខែធ្នូ ឆ្នាំ២០១៩។
លោក មុត ចន្ថា មនុស្សជំនិតលោក កឹម សុខា បានស្រង់សម្តីរបស់លោកស្រី Allison ថា កាណាដា នឹងបន្តជួយ និងគាំទ្រដំណើរការប្រជាធិបតេយ្យ ,ការលើកកម្ពស់ និងគោរពសិទ្ធិមនុស្ស រួមទាំងសេរីភាពជាមូលដ្ឋាននៅកម្ពុជា។
ចំពោះករណីលោក កឹម សុខា វិញ លោកស្រីភារធារីរូបនេះ បាននិយាយថា កាណាដានឹងបន្តតាមដានយ៉ាងយកចិត្តទុកដាក់ចំពោះស្ថានភាពរឿងក្តីលោក កឹម សុខា ។ជាពិសេសការបើកសវនាការជំនុំជម្រះខាងមុខនេះ។ នេះបើតាមលោក មុត ចន្ថា ដែលបានសរសេរលើហ្វេសប៊ុក។
«អរគុណចំពោះរដ្ឋាភិបាលកាណាដា ដែលបានជួយនិងគាំទ្រដល់កិច្ចការ(រឿងក្តី)នេះ»។ នេះជាការលើកឡើងរបស់លោក កឹម សុខា ដែលបានបន្ថែមថា លោកតែងតែស្វាគមន៍ នូវការពង្រឹងទំនាក់ទំនងល្អជាមួយបណ្តាប្រទេសនានា ដើម្បីការពារ និងបម្រើផលប្រយោជន៍ជាតិនិងប្រជាពលរដ្ឋខ្មែរ។
សំណុំរឿងរបស់លោក កឹម សុខា តុលាការរាជធានីភ្នំពេញ កំណត់បើកសវនាការនៅថ្ងៃទី១៥ ខែមករា ឆ្នាំ២០២០ ក្រោយពីឆ្លងកាត់ការស៊ើបសួរអស់រយៈពេល២ឆ្នាំរួចមក។ ឯកអគ្គរាជ /រដ្ឋទូត ដែលបានជួបសួរសុខទុកលោក កឹម សុខា កន្លងមក រួមមានទូតអាមេរិក និងនូវែលសេឡង់ជាដើម សុទ្ធតែអះអាងថា ខ្លួននឹងបន្តតាមដានសវនាការជំនុំជម្រះក្តីរបស់ប្រធានអតីតគណបក្សសង្គ្រោះជាតិនេះ៕
Tag:
កឹម សុខា
មុត ចន្ថា
នយោបាយ
© រក្សាសិទ្ធិដោយ thmeythmey.com
